FYLLERÍ Í DRAUMI

Þetta er snúra, gott fólk.

Í nótt dreymdi mig að ég væri dottin í það.  Ég var ekki að gera það endasleppt, heldur teygaði ég vodka beint úr flöskunni bara.  Það er hreint ótrúlega vond upplifun fyrir alka að dreyma að hann sé fallinn.  Marga óvirka alka eins og mig, dreymir svona og ég held að  það sé vegna þess að við hræðumst svo að falla, að úrvinnslan kemur í gegnum drauminn.  Þar sem ég teygaði bölvaðan óþverrann af stút, í minni martröð (því þetta var ekkert annað en argasta martröð), upplifði ég þvílíka angist og skelfingu.  Alveg eins og ég myndi gera í raunveruleikanum, ímynda ég mér. 

Ég ætla ekki að lýsa léttinum sem gagntók mig, þegar ég vaknaði, bláedrú og með góða samvisku.

En á meðan mig dreymdi, hrundi lífið innan í mér og allt var sem fyrr.

Svona draumur er á við góðan AA-fund, svei mér þá.

Ég óska mér þó ekki fleiri martraða af þessari tegund.

Bötæmklínandsóber.

Újebb

Athugasemdir

[Aðalheiður Ámundadóttir, 28.8.2007 kl. 08:59]

Gæti ekki verið meira ósammála...

Eins og edrúlífið er yndislegt þá alveg hreint frábært að fá að vera full í draumi... 

[Bjarndís Helena Mitchell, 28.8.2007 kl. 09:00]

Ææ, skvís, nei svona martraðir eru skelfilegar. Sem betur fer fylgir þessi ekki timburmenn í stíl. Til hamingju með að vera vöknuð

[Jenný Anna Baldursdóttir, 28.8.2007 kl. 09:02]

Svona getur þetta verið misjafn Alla.  Svo margir sem ég hef talað við lýsa þessu eins og ég.  Hehe

Jabb Bjarndís, ég er vöknuð og brakandi edrú og engir timburmenn þrátt fyrir vodkaþambið.

[Katrín Snæhólm Baldursdóttir, 28.8.2007 kl. 09:09]

Sem betur fer fylgja ekki timburmenn draumi um vodkaþamb...eða ólétta í kjölfar eldheits losta í draumi eða  brotinn hendleggur eftir bílveltu í draumi eða....ómælt fitumagn á mjöðmum og maga ásamt vænni undirhöku ef mann dreymir rjómatertukeppni....bara smá svona pæling um hvað við erum heppin. Þú ert heppin Jenný að hanga á snúrinni með svona þvílíkum glans.

Good day darling!

[Ásdís Sigurðardóttir, 28.8.2007 kl. 09:13]

Ég hef drukkið mig pissfulla í draumi og það var svo ljúft, engir timburmenn, en ég er reyndar ekki á snúru þó svo ég bragði sjaldan áfengi, hef bara misst listina með árunum.  Eigðu góðan dag ljúfust.

[Ásdís Sigurðardóttir, 28.8.2007 kl. 09:14]

Gleymdi að segja ykkur að það að dreyma fillerý er fyrir hláku svo það er spurning hvar hlánar hann í dag??

[Ásgerður , 28.8.2007 kl. 09:14]

Dreymdi oft svipaða drauma þegar ég hætti að reykja,,,,,var alltaf mikið létt þegar ég vaknaði, og áttaði mig á að mér var bara að dreyma hehe

[Ásgerður , 28.8.2007 kl. 09:17]

Átti að vera " áttaði mig á að mig var bara að dreyma".  Sorry smámunasemina

[Jenný Anna Baldursdóttir, 28.8.2007 kl. 09:22]

Þekki þetta Ásgerður, þ.e. smámunasemina, þarf oft að leiðrétta sjálfa mig. 

[Jóna Á. Gísladóttir, 28.8.2007 kl. 09:22]

úff ég get ímyndað mér hversu mikið þér hefur létt elskið mitt

[Þröstur Unnar, 28.8.2007 kl. 09:37]

Já "elskið" mitt þú ert heppin að hafa vaknað edrú.

[Kristín Katla Árnadóttir, 28.8.2007 kl. 09:45]

Sem betur fer var þetta bara draumur mín kæra.

[Jenný Anna Baldursdóttir, 28.8.2007 kl. 09:47]

Þröstur; vísindaheimurinn hefði staðið á öndinni hefði ég vaknað í öðru ástandi en edrú, þar sem ég fór allsgáð að sofa addna.

Takk annars þið öll.

Jóna sendi þér póst kjéddling, búin að fá hann?

