Allir edrú í boðinu

 

Þetta er skömm og svívirða.  Jólabjórinn hefur hækkað um helming á milli ára.

Hvernig á maður að halda heimili búandi við þetta okurverð á þessari mjög svo nauðsynlegu neysluvöru?

Ha?

Við tökum þennan aftur.

Mikið rosalega er ég glöð að vera ekki í bjór- og vínkaupunum.

Þegar ég drakk sem mest um árið, sko fyrir meðferð þannig að það fari ekkert á milli mála, þá var ansi erfitt að láta líta út fyrir að ég væri hófdrykkjumanneskja farandi alltaf í sama útibú ÁTVR.

Þess vegna fór ég í dragtina, setti hnút í hárið.  Málaði mig eins og motherfucker og fór á hælana.

Svo hríslaðist ég um ríkið og týndi í körfu.

Ég var viss um að það stæði utan á mér að ég væri bjórþambandi gardínubytta sem ætti ekki annars úrkosta en að ná mér í mitt stass sjálf þrátt fyrir að vera skjálfandi á beinunum.

Þess vegna átti ég það til að gera mig upptekna og ábyrgðarfulla í framan, dingla leðurhanskanum léttilega framan í fésið á kassanum og segja frosinni égvinnífjármálageiranumogsýnduértilhlýðilegavirðinguröddu: Ætlarðu svo að gefa mér nótu -vinur.

Sko, kjarni máls er sá að ölkum er held ég nokkuð sama hvað efnið kostar, að minnsta kosti minnist ég þess ekki að hafa velt mér upp úr því.  Það eina sem truflar þá er að verða mögulega uppiskroppa.

Þau sem drekka í hófi mega alveg verða pirruð yfir þessu, ég skil þá, en það er samt ekki endir og upphaf alls hvort sem er hjá þeim.

Niðurstaða: Ég er edrú, ég kaupi ekki áfengi og þeir sem ég þekki gera það í svo litlum mæli að það skiptir ekki höfuðmáli.  Mér gæti því ekki staðið meira á sama.

Ekki frekar en að ég skenkti því þanka hvað bjór og rauðvín kostaði á meðan ég drakk.  Kommon þetta var nauðsynjavara í mínum augum.

Mér er hins vegar ekki sama um drápsverðið á matvöru og mér finnst eins og allt hafi hækkað um MEIRA en helming í þeirri deild frá því í fyrra.

Allir edrú í boðinu.

Fyrir jól, fyrir jól, fyrir jól.

Jólabjórinn hækkaði um allt að helming

Athugasemdir

[Guðríður Hrefna Haraldsdóttir, 22.12.2008 kl. 16:21]

Mér er líka persónulega sama um hækkun á áfengi ... en mér er ekki sama um að hækkunin skuli hafa áhrif á húsnæðislánið mitt til hækkunar! Bara bjánalegt þetta kerfi.

Annars bara jólaknús í bæinn!

[Ibba Sig. (IP-tala skráð) 22.12.2008 kl. 16:24]

Ekki hef ég nú áhyggjur af því hversu dýr dropinn er orðinn. Meiri áhyggjur af matnum enda með marga munna að metta.

Keypti Special K morgunkorn í gær (reyndar setti Ibbi það í körfuna, án þess að kíkja á verðið) og það kostaði um 800 krónur. Já sæll! Ekki langt síðan maður var að borga svona 360 kall fyrir svona pakka. 

[Brjánn Guðjónsson, 22.12.2008 kl. 16:26]

þess vegna er um að gera að brugga sem mest sjálfur. eingöngu til að halda aftur af verðbólgunni, sjáiði  

[Himmalingur, 22.12.2008 kl. 16:40]

Ein regla á mínu heimili: Jól og áramót eru tími allra í fjölskyldunni og þá sérstaklega yndislegu barna okkar, því er vín ekki á boðstólnum á þessum tíma á mínu heimili.

Kveðja á þig Jenný mín! Bara sæt í Moggadruslunni um helgina!

[Sigurður Eðvaldsson (IP-tala skráð) 22.12.2008 kl. 16:53]

Ég held persónulega að flestir líti þessa hækkun neikvæðum augum. Því eins og Fullur bendir réttilega á þá hækkar þessi hækkun húsnæðislánin okkar alveg burtséð hvort maður drekkur eða ei. En ég veit allavega um einn þjóðfélagshóp sem núna sér fram á gósentíð og fagnar þessari hækkun. Það eru landasalar að sjálfsögðu. Nú hætta unglingarnir að hafa efni á áfenginu í ríkinu og versla fremur við landasalana. Það er nefnilega regin misskilningur að með hækkun áfengisverðs sé hægt að draga úr áfengisneyslu þeirra sem ekki er æskilegt að drekki. Staðreyndin er sú að þeir aðilar munu ávalt verða sér út um áfengi með einum eða öðrum hætti. Hækkun á áfengisverði gerir því ríkið aðeins óálitlegri kost.

[Björgvin R. Leifsson, 22.12.2008 kl. 17:09]

Neysla á ólöglegum vímugjöfum mun líka aukast - sem og smygl á bæði áfengi og þessum efnum. Tek undir að hækkunin hefur engin áhrif á drykkjuna.

[Guðný Anna Arnþórsdóttir, 22.12.2008 kl. 22:29]

Skemmtilegur pistill hjá þér, stalla... Mér er ekki sama um allar þessar hækkanir, en hverjum er ekki sama um það?

[Hólmfríður Gestsdóttir (IP-tala skráð) 23.12.2008 kl. 00:14]

Verð að taka undir með Gurrí og fleirum, er hjartanlega sama um hækkun eða lækkun áfengis en er LANGT frá því sama um húsnæðislánið mitt! Mér finnst þetta alveg ótrúlega heimskuleg hækkun á þessum tímapunkti, rétt á meðan verðbólgan er að svíða í burtu eignir heimilanna á fullu. Með það í huga er þetta algerlega óréttlætanleg hækkun. Ekkert flóknara en það.