LOKSINS...

...hefur þjónustusamningur á milli SÁÁ annars vegar, og heilbrigðis- og tryggingarráðuneytisins og fjármálaráðuneytisins, hins vegar, verið framlengdur en bara út yfirstandandi ár.  Ég veit svo sem ekki hvaða háttur hefur verið á þessu til þessa en Vogur tam er sjúkrahús með mikla sérfræðikunnáttu í fíknisjúkdómum og litið er til sérfræðinga SÁÁ víða að, þannig að mér finnst það undarlegt að þeir skuli ekki vera á föstum fjárlögum eins og aðrar sjúkrastofnanir.  SÁÁ mun ma fá 80 milljón króna eingreiðslu þegar skrifað verður undir viðauka við þjónustusamninginn í næstu viku.  Ég veit að samtökin hafa búið við fjárskort og mér finnst það súrt í broti.  Ergilegast finnst mér að trúfélög hafi fengið mikla peninga til meðferðarstarfs, meðan Vogur hefur soltið, eins og lækningar og trúboð fari saman.  Ég veit að sum þessara félaga hafa lækna og annað heilbrigðisstarfsfólk en meðferðirnar eru byggðar á trúarlegum grunni og ég held að flestir sem veikir eru af öðrum sjúkdómum rækju upp stór augu yrði þeim vísað á trúfélög til að fá bót meina sinna. 

Ég get ekki horft á myndina af Vogi sem fylgir fréttinni án þess að um mig fari hlýjir straumar.  Þarna fékk ég lífgjöfina og þar fékk ég þá bestu þjónustu sem völ er á þar sem valinn maður er í hverju rúmi.  Ég tek ofan fyrir SÁÁ

Heilbrigðisráðuneytið framlengir þjónustusamning við SÁÁ

Athugasemdir

[Guðríður Hrefna Haraldsdóttir, 28.4.2007 kl. 23:01]

Vogur er frábær stofnun (þótt ég hafi reyndar ekki farið í meðferð, ég er kaffifíkill en það telst ekki með ...) sem á allt gott skilið. Vonandi átta ráðakonur og -menn sig á þessu og setja sjúkrahúsið á fjárlög! Krúttið mitt! 

[Anna Ólafsdóttir Björnsson, 28.4.2007 kl. 23:10]

Það er aldrei hægt að svara vaxandi þörf með minnkandi fjármunum, og því miður er vaxandi þörf á fjölbreyttari þjónustu á Vogi sem aldrei fyrr.

[Hrönn Sigurðardóttir, 28.4.2007 kl. 23:19]

knús til þín

[Laufey Ólafsdóttir, 28.4.2007 kl. 23:24]

Þetta á náttúrlega bara að vera sjálfsögð þjónusta og tryggja að allir sem á þurfa að halda komist að strax. Trúfélög hafa ekkert að gera með að starfrækja svona þjónustu og auðvitað á þetta að vera partur af heilbrigðiskerfinu. Það er dýr sparnaður að fjársvelta velferðar- og félagsmál, það er deginum ljósara.