[Sunna Dóra Möller, 28.8.2007 kl. 10:17]

Mig hefur mjög oft dreymt einmitt þær aðstæður sem að ég óttast með að gerist í lífinu og það er svo raunverulegt......en almáttugur hvað ég verð alltaf fegin þegar ég vakna og sé alla í kringum mig og allt er eðlilegt !  Vona að þú eigir góðan dag.....ég er sko byrjuð að þrífa eldhúsið...svona er lífið skemmtilegt....

[Ásthildur Cesil Þórðardóttir, 28.8.2007 kl. 11:26]

Mikið er gott að þetta var nú bara draumur Jenný mín

[Ellý Ármannsdóttir, 28.8.2007 kl. 12:04]

Að drekka úr flösku í draumi veit á gott og boðar ró.

[Sigga (IP-tala skráð) 28.8.2007 kl. 13:16]

Þú ert dugleg.  Ég stend með þér

[Jenný Anna Baldursdóttir, 28.8.2007 kl. 13:20]

Hehe, ég get þá slakað á og tekið því "rólega" Ellý.

Takk annars öll saman.

[Kristín Björg Þorsteinsdóttir, 28.8.2007 kl. 15:44]

Mig dreymir enn eftir 15 ára reykleysi að ég sé með sígarettu í munni. Það er alveg gasalega gott en ég er svo glöð þegar ég vakna að vera ekki farin að reykja aftur!

Gangi þér vel í edrúmennskunni - hvað ertu búin að vera edrú lengi?

[Jenný Anna Baldursdóttir, 28.8.2007 kl. 16:13]

Bráðum ár síðan ég kom úr meðferð. 

[Birna Dis Vilbertsdóttir (IP-tala skráð) 28.8.2007 kl. 16:26]

Vont að dreyma sig fulla eða dópaða. Það kemur fyrir mig enn svona 1-2 á ári. Mikill er léttirinn að vakna edrú.

[Anna Ólafsdóttir (anno) (IP-tala skráð) 28.8.2007 kl. 18:03]

Ég fæ svona martraðir sem eru þannig að ég er byrjuð að reykja. Það er dásamlegt að komast að því að það gerðist ekki in real life.

Til hamingju með þig - knús  

[Hreiðar Eiríksson, 28.8.2007 kl. 20:57]

Ég kannast vel við svona drauma.  Fyrstu árin varð mér mjög illt við og hrökk upp með andfælum en fylltist gleði þegar ég fann að ég var enn edrú.  Smátt og smátt jafnaði ég mig á þessu og núna lít ég svo á að æðri máttur sé að minna mig á það hvernig mér leið meðan ég drakk svo að ég megi gæta mín á því að vaka yfir hugarfari mínu og hugsunum í daglegu lífi.

Það einkennir mína drauma að í þeim hef ég alltaf verið að drekka í laumi, smátt og smátt verr og verr, allt frá því að ég fór í meðferð.  Og tilfinningarnar eru alltaf þær sömu:  Botnlaust vonleysi og sjálfsfyrirlitning.  Og þegar ég vakna, þá er ég þakklátur fyrir að fá að vera edrú, skýr í kollinum og í heilu lagi andlega og líkamlega.

Tóbaksreykingar trufla mig ekki.  Ég hætti þegar ég vil hætta og byrja aftur þegar mig langar til þess.  Engin vandamál á þeim bænum.

[Draumar, 28.8.2007 kl. 21:39]

Það að drekka brennivín í draumi þarf alls ekki að boða slæma hluti, þó þér hafi liðið bölvanlega með það. Hér skiptir þó regin máli hvort dreymandinn eigi við drykkjuvandamál að stríða eða ekki. Sé svo eru mestar líkur á að draumurinn sé að endurspegla tilfinningar eða vandamál dreymandans, en ekki ber þó að horfa fram hjá því að hér gæti verið vísbending til dreymandans um að forðast smjaður eða umtal.

Séu hins vegar engin drykkjuvandamál þekkt getur drykkja boðað jákvæða hluti, mikla gleði og einnig góða vináttu. Það er einnig þekkt að útfrá drykkju í draumi megi spá fyrir um veður og er þá von á hlýnandi veðri og bleytu. Annað sem ber að huga að við slíka drauma er hvort viðkomandi verði drukkinn í draumnum því þá getur draumurinn verið að koma viðvörunum til dreymandans og skipta þá önnur draumtákn máli til að segja fyrir um hvað það er.

Bara smá innlegg til skemmtunar :) og gangi þér allt í haginn Jenny

[Báran, 28.8.2007 kl. 22:36]

Fjúff,ég þekki svona drauma, ekki af eigin raun þó en vitni að þvílíku þakklæti þegar vaknað er og uppgötvað að þetta var bara drau..martröð!  Merki um bata , ekki spurning  Bíð spennt eftir afmælisfærslu og mynd af pjéning...

[Jenný Anna Baldursdóttir, 28.8.2007 kl. 22:44]

Færð bæði afmælisfærslu og mynd af flottum péning Báran.  Takk þið öll.