SUMIR VILJA EKKI EINKALÍF

 

Ný upplýsingatækni auðveldar einka- og opinberum aðilum að fylgjast með einstaklingum og skapar hættu á að persónulegar upplýsingar séu misnotaðar, segir Haukur Arnþórsson, stjórnmálafræðingur.

Ég er sammála því og finnst ógnvekjandi hvernig upplýsingasamfélagið kreppir stöðugt að einkalífinu og gengur nærri persónu fólks.

Ég hef hins vegar reynslu af fólki sem var beinlínis á móti einkalífi og þröngvaði sér inn í líf mitt.  Já inn í mitt líf, alveg sárasaklausri.  Þegar ég bjó á Laugaveginum, bjó ég á annarri hæð.  Laugavegurinn er ekki breiðgata, eins og allir vita og í sömu hæð í húsinu á móti, bjó lengi vel, kunningjakona mín og hún hafði dregið fyrir á kvöldin.  Ég var með tölvuna mína við gluggann og sat gjarnan á kvöldin og vann.  Nýju nágrannarnir voru gluggatjaldalausir og ég sá bæði inn í stofu og svefnherbergi.  Ef ég leit upp þá blasti við klámmyndasýning á veggjskjánum og þau alsber og stundum með jafn alsbera gesti í heimsókn.  Þetta var í fullum litum, ekkert dregið undan og við látum þá lýsingu nægja.  Ég var nokkuð snögg að fá mér rúllugardínur, en ég get svarið það, þetta gekk svona á nánast hverju kvöldi og það voru þarna dagar sem ég kom ekki nálægt tölvunni og hélt mér hinum megin í íbúð vegna sjónmengunar.

Konan á hæðinni fyrir ofan var neydd á sömu kvöldsýningar og það voru rúllugardínukaup á forgangslista á því kærleiksheimili líka.

Sumir vilja ekki einkalíf, það þarf a.m.k. ekki að hafa áhyggjur af þeim.  Það er fólk eins og ég og fleiri sem brjálumst við tilhugsunina um myndavélar út um allt.  Svo maður tali ekki um míkrófóna og hvað þessi apparöt öll nú heita.

Kræst! 

Upplýsingatækni ógn við einkalífið

Athugasemdir

[Theódór Norðkvist, 29.7.2007 kl. 02:07]

Já, stóri bróðir fylgist með þér. Og litli bróðir líka. Ekki líst mér betur á að tryggingafélögin fái aðgang að sjúkraskrám, eins og þau eru farin að heimta. Með bandamann á þingi, Pétur Blöndal (örugglega marga aðra.)

Ísland, best í heimi!