Af þúsundum stórkostlegra sóla, óléttu, Bördí Jennýjarsyni og skoðanakönnun!

Saran mín, sú yngsta, kom hér í gær með gjöf handa mömmu sinni, alveg að tilefnislausu.  Hún færði mér nýju bókina hans Khaled Hossini (höfundur Flugdrekahlauparans) "A thousand splendid suns" og ég hef varla getað litið upp úr henni.  Ég hafði lesið neikvæða gagnrýni um bókina, en þar sem það er yfirlýst stefna hér á bæ, að láta ekki segja mér, hvað mér eigi að finnast um listrænar upplifanir, þá er ég nú á kafi í stórkostlegri sögu, grípandi og skelfilegri en samt svo fallegri.  Dætur mínar vita allar hvernig þær geta glatt mömmu sína, mest og best.

Saran á að eiga á jóladag.  Við vorum að ræða fæðingar og óléttu og henni finnst að um leið og fór að sjá á henni, þá telji fólk sig í fullum rétti til að kommentera á þyngd, stærð kúlu, þrota í andliti og svo finnst henni eins og önnur hver manneskja skelli lúkunum á kúluna.  Hún hló mikið þegar hún ræddi þetta en sagði jafnfram að hún hafi stökkbreyst í útungunarvél, sem mætti pota í, skoða og gagnrýna, að vild.  Ég man reyndar eftir þessu líka og mér er sem ég sæi einhvern klappa manni á magann, undir öðrum kringumstæðum, bara sí svona.  Að tala um nánd og káf.  Ópal auglýsingin hvað?

Bördí Jennýarson, er með alvarleg hegðunarvandamál.  Það er að segja, hann lifir sínu prívatlífi hér á bæ, án nokkurs tillit til annarra íbúa hússins.  Nú liggur hann á bókastaflanum uppi á bókahillunni, en bókin sem hann valdi sér fyrst til álegu, var sjálfur Brekkukotsannáll Nóbelskáldsins og mér fannst ég ekki geta verið þekkt fyrir að nota þá dásamlegu bók, fyrir fuglsbæli, þannig að nú hefur verið skipt um skruddu í hlaðanum og Bítlaávarpið varð fyrir valinu.  Voða Bítlalegt allt þessa dagana.  Fyrirgefðu Einar Már.

81,1% aðspurðra í skoðanakönnun á visi.is vilja að Vilhjálmur, borgarstjóri segi af sér.  Ég er ekki hissa.  En hvarflar að mér að hann geri það, ónei.  Það er aldrei við hæfi að segja af sér í íslenskri pólitík.

Þetta er ég fyrir svefn,

Kem í miklu stuði og sterk inn í fyrramálið.

Ég er nú hrædd um það börnin góð.

Úje 

Athugasemdir

[Kolgrima, 10.10.2007 kl. 02:35]

Ég er ein af þessum konum sem varla ræður við sig þegar ég sé kúlu. Mig langar alltaf til að snerta, strjúka, klappa, þrýsta - en læt það yfirleitt ekki eftir mér, nema við suma, örfáa, eftir að hafa beðið allra náðarsamlegast og mjög auðmjúklega um leyfi. Ég verð nefnilega svo óumræðilega hamingjusöm þegar ég kem við kúlu. Mér finnst ég komast í samband við upphaf mannsins. Uppsprettu sakleysisins. Ég syng himinsæl innan í mér lengi á eftir! Muniði ekki eftir þessu? 

(Um stærð, lögun, kyn, þrota, bjúg og bauga hirði ég ekkert. En ég verð sérstaklega glöð ef börnin eru tvö)

[Laufey Ólafsdóttir, 10.10.2007 kl. 08:20]

Ég las í fyrstu óléttu óléttubók eftir Paulu Yates þar sem hún talaði um nákvæmlega þetta. Að um leið og fer að sjást á manni verður maður almannaeign og alls kyns fólk fer að káfa á manni og gefa alls kyns ráð og óvelkomnar athugasemdir varðandi útlit. Veit ekki hvort maður er sekur um þetta sjálfur

[Ásthildur Cesil Þórðardóttir, 10.10.2007 kl. 09:07]

Mér hættir til að leggja hönd á svona fallegar kúlur, en bara hjá þeim sem ég þekki vel.  (Nú er ég að leita að orði um konu með barni, hugsið ykkur nöfnin sem valinn eru á þessa elskur, Vanfær, Ólétt, ótrúlegt ég hef aldrei leitt hugan að þessum nafngiftum oj bara), Kona með barni er það fallegasta sem til er gangandi kraftaverk.

