Nú loga eldar

Ofsalega fannst mér vont að horfa og hlusta á Geir Haarde í Kastljósinu áðan.

Hálf sjokkerandi að horfa upp á manninn í þessari bullandi afneitun á ástandinu.

Enn meira sjokkerandi er að átta sig á því að hann virðist trúa því að engum nema Sjálfstæðisflokknum sé treystandi til að leiða okkur út úr ógöngunum.

Svei mér ég vissi ekki hvort ég ætti að gráta hástöfum eða hlæja móðursýkislega.

Ég sá hann líka hjá Sindra í Íslandi í dag.  Sama afneitun í gangi þar, sömu svörin, sömu klisjurnar.

En sko Sindra hann stóð sig með prýði.

Hlýtur að hafa verið tilbreyting fyrir strákinn að fá að takast á við alvöru verkefni.

Sindri - ekki segja mér að það sé ný glansmynd á ferðinni.

Þá hendi ég afruglaranum í vegginn. 

Ég slít vinskap við alla vini mína í Hlíðarhverfinu og tölustafurinn tveir verður afmáður úr heimilisbókhaldinu.

Kapíss?

En að alvörunni aftur.

Tilhugsunin um afneitun forsætisráðherrans er ógnvekjandi.

Allt að því martraðarkennd.

Því á meðan hann þrjóskast við sökkvum við dýpra og dýpra í kreppufenið.

Annars finn ég á mér að þetta er að verða búið.

Jafnvel strax í fyrramálið.

Vonandi kemur áttunin hjá manninum áður en það sýður endanlega uppúr meðal almennings og slys verða á fólki.

Ég ætla rétt að vona það.

Það loga núna eldar við Þjóðleikhúsið og fánar hafa verið dregnir að húni.
Hvað sem það nú þýðir.

Ekkert mælir gegn því að kjósa næsta vetur

Athugasemdir

[Ásdís Sigurðardóttir, 21.1.2009 kl. 21:02]

Ég skil reyndar ekkert í Geir lengur, utanþingsstjórn er það eina sem kemur til greina núna að mínu mati.  Sindi stóð sig alveg frábærlega í kvöld og hlakka ég til að fylgjast með honum á næstu mánuðum, nóg verður örugglega til að spyrja um. 

[Þorsteinn Úlfar Björnsson (IP-tala skráð) 21.1.2009 kl. 21:03]

Já, var hann ekki flottur? Svei, mér þá mér finnst alltaf betur og betur að koma í ljós að GH gerir engan greinarmun á flokknum og þjóðinni. Það sem flokkurinn vill er það sem þjóðin vill. Hann þarf að fara til sálfræðings út af allri þessari afneitun. Það hlýtur að vera mjög erfitt að burðast með hana.

Það eina sem vantaði var að hann segði hvers vegna hann sæti enn. Þeir eru ekki ennþá búnir að klóra yfir allan skítinn og redda vinunum og sjálfum sér.

[Björgvin R. Leifsson, 21.1.2009 kl. 21:07]

Ég frétti að Sindri hefði spurt Geir um hvort ekki mætti afskrifa eitthvað af skuldum fólksins í landinu og hann hefði þá svarað hvað ætti að gera fyrir hina, sem skulda ekki, á móti. Hmm.... ég hélt að allar aðgerðir ríkisstjórnarinnar hingað til hafi einmitt verið hugsaðar fyrir þá, sem eiga.

Sel þetta ekki dýrara en ég keypti - horfi aldrei á Stöð 2 af pólitískum ástæðum.

[Gunnlaugur B Ólafsson, 21.1.2009 kl. 21:10]

Glymur hæst í tómri tunnu datt mér í hug þegar ég hlustaði eftir því hversu fátt var um svör hjá Steingrími J um hvernig hann vildi standa að endurreisn efnahagslífsins. Hvort hann vildi hverfa frá lántöku hjá Alþjóða gjaldeyrissjóðnum og fleira. Jenný, stærsta afneitunin er að halda því fram að þjóðinni standi einhverjir meira spennandi valmöguleikar til boða. Mér finnst þetta flott svigrúm að kjósa næsta vetur og leyfa anda eðlilega um lýðræðislegt ferli við kosningar.

[Sigrún Jónsdóttir, 21.1.2009 kl. 21:28]

Mér leið líka hálfilla að horfa upp á þessa bullandi afneitun og veruleikafirringu.  Hvað þarf til að vekja þetta fólk til meðvitundar um ástand heimilanna?

