AÐ VERA FÓRNARLAMB OG MÆÐAST Í MÖRGU I

Ég hef verið að lesa að nýju Alkemistann eftir Paul Cotelho, sem mér finnst vera ágætis bók.  Ég las hana fyrir nokkrum árum og í dag tók ég mér hana aftur í hönd.  Á fyrstu síðunni er að finna tilvitnun úr Biblíunni sem er eitt af mínum uppáhalds gullkornum í þeirri merkilegu bók.  Það hljóðar svona:

"Er þeir voru á ferð, kom hann inn í þorp nokkurt.  En kona ein að nafni Marta tók á móti honum í hús sitt.  Og hún átti systur, er hét María, hún settist við fætur Drottins og hlýddi á orð hans.  En Marta var önnum kafin við mikla þjónustu.  Og hún gekk til hans og mælti: -Herra, hirðir þú ekki um það, að systir mín lætur mig eina ganga um beina?  Seg þú henni að hjálpa mér.  En Drottinn svaraði og sagði við hana:

-Marta, Marta, þú ert áhyggjufull og mæðist í mörgu en eitt er nauðsynlegt.

María hefur valið góða hlutann, hann skal ekki verða tekinn frá henni."

Þarna útspilar sig ein af frumútgáfunum fórnarlambsheilkennisins í bókmenntasögunni sem ég man eftir.  Marta, Marta, sem mæðist í mörgu.  Fórnarlambshlutverkið er eitur í mínum beinum og ég hef séð það myndbirtast í sjálfri mér, í fjölskyldunni og vinkonum í gegnum árin.  Mér hefur fundist við konur oft snöggar að detta í þetta hlutverk.  Kannski af því við vorum svo lengi valdalausar. Að vera fórnarlamb er ákveðin stjórnun.  Ég var ómeðvituð um að ég væri sérfræðingur í fórnarlambsgeiranum langt fram eftir aldri.  Maður var að gera og græja meðan fórnarlambsblóðbunan stóð aftanúr manni.

Að vera fórnarlamb er hræðilegt hlutverk.   Fórnarlambið er algjörlega varnarlaust.  Það hefur ekkert að segja um eigið líf og á endanum gleymir maður því að það er til val.  Val til að geta haft áhrif á aðstæður sínar en vera ekki eins og sektarlambið sem leitt er hljóðlaust til slátrunar. Orðið hetja er mikið notað í dag.  Það er notað um fólk sem ratar í ýmiskonar raunir og lifir þær af.  Mér finnst fórnarlambsbragur á þessu orði.  Við lendum í aðstæðum og við lifum þær af og ef okkur tekst að ná tilfinningalegri fjarlægð á aðstæðurnar og jafnvel að hjálpa öðrum í sömu sporum, þá erum við að gera okkur sjálfum gott og öðrum í leiðinni.  Það er að lifa af með reisn.  Hetjur eru samkvæmt Orðabók Menningarsjóðs: Kappi, hraustmenni, afreksmaður.

Meira seinna. Takk fyrir mig.

                                                                    

Athugasemdir

[bara Maja..., 7.4.2007 kl. 22:02]

Takk sömuleiðis Jenný ! flott skrifað. !!!

[Ragnar Bjarnason, 7.4.2007 kl. 23:00]

Fórnarlamb og hetja já. Nokkuð til í þessu. Kvitt fyrir mig. Gleðilega páska.

[Ásdís Sigurðardóttir, 7.4.2007 kl. 23:09]

Veistu kæra vinkona að ég var eitt sinn fórnarlamb. En ég var fórnarlamb að eigin vali, ákvað að leika svona hlutverk, valdi vitlaust og framkvæmdi allt vitlaust, svo einn góðan veðurdag sagði ég hingað og ekki lengra og ákvað að lifa lífinu fyrir mig og börnin mín og að allt sem ég gerði og segði yrði til góðs fyrir mig og mína. Þetta gekk kannski ekki alveg upp í hvelli en í dag er ég Palli sigurvegari, elska lífið, sjálfa mig og allt mitt fólk og hef fyrirgefið öllum alveg vinstri/hægri og tekið ábyrgð á mínum göllum og bara skilað hinum til föðurhúsanna, ég er kona á uppleið og alsæl.

Bæ ðe vei alkemistinn  er flottur, ertu búin að skoða á síðunni minni allar bækurnar sem ég er með á náttborðinu?

[Katrín Snæhólm Baldursdóttir, 7.4.2007 kl. 23:28]

Hlutverk fórnarlambs getur líka verið heilmikið show stjórnandans. Sem stjórnar hægri vinstri öllum ....en tapar alltaf. Alllir eiga að stíga fórnarlambsins dans. sollis er það stundum.

[Jenný Anna Baldursdóttir, 7.4.2007 kl. 23:32]

Ásdís ég kíkti á bókalistann.  Á þarna nokkrar en langar í bókina um fyrirgefninguna og kanínurnar. Hehe.

Katrín ég segi eimitt að fórnarlambshlutverkið sé öflugt (afspyrnu leiðinlegt) stjórnæki.

[Jenný Anna Baldursdóttir, 8.4.2007 kl. 03:45]

Er mér illa við orðið hetja? Það var ég ekki meðvituð um.  Hef hins vegar illan bifur á sífelldri notkun þess við öll tækifæri.

[SM, 8.4.2007 kl. 09:03]

góðir punktar, maður þekkir þetta.

[Heiða Þórðar, 8.4.2007 kl. 11:29]

Ég gjörsamlega elska þessa bók....

[Heiða B. Heiðars, 8.4.2007 kl. 13:06]

Þið verðið að lesa The Book Thief!

[Hrönn Sigurðardóttir, 8.4.2007 kl. 14:59]

flott hjá þér!!!

[Ásthildur Cesil Þórðardóttir, 8.4.2007 kl. 15:40]

Alkemistinn alltof langt síðan ég las hana, þarf að fara að grafa hana upp aftur.  Takk fyrir að minna mig á hana Jenný mín.