En Jenný mín mér lýst vel á þennan fugl þinn hann hefur greinilega þroskaðan bókmenntasmekk. 

[Ásthildur Cesil Þórðardóttir, 10.10.2007 kl. 09:09]

Hugsið ykkur, Vanfær, ófrísk, ólétt, þunguð, um fallegasta kraftaverk mannsins.  Man einhver fleiri orð ?

[Sunna Dóra Möller, 10.10.2007 kl. 09:20]

Ég hef sagt það áður og segi það aftur.....þessi fugl er pottþétt manneskja í álögum! Það er bara alveg morgunljóst miðað við hegðunarmynstrið !

Annars er ég sammála þér Ásthildur, þetta eru alveg ótrúleg orð yfir þetta kraftaverk að ganga með barn. Það þarf sannarlega að finna eitthvað betra. Þessi orð eru öll neikvæð og gera lítið úr ástandinu sem er ekki sjúkdómur heldur í flestum tilfellum eru konur hraustar og geislandi þegar þær ganga með börnin sín!

Eigiði annars góðan dag

[Katrín Snæhólm Baldursdóttir, 10.10.2007 kl. 09:22]

Með köku í ofninum?? Vera með barni finnst mér fallegt að segja. Kona eigi einsömul segir svo í biblíunni.

Jennsla mín...njóttu samvistanna við skáldagyðjanna og þegar fiðrufuglinn fer að syngja bítlalög er tímabært að setja undir hann stafla af orðabókum og getið þið þá eflaust átt magnaðar samræður..þú og hann. Mamma talaði alltaf heilmikið við Vibba páfagaukinn okkar..en það var nú oftast skammarorðaruna sem þar heyrðist.

[krossgata, 10.10.2007 kl. 09:59]

Opal auglýsingin, oj.  Mér líður alltaf illa að horfa á þær auglýsingar og skipti jafnan um stöð. 

Ég kem ekki við kúlur nema að fengnu leyfi.... nema hjá henni dóttlu minni.  Það eru bara sjálfgefin réttindi amma að pota í afkomendakúlur. 

[Jenný Anna Baldursdóttir, 10.10.2007 kl. 10:02]

Bítlaávarpið er leiðinleg bók (sorrí aftur Einar Már)þannig að Bördí má hafa hana efst í sínum stafla.  Undir ávarpinu eru hins vegar dásamlegar bókmenntir.  Hafið þið séð kínversku bókaskápana sem eru alltaf í bakgrunni, þegar teknar eru myndir frá opinberum heimsóknum í Kína? Kallar í stólum og bókaskápar með bókum á víð og dreif fyrir aftan?  Þannig er minn bókaskápur.  Troðinn af bókum og ofan á staflar upp í loft, næstum af bókum sem ekki komast í skápinn og eru alveg á leiðinni að fara fá nýjar hillur, sem sumir nenna ekki að kaupa.  Þanng að Bördí er bókafugl.

Auðvitað langar manni að snerta kúlur á ófrískum konum og Sara hefur ekkert á mótið því að þeir sem þekkja hana komi við sig, en þegar fólk sem hún þekkir lítið sem ekki neitt, veður inn fyrir mökin hennar og skellir lúkunum á kúluna verður hún pírípú.

Þeinkjúgæs.

[Heiða B. Heiðars, 10.10.2007 kl. 10:41]

A Thousand Splendid Suns er æði og láttu engan segja þér annað! 

Mér finnst Brekkukotsannáll ekkert verra fuglabæli en hvað annað:)

[Jóna Á. Gísladóttir, 10.10.2007 kl. 14:52]

Rosalega er hann Bördí óforskammaður. En þetta er ágætis leið til að koma leiðinlegum bókum fyrir kattarnef á umhverfisvænan hátt. Er skilað aftur út í nátturna sem fuglaskítur.