Aftur Þór Saari

Þór Saari bara í aðalhlutverki hér á mínu bloggi í dag.

Hann er svo áberandi maðurinn.

Ef hann er ekki í timburvinnu fyrir ríkisstjórnina úti á Álftanesi þá skammar hann sömu ríkisstjórn af miklum móð úr ræðustól þingsins.

Ég er svo þreytt á búllsjitti að ég ákvað í dag að ég muni ekki þola nema eitt slíkt á dag fram að 19. september.

Þór er búinn með skammtinn sinn hjá mér í bili.

Djöfuls háheilagheit eru þetta.

Og já, ég hélt ekki heldur að ég ætti eftir að skrifa pirringsfærslu um einn af þingmönnum borgarahreyfingarinnar, enda aðdáandi þeirra án atkvæðisréttar.

Amk. ekki svona fljótlega eftir kosningar.

En svo bregðast krosstré sem önnur tré.

Og til að vera nú fullkomlega heiðarleg þá skreið ég undir sófa, amk. í huganum þegar hann hrópaði að stjórninni að þau væru "gungur" og "druslur" af því mér fannst það svo leikrænt eitthvað.

(Já ég veit að Steingrímur J. hefur viðhaft þessi orð einhvern tímann og þau eru ekki smekklegri fyrir það).

Svo tilgerðarlegt eins og svalarræða Mussolínis æfð fyrir framan spegil.

Er ekki hægt að fara fram á einhvers konar málefnalegar umræður á þessum alvarlegu tímum?

Við þurfum á því að halda.

Þessi móðursýkisköst stjórnarandstöðu í ræðustól Alþingis gera nákvæmlega ekkert til að bæta stöðuna.

„Skammist þið ykkar"

Athugasemdir

[Rósa (IP-tala skráð) 18.6.2009 kl. 23:18]

Er til uppskrift af hegðun fólks sem vill mótmæla þessari ánauð sem Icesave-samningurinn er? Hvernig á fólk að haga sér til að hlustað sé á það? Ég vona að ekki mjög margir Íslendingar skríði nú undir sófa og þori ekki að hlusta á mótmæli!!!!!

Má ég þá frekar biðja um móðursýkisköst en Íslendinga-lufsur sem láta traðka á sér úti það endalausa.

[Jenný Anna Baldursdóttir, 18.6.2009 kl. 23:29]

Rósa: Þú meinar að það sé ekki val um neitt nema þetta tvennt sem þú nefnir?

Annað hvort að láta lufsast yfir sig, sem mér vitanlega hefur ekki enn verið gert.  Engin ríkisábyrgð hefur verið samþykkt í þinginu.

Nú eða hinn kosturinn sem þú nefnir: Að horfa upp á stjórnarandstöðuna haga sér eins og fótboltabullur?

Það eru verulega slæmir tveir kostir.

[Þórður Möller (IP-tala skráð) 19.6.2009 kl. 00:01]

Jenný þú styður ríkisstjórnina. Ekki ég og ég er bara alveg að fíla málflutning stjórnarandstöðurnar. Það er best að haga sér eins og trúður til að vinna í sirkus. Steingrímur J og hans líkar voru með samskonar málflutning þegar þeir voru í stjórnarandstöðu. Nú hafa bara orðið hlutverkaskipti á trúðunum.

[Jenný Anna Baldursdóttir, 19.6.2009 kl. 00:06]

Þórður: Ég styð ekki ríkisstjórnina í öllu sem hún gerir áfram og fram eftir.

Ég vil taka málefnalega afstöðu til hvers máls fyrir sig.

Enda skil ég ekki hvernig á að vera hægt að styðja eitthvað nú eða vera á móti e-u áður en maður veit staðreyndir máls.

Þannig er nú það góði maður.

[Jón Valur Jensson, 19.6.2009 kl. 02:06]

Ræðan hans Þórs var frábær og snilldarvel flutt frá A til Ö – og verðskulduð voru þau orð, sem hann lét falla um þá stjórnarþingmenn, sem hygðust samþykkja þetta skelfilega Icesave-mál, sem þjóðin hefði EKKI stofnað til.

[Jón Valur Jensson, 19.6.2009 kl. 02:10]

PS. Hlustið bara á ræðuna og sannfærizt!

[Lúðvík Júlíusson, 19.6.2009 kl. 04:46]

Gott blogg, það væri óskandi að maður fengi málefnalegri umræður.

[Jónína Dúadóttir, 19.6.2009 kl. 06:32]

Jamm... það eru til fleiri aðferðir við að koma skoðunum sínum á framfæri.

[Katrín Snæhólm Baldursdóttir, 19.6.2009 kl. 12:18]

Það er spurning til hvaða ráða er hægt að taka þegar hjúin tvö virðast ekki skilja að almenningur er búinn að fá nóg af leyndrabralli og undirferli.  Þau eru eins og á annari plánetu og virðast ekki heyra neitt. Kannski að þau skilji betur leikræna tjáningu...hvað veit ég???

[Magnús Geir Guðmundsson, 21.6.2009 kl. 00:45]

Leitt að lesa þetta síðasta hjá vinkonu Gurríar, mjög svo já, því þetta eru einfaldlega ósannindi um þau tvö sem um er rætt!