Frasamaskínur og djúpar pælingar - nú eða hitt þó heldur

 

Ég vil koma því á framfæri að það var ekki ég sem var að stela kjöti á Hellu um helgina.

Ég er nefnilega ekki með bílpróf OG hætt í víninu.  Annars...

En..

Ég var að rökræða við konu áðan um kreppuna og fleira.

Hún svaraði mér á þá leið í miðri samræðu að sú staðreynd að undantekningin sannaði regluna gerði það að verkum að hún hefði rétt fyrir sér.  Einhvern veginn þannig.

En þegar einhver leggur á borð fyrir mig rökleysuna "undantekningin sannar regluna" þá hætti ég að hlusta.

Hvaða fyllibytta kom með þessa röksemd undir morgun þegar heilinn á honum var kominn í áfengisóþol og hættur að virka?

Er ekki staðreyndin frekar hið gangstæða?  Ég hebbði haldið það.

Arg.

Og þessi hérna: "Þeir sem guðirnir elska deyja ungir".

Þetta var stundum sagt við okkur í fjölskyldunni þegar við misstum barn.  Vel meint og allt það en fór algjörlega öfugt ofaní mig.

Er þá guð (ef hann er til) beinlínis eigingjarn?

Finnst honum hundleiðinlegt að fá bara gamalmenni í himnaríki?

Vill hann yngja upp á heilögum lendum sínum?

Eða er þetta tómt kjaftæði og innantóm skyndibitaspeki?

Ædóntnó en ég vildi að fólk talaði meira frá hjartanu og minna eins og sjálfshjálparbók eða frasamaskínur.

En...

Ég hugsa of mikið.  Ég er að reyna að koma mér í gang.  Horfast í augu við lífið á þessum mánudegi eftir jól.

Þarf að gera margt og dagurinn flýgur áfram.

Ég ætla að leggja heilanum á meðan ég geri eitthvað að viti.

Ég geri ekkert hugsandi eins og fífl.

Það er bara svoleiðis.

Með fulla bíla af kjöti

Athugasemdir

[, 5.1.2009 kl. 15:05]

Gott það varst ekki þú - klaufalegt að vera gripinn  Mætti annars halda að þú værir karlmaður - getur ekki hugsað og framkvæmt á sama tíma (enn einn frasinn)  

[Árni Matthíasson , 5.1.2009 kl. 16:00]

Í The Sign of the Four segir Sherlock Holmes við Watson félaga sinn:

I never make exceptions. An exception disproves the rule.

(Orðtakið má afturámóti rekja til þess tíma er proof þýddi "prófar" í ensku, ekki  sönnun. Og þá voru menn alltaf bláderú.)

[M, 5.1.2009 kl. 16:05]

Hvað ég er sammála þér með þessa setningu " þeir sem guðirnir elska.... " Hefur alltaf farið í mínar fínustu. Hvað með hana ömmu mína sálugu sem lifði til rúmlega 90 ?

Næ alltaf að klúðra svona frösum og málsháttum og bjó því bara til einn.

"Því ei það er þá af er á "  Fjölskyldan er enn að pæla hvað þetta þýðir  

[Svanur Gísli Þorkelsson, 5.1.2009 kl. 16:53]

Einhver sagði mér fyrir margt löngu að þetta orðatiltæki ætti rætur sínar að rekja til þeirra tíma þá er mannfórnir voru stundaðar. Þá var gjörvulegasta fólkinu fórnað þegar mikið lá við.

[Hrönn Sigurðardóttir, 5.1.2009 kl. 16:55]

Já - klaufalegt að vera gripinn með fulla bíl af gripum og þekkja jafnvel ekki gripinn

[Jenný Anna Baldursdóttir, 5.1.2009 kl. 17:40]

Hrönn: Góð.  Hehe.

Svanur: Takk fyrir þessa útskrýringu.

Árni: Þetta er fróðlegt.  En þeir sem ekki vita þetta kasta þessari setningu fram sínkt og heilagt það pirrar mig svakalega.  En útskýringin þín skýrir heilmargt.

M: Hahaha.

Dagný: Ég segi það, hefði getað verið ég.  Hugarfarið og kjötgirndin er til staðar og helvítis kreppan gerir heimsókn í sláturhús að næturþeli að aðlandi möguleika.

[Helga Magnúsdóttir, 5.1.2009 kl. 19:14]

Mér hefur alltaf verið sagt að máltækið um að guðirnir elski þá ungu þýði í raun að þeir sem guðirnir elski séu ungir á sál og líkama fram eftir öllu, ekki endilega bundið við aldur í árum talinn.