Löglegt? - Örugglega - Siðlaust? - Svo sannarlega

Í

 morgun barst mér litríkur bæklingur upp á margar síður, prentuðum á fínasta pappír.  Hann var merktur "Alvöru Flugeldar".  Ég gaf mér að þetta væri auglýsing frá björgunarsveitunum okkar, en ónei.  Þetta eru einhverjir dúddar sem ásamt fleirum eru að seilast inn á flugeldamarkaðinn um áramót til að hygla bankareikningum sínum.

Björgunarsveitirnar okkar eru í sérflokki.  Þar vinnur ótrúlegur fjöldi fólks óeigingjarnt sjálfboðastarf og hver einasta fjölskylda í þessu landi, þekkir eða tengist einhverjum sem hefur notið góðs af starfi þeirra.

Þetta fólk á alla mína virðingu og aðdáun.

Undanfarin ár hafa einkaaðilar í síauknum mæli verið að hasla sér völl í flugeldasölu.   Sumir dulbúa sölustaði sína eins og um björgunarsveitasölur sé að ræða.  Smekklegt.   Einn Spaugstofuleikarinn er í bullandi bisniss á ákveðinni tegund sprengiefnis svo dæmi sé tekið.  Eru matarholurnar ekki nægar annarsstaðar?

Sumir af bissnissmönnunum segjast vera með öflugri flugelda en björgunarsveitirnar, ef það er rétt þá eru þeir ólöglegir því björgunarsveitirnar selja eins kröftuga flugelda og lög leyfa.

Fólki er frjálst að setja upp flugeldasölur, mikil ósköp, en þetta er aðal fjáröflunarleið björgunarsveitanna sem vinna við að bjarga lífi okkar og limum, koma til aðstoðar hvenær sem eitthvað bjátar á og við eigum að styðja þær, þegar þetta gullna tækifæri gefst.

Mér finnst það siðlaust af peningamönnum sem eru í þessum bissniss til að spikfita budduna sína, með því að seilast inn á þennan markað.

Annars finnst mér reyndar að björgunarsveitirnar eigi að vera á fjárlögum, því hlutverk þeirra er ómetanlegt og algjörlega lífsnauðsynlegt.

Ég ætla að nota bloggsíðuna mína til áróðurs.  Ekki kaupa flugelda annarsstaðar en hjá björgunarsveitunum!!!!!  Í leiðinni erum við að búa í haginn fyrir okkur sjálf.

Látum peningamennina eiga sig í þessu samhengi.

Og hananú.!

Athugasemdir

[Ragnheiður , 28.12.2007 kl. 16:47]

Kaupi aldrei flugelda en tek undir hvert orð hjá þér samt. Ég myndi vilja geta styrkt þá með öðrum hætti

[Ibba Sig., 28.12.2007 kl. 16:49]

Jiii, hvað ég er sammála þér!

[Þröstur Unnar, 28.12.2007 kl. 16:53]

Þetta er barátta björgunarsveitanna um hver einust áramót, og fleiri og fleiri sækjast í þennan skyndigróða.

Ég er persónulega á þeirri skoðun að ríkið ætti að sjá alfarið um að fjármagna sveitirnar, og þær þar með að hætta flugeldasölu. Þessar sveitir eru ekkert einkamál þeirra sem reka þær, heldur öryggistæki allrar þjóðarinnar sem á að virka.

[Brjánn Guðjónsson, 28.12.2007 kl. 16:54]

ég kaupi ekki flugelda. ég er ekki með börnin mín um áramót svo ég sé ekki tilganginn. gerði það þó, að kaupa flugelda, myndi ég líklega versla við annað þeirra íþróttafélaga sem börnin mín æfa með. mér sýnist ég eiga mestra hagsmuna að gæta þar.

[Jón Steinar Ragnarsson, 28.12.2007 kl. 16:56]

Líklegast er þetta Einar áttavillti, (Þú villt ganga þinn veg. Ég vil ganga minn veg..)  Hann hefur verið að hösla í þessu í einhver ár og líklega sem milligöngumaður fyrir Krossinn, sem hann er einn æðstistrumpurinn í.

