Gangandi rekstrareining

Ég stefni að hugarjafnvægi.  Það hefur í för með sér að utanaðkomandi áreiti truflar mig lítið.  Sko það er ætlunin en ég er svo sannarlega ekki búin að ná þessu jafnvægi svo vel sé, enda þarf ég stöðugt að æfa mig.

Bubbi þarf athygli og núna er ég t.d. að gefa honum hana.  Hann vill auðvitað meira áhorf á þáttinn sinn Rokkstar Bubbanóva.  Ein lélegast eftirlíking á útlendum þætti sem ég hef séð.  Þetta er auðvitað ekkert annað en karókíkeppni og mér sýnist á öllu að þetta sé sérhannað utan um kónginn og að hans hátign beinist sviðsljósið.  Allir aðrir eru propps og aukaleikarar.

Og mér væri slétt sama..

..ef ég væri ekki stöðugt að heyra utanað mér einhverja palladóma um menn sem Bubba er uppsigað við.

Dæmi:

Siggi Lauf var látinn fara með skömm úr þættinum og sendur í grafhýsi frægðarinnar.  Ég er viss um að Siggi, sem svaraði kóngi fullum hálsi í þættinum, hlaut í beinu framhaldi ekki náð fyrir augum hans hátignar.  Og þá gerðist Bubbi andstyggilegur.  Nokkrum dögum síðar má lesa á bloggsíðu Bubba að Siggi Lauf hafi verið látinn fara út þættinum vegna þess að hann er "hræddur við lífið".  Ég hélt að viðkomandi þáttur gengi út á sönghæfileika ekki hugrekki í lífsslagnum. 

Hvað þýðir annars að vera hræddur við lífið?

Nú er Bubbi kominn í rifrildi við Bigga í Maus.  Biggi er laglaus.  Hm... Ætlar Biggi að fara að syngja einhversstaðar?  Ég held ekki en hann skrifaði grein um þátt kóngsins í Íslenskri tónlistarsögu og hlaut ókeypis gagnrýni að launum frá kóngi.

Ég nenni ekki að velta mér upp úr þessu til allra hliða en þessi fyrirferðarmikli maður sem Bubbi er, (ekki hægt að opna blað án þess að fá ítarlegar fréttir af degi Bubba), mætti nú aðeins fara að taka til í eigin garði.  Hann er ekki hafinn yfir gagnrýni og ætti að sýna smá aðgát í nærveru sálar.

Svo gef ég 0,0 fyrir "listamennina" sem láta sig hafa það, viku eftir viku, að sitja með Bubba og "gagnrýna" þátttakendur í Bubbanóva.  Hversu desperat getur fólk verið sem fær sig til þess að taka þátt í þessum ljóta leik, þar sem ungar manneskjur eru notaðar sem rammi í kringum kónginn og þær oft teknar og gagnrýndar á miskunnarlausan hátt.

Nú segi ég...

Afsakið meðan ég æli lifur og lungum.

Og hér er umfjöllunin í Kastljósi gærkvöldsins

Guð gefi mér æðruleysi

Farin í meðferðina mína.

Úje

P.s. Eins gott að það komi fram að mér hefur alltaf fundist Bubbi flottur tónlistarmaður.  Ok, ekki svo mikið´eftir að hann varð gangandi rekstrareining, en fyrir þann tíma, algjör B-O-B-A/BOMBA

og ég meina það

Athugasemdir

[Stefán (IP-tala skráð) 12.3.2008 kl. 09:27]

Ég get ekki annað en verið sammála öllu sem þú skrifar þarna Jenný um hinn annars stórgóða tónlistarmann Bubba Morthens. Það er greinilega stórt vandamál hjá Bubba þessa dagana að líta svo stórt á sig að hann sé yfir alla gagnrýni hafinn, en megi svo sjálfur valta yfir aðra eins og honum sýnist. Ég segi nú bara að mest af þessari gagnrýni hefur hann kallað sjálfur yfir sig með hroka.  

[Jenný Anna Baldursdóttir, 12.3.2008 kl. 09:36]

Stefán: Bubbi mætti hafa til að bera smá virðingu fyrir fólki.  Það virðist alveg vanta þessa dagana.

[Marta B Helgadóttir, 12.3.2008 kl. 10:06]

Kannski er þetta óþol hans Bubba fyrir gagnrýni bara viðkvæmni hjá honum...??

En það er greinilega vandlifað ef maður er stjarna

[Anna Ólafsdóttir (anno) (IP-tala skráð) 12.3.2008 kl. 10:27]

Jenný: (í tilefni af kommenti þínu hjá mér) já, við ERUM tvíbbar, nákvæmlega eins og talað út úr mínu hjarta.

Knús til þín og þinna

[Guðrún Emilía Guðnadóttir, 12.3.2008 kl. 10:41]

Hver er ekki sammála þér Jenný þú ert svo frábær penni,
og rétt er það sem þú ert að tala um, nú ef þú ert að tala um allt og ekkert er það bara líka flott.
Er alveg hætt að skilja Bubba og bara fólk yfirleitt,
allir eru alltaf að gera það, gott nema ég.
Hvernig væri að fólk, hvernig sem það er skapað, vinnur, bloggar og bara hvað sem er, fengi að vera til í sínum skemmtileg heitum,
án þess að hafa einhverja leiðindahakkara yfir sér.
Svo er eitt fólk er alltaf að misskilja allt, til hvess? maður bloggar bara og ef einhver skilur það ekki, þá er það ekki bloggarans mál.
Kannski skilur þetta engin, en það er bara allt í lagi.
                                   Knús á þig bestust.
                                       Milla.

[Ásdís Sigurðardóttir, 12.3.2008 kl. 10:42]

Bubbi er góður og hefur gert margt gott, en hógværðin drepur engann, hann má tileinka sér smá af henni. 

[Helga Magnúsdóttir, 12.3.2008 kl. 10:50]

Bubbi var flottur á meðan hann var hrár og góður útiköttur. Er ekki jafnhrifin af honum eftir að hann varð svona rjóma-, rækju- og lúðuköttur. Svo er hann alveg hroðalega hörundsár og það má ekki minnast á hann nema mæra hann botnlaust.

[Hrönn Sigurðardóttir, 12.3.2008 kl. 10:56]

Ég þori ekkert að segja - ég er svo hrædd um að þá lesi ég það í blaði á morgun að ég sé laglaus

[Kristín Katla Árnadóttir, 12.3.2008 kl. 11:51]

haha Hrönn alltaf fyndin

[Ásthildur Cesil Þórðardóttir, 12.3.2008 kl. 12:17]

Innilega sammála hér, og ég er komin með upp í kok af þessum manni, en ég hlusta aldrei á þennan Bubbovíus Eða Bubbanóva eins og Jenný kemst svo snilldarlega að orði. Eða Rokkstar Bubbanova