[Guðmundur Helgason (IP-tala skráð) 21.1.2009 kl. 21:51]

Tókuð þið eftir einu í Kastljóssviðtalinu: undir lokin var Sigmar að spyrja Geir hvort ekki þyrfti að láta einhverja sæta sýnilegri ábyrgð og fara. Geir byrjaði þá með þuluna um að þetta væri allt til skoðunar á milli flokkanna. Sigmar bendir honum þá á að þetta sé búið að vera til skoðunar í þrjá mánuði, hvenær megi eiga von á einhverri niðurstöðu í þessu. Þá kemur Geir með frasa sem inniheldur í raun kjarnann í hans hrokafullu afstöðu: "Við tökum bara þann tíma í það sem okkur hentar."

Maður sat bara og gnísti tönnum....

Og að lokum, þið sem eruð að heyja baráttuna fyrir okkur hin sem ekki komast suður: 

Þakka ykkur frá innstu hjartarótum, fyrir mína hönd, barnanna minna og barnabarna.

OG EKKI GEFAST UPP !!!!

[Ransu, 21.1.2009 kl. 22:09]

 Ég hef enga trú á að Sjálfstæðisflokkurinn horfi úr úr eigin afturenda. Það er hann er greinilega pikkfastur þar.  En Samfylkingin hlýtur að slíta þessu á næstu dögum. 

[Jón Arnar, 21.1.2009 kl. 22:20]

Steingrímur hafði nú ekki mikil svör um lausn vandans þarna í Kastljósinu annað en að skila lánunum myndi redda öllu og hvað gerist þá?

[Lísa Björk Ingólfsdóttir, 21.1.2009 kl. 22:42]

Steingrímur J er að mínu mati eyðilegginarafl VG.  Hann er einfaldlega ekki trúr sínum eigin málstað og tilbúinn í hvað sem er svo lengi sem hann fær stól.  Hann er á móti ESB - en það er allt í gúddí að sænga með ISG, bara til að fá stól.  Maðurinn hefur engin svör - hann er bara bergmál hæstu radda þjóðarinnar og ekkert annað.  Hans stratigía er að lofa því sem fólkið vill án þess að vita nokkuð um það hvernig á að fara að því.  Bara afþví bara!  Man ekki betur en að hann setti kvóta á rollur og beljur þegar hann var Landbúnaðarráðherra.  Til hvers?  Who knows.  Þetta er farið að minna svolítið á slaginn um borgina.  Þú mátt vera forsætisráðherra ef þú vilt vera memm...... í smá stund.

Vonandi kemur hér starfhæf utanþingsstjórn meðan verið er að taka til í flokkum og flokkskerfi landsmanna.  Please - komið með eina svoleiðis.........

[Magnús Geir Guðmundsson, 21.1.2009 kl. 23:00]

"Bylur hátt í tómri tunnu" Gunnlaugur, fara rétt með!

[Brjánn Guðjónsson, 21.1.2009 kl. 23:21]

afneitunin er yndisleg

[Einar Örn Einarsson, 21.1.2009 kl. 23:53]

Hvorugur þeirra, Geir eða Steingrímur eiga að stjórna þessu landi.

Er alveg gáttaður á því að á meðan allt er að sjóða uppúr, situr sá krullinhærði ( eða hann var það) sem fastast í svörtuloftum. Enginn víkur. Bara að skipta um stjórn í seðlabankanum hefði gert mikið fyrir fólkið.

 Verð meira og meira sammála þeim sem tala um utanþingsstjórn.

Það verður í framhaldinu að nota þetta tækifæri til að taka til í öllum skúmaskotum. Hver ríkisstofnunin á fætur annari er gegnsýrð af spillingu og smákóngum og drottningum, sem sitja í skjóli pólitískra ráðninga og venslaráðninga, úr öllum flokkum.

[Katrín Linda Óskarsdóttir, 22.1.2009 kl. 00:05]

Mér fannst Geir standa sig mjög vel í bæði Kastljósinu og Ísland í dag. Ég held að það væru mikil mistök að efna til kosninga núna.  Við verðum að gefa ríkisstjórninni svigrúm í einhverja mánuði og þeir VERÐA að standa sig betur.  Tel að þeir muni á næstu dögum láta "ýmsa" fjúka sbr. yfirmann FME og Davíð. En að kalla yfir okkur vinstri stjórn á þessum tímapunkti er algjört óráð!

[Jenný Anna Baldursdóttir, 22.1.2009 kl. 00:27]

Katrín Linda: Mikil er trú þín kona.

Þið hin: Allir eru með skoðanir á hver sé fínn hver ómögulegur og on and on.

Lýðræðið ræður framvindunni, eru ekki allir sáttir við það?

Gunnlaugur: Þú ert í rauðri peysu.