[Brjánn Guðjónsson, 28.12.2007 kl. 17:01]

annars væri réttast hjá þeim að stofna banka, nú eða klámsíðu. þar liggja peningarnir.

[Haukur Nikulásson, 28.12.2007 kl. 17:06]

Byrja þessar ruglathugasemdir eina ferðina enn. Hver gaf björgunarsveitum einhvern einkarétt á að okra á flugeldasölu?

Þetta er bara ekki hætis hót göfugri sala en einkaréttur ríkisins til eiturbyrlunar á þegnunum í gegnum ÁTVR til að halda úti spítölum.

[Sunna Dóra Möller, 28.12.2007 kl. 17:08]

Við kaupum bara hjá björgunarsveitunum, höfum alltaf gert (eða reyndar pabbi minn, hann sér um innkaupin ásamt syni mínum fyrir hver áramót )! Dettur ekki í hug að versla við aðra!

[Jóhanna Magnúsar- og Völudóttir , 28.12.2007 kl. 17:23]

Sko, ef fólk kaupir flugelda á annað borð finnst mér að það eigi að styrkja gott málefni eins og Landsbjörg, en er sammála því að auðvitað ættu Landsbjörg ekki að þurfa að standa í þessu eða annarri fjáröflun því að eins og landsmenn vita og margsannað er værum við illa stödd án björgunarsveita.

Sonur minn sér um flugeldana í ár, þó ég sé lítið hrifin af þeim, meira fyrir stjörnuljós eins og Birgitta Haukdal (enda álíka væmin)  - en hann er líka  að vinna fyrir Landsbjörgu dag og nótt núna fyrir áramótin við að tæma gáma fulla af flugeldum og kökum!

[Hildigunnur Rúnarsdóttir, 28.12.2007 kl. 17:52]

Ragnheiður, ekkert mál að styrkja björgunarsveitirnar án þess að kaupa, hringdu bara í sveit að eigin vali og færð upplýsingar um það.

[Birna Dis Vilbertsdóttir (IP-tala skráð) 28.12.2007 kl. 18:04]

Auðvitað á að kaupa af björgunarsveitunum.Þeir fara jú og FINNA TÝNDA RJÚPUVEIÐIMENN

[Guðjón (IP-tala skráð) 28.12.2007 kl. 18:33]

Þetta er laukrétt hjá þér Jenný. Maður á að styrkja björgunarsveitirnar þegar maður kaupir flugelda.  Þessir gaurar sem eru í samkeppni við björgunarsveitirnar ættu að upplifa það að vera fastir eða týndir uppá fjöllum. Spurning hver kæmi þeim til bjargar.

[Ólína Kjerúlf Þorvarðardóttir, 28.12.2007 kl. 19:53]

Sammála - að svo miklu leyti sem ég get fellt mig við flugelda finnst mér asnalegt af einhverjum gróðafíklum að reyna að skrapa þennan markað af björgunarsveitunum.

En svo er það önnur ella - að mér er ekkert um flugeldasölu yfirleitt. Á eftir að blogga um það síðar.

Bestu kveðjur - og hafðu það gott um áramótin.

[Edda Agnarsdóttir, 28.12.2007 kl. 20:01]

Ég þoli ekki lengur gamlárskvöld þegar líða fer á kvöldið og hef ekki gert í nokkur ár! Fer upp í sveit rétt fyrir 12 til að sitja af sem mest af sprengingunum.

Er annars algjörlega sammála þér.

[Jenný Anna Baldursdóttir, 28.12.2007 kl. 20:15]

Tek fram að ég þoli ekki flugelda en beygi mig fyrir lýðræðinu.  Flestir eru hallir undir hávaðan og mengunina og þess vegna þegi ég.

En fyrst fólk á annað borð kaupir sprengjur og flugelda þá á það að sjálfsögðu að styrkja hjálparsveitirnar.

Og hananú.

[Steingrímur Helgason, 28.12.2007 kl. 23:54]

Ég náttla eiginlega meira hnaut um þessar athugasemdir þeirra sem að voru ekki sammála en hinna.  Á alveg til í mér eitt gott fól til að taka þeirra auma mal í gegn, en kýs að gera það ekki hér.