SMÁ SNÚRA

Þar sem ég hangi á snúrunni í þessu blíðskaparveðri og blakti rólega í blænum, datt mér í hug að snúrublogga aðeins.  Ég veit að fólk fær áhyggjur ef ég snúrublogga ekki reglulega, getur orðið hrætt um að ég sé dottin í það eða eitthvað (ekkert eitthvað, þetta er að duga eða drepast dæmi). 

Ég las viðtal við "my main man" Þórarinn Tyrfingsson í Fréttablaðinu í morgunn, þar sem hann er að tala um sterk verkjalyf sem óvirkir alkar eða fíklar (sami grautur í sömu skál) neyðast stundum til að taka við sjúkdómsmeðferðir inni á spítölum.  Það getur reynst hættulegt að taka lyf sem hafa áhrif á miðtaugakerfið og það ber auðvitað að forðast í lengstu lög.

Ég hætti við að fara í magaspeglun í fyrra, fljótlega eftir ég kom úr meðferð, vegna þess að ég fæ róandi í svoleiðis rannsókn, enda afspyrnu ósamvinnuþýður sjúklingur þegar kemur að því að það á að troða einhverri slöngu ofan í magann á mér.  Ég hætti sum sé við og sem betur fer eru magabólgurnar á brott.  Ég var nefnilega skelfingu lostin við tilhugsunina um að fá eitthvað undir tunguna og verða dópuð.  Vissi ekki hvað það myndi gera mér.  Ég þurfti sem betur fer ekki að komast að því fullkeyptu.  Ef ég þyrfti nauðsynlega að fara í magaspeglun núna myndi ég láta gossa ódeyfð af því ég er orðin svo svakalega þroskuð.  Þegar maður hefur verið hálf dauður úr alkahólisma þá er ég, amk., skelfingu lostin við að setja eitthvað í mig sem getur komið af stað grjóthruni í hausnum á mér.

En eins og Þórarinn réttilega segir í viðtalinu, þá er þetta spurning um hugafar þess sem lyfin þarf að þiggja.  Það er alltaf spurningin um hugarfarið.

Brakandi edrú kona á snúru í góðviðrinu og útsýnið er hreint stórkostlegt.

Athugasemdir

[Eva Þorsteinsdóttir, 29.6.2007 kl. 17:33]

Gott hjá þér..... eigðu góðan dag :)

[Anna Ólafsdóttir (anno) (IP-tala skráð) 29.6.2007 kl. 18:48]

Kvitt og knús fyrir snúrublogg- þau eru ALLTAF góð!

[gerður rósa gunnarsdóttir, 29.6.2007 kl. 20:04]

Duglega! :)

[Jóna Á. Gísladóttir, 29.6.2007 kl. 20:06]

Veistu það.. ég bara næstum því skil þig. Vegna þess að ég elska að láta svæfa mig. Ég elska að komast í þetta algleymi sem svæfingalæknirinn færir mér að ég tali nú ekki um vímuna sem hlýst af kæruleysistöflunni. Ólíkt flestum sem ég þekki vakna ég endurnærð á sál og líkama eftir svæfingar. En það verður að sjálfsögðu að fylgja sögunni að ekki hefur verið um að ræða einhverjar meiriháttar aðgerðir. Það er ljóst að ég myndi ekki taka áhættuna á þessu ef ég ætti mér history of drug abuse.

[Ásdís Sigurðardóttir, 29.6.2007 kl. 20:07]

Duglega stelpan mín. Ég mæli með ef þú þarft í speglun að fá deyfikrem á rörið í stað sprays, það svínvirkar og er ekki svo erfitt. Ég tek nú bara EKKI verkjalyf, dugar ekkert svo það er betra að sleppa þeim. Eina sem græðist er lyfjafíkn.

[Kristín Katla Árnadóttir, 29.6.2007 kl. 20:09]

Já það er alltaf góð snúrubloggið þitt , Þórarinn hefur rétt fyrir sér.

[Ásthildur Cesil Þórðardóttir, 29.6.2007 kl. 20:11]

Mamma viltu ekki hafa Verkjatöflurnar þínar á glámbekk, sagði minn sonur.  Hann sagði líka, mamma gerir þú þér grein fyrir því að hafa sprautu einhversstaðar á glámbekk, er fyrir mér, eins og að stilla vodkaflösku fyrir framan alcoholista.  Ég nota sprautuhulstur til að mæla illgresiseyðingarlyf og annað slíkt. 

Maður þarf alltaf að vera meðvitaður um hvað er í gangi hjá sínu fólki og storka þeim ekki.  Það er nógu erfitt samt hjá ykkur þessum elskum. 

[Guðríður Hrefna Haraldsdóttir, 29.6.2007 kl. 21:14]

Mikið fannst mér gott þegar morfínið var AFTENGT hjá mér nokkrum dögum eftir skurðaðgerð 2004. Mér fannst áhrifin af því ömurleg og varð ekki að sjálfri mér fyrr en nokkrum dögum seinna. Held að ég hljóti að hafa eitthvað meðfætt vellíðunarefni í mér, líður alla vega langbest bláedrú! Varla er það endorfín því að ég er ekki mikið fyrir hopp og skopp ...

Alltaf gott og hollt að lesa snúrubloggið þitt. Dáist að þér, elskan mín.  

[Edda Agnarsdóttir, 29.6.2007 kl. 22:17]

Hetja

[Jenný Anna Baldursdóttir, 29.6.2007 kl. 22:32]

Takk ljósin mín, þið styðjið mig með ráðum og dáð eins og alltaf.

Jóna I know what you mean.  Úff

Anna: Ég á Hólmavík

Ásthildur:  Alveg hárrétt hjá syni þínum og takk, þið allar.