Sjúskuð sætasta stelpan á ballinu

 

Reiði getur gert mann óbilgjarnan, óréttlátan og það getur verið erfitt að sjá hlutina í skýru ljósi.

Það gæti átt við mig, amk. stundum en ekki núna, best að taka það sérstaklega fram.

Sko, þegar ég heyri um mögulegar útskiptingar í ríkisstjórn þá finnst mér það yfirklór.

Þetta er svona eins og þegar flottasta stelpan á ballinu vaknar út í bæ eftir partí og klastrar yfir augnmálninguna áður en hún fer aftur á djammið.

Niðurstaða: Sæta stelpan er sjúskuð og útlifuð til augnanna og það fær ekkert dulið.

Það er talað um að Þórunni umhverfisráðherra verði skipt út og þá mögulega af því að hún leyfði sér að segja hug sinn um nýjar kosningar.

Halló - Þórunn Sveinbjarnardóttir hefur akkúrat ekkert með bankahrunið að gera.  Hún hefur engu klúðrað eftir fallið og ég held að hún ásamt Jóhönnu Sigurðardóttur sé ein af þeim ráðherrum sem snúa EKKI við í manni maganum þessa dagana.

Á ekki að skipta út bílstjórunum á ráðherrabílunum bara og láta sem það séu öflugar breytingar á ríkisstjórn?

Svo er það íhaldið.

Sama klastrið þar, þó auðvitað sé það fagnaðarefni ef við fáum á sjá á bak Áddna og BB.

Málið er að aðalleikendur bankahrunsins í hugum fólks eru útrásarvíkingar, bankastjórar ríkisbankanna, Davíð Oddsson, nördinn í Fjármálaeftirlitinu, ISG og GHH ásamt auðvitað ráðherra bankamála og fjármála sem samkvæmt þessum orðrómi eru á leiðinni út.

Ég held að almenningur verði ekki ánægður fyrr en hann fær að exa á kjörseðilinn og þá væntanlega við nýtt fólk með nýjar og ferskar hugmyndir um alvöru lýðræði.

Segið svo af ykkur krakkar, þekkið ykkar vitjunartímia.  Er ekki orðið nokkuð ljóst að þið eruð öll rúin trausti?

Gef oss friggings jólagjöf.

Þórunn minn afturendi.  Þessi úrvalskona.  Djísús. (Fyrirgefðu Þráinn).

Falalalalala

 

Uppstokkun fyrir áramót

Athugasemdir

[Hólmdís Hjartardóttir, 14.12.2008 kl. 21:35]

Það er ekki hægt að fara í stóriðju fyrr en Þórunn er farin.

Góð ábending með bílstjórana.....strútar við stýrið

[Einar Áskelsson (IP-tala skráð) 14.12.2008 kl. 21:36]

Inná- og útafskiptingar núna breyta engu, nema inn verði fengnir aðilar utan þings og flokka.  Sem verður ekki.  Eina verkfæri fólksins til að skipta mönnum út og hleypa þeim ekki aftur inn eru kosningar.  Þórunn á ekki sök á hruninu en er samt handónýt sem umhverfisráðherra.

[Haraldur Hansson, 14.12.2008 kl. 21:37]

Einu sinni var skúringakona rekin úr ráðhúsinu fyrir að tala í síma. Sumir þurfa sko að axla ábyrgð. En þú getur huggað þig við að einn kandídat Sjálfstæðisflokksins í ráðherrastól er Guðfinna Bjarnadóttir, af því að hún er kona. Þessi kona sat í stjórn Baugs Group 1998-2003. And I'm not kidding!

[Hólmfríður Gestsdóttir (IP-tala skráð) 14.12.2008 kl. 21:47]

Vá ég trúi því varla að ég hafi ekki kveikt á þessu sjálf með hana Þórunni. Auðvitað er þetta arfavitlaust að láta hana fara ef rétt reynist, ein af fáum ráðherrum sem er raunverulega með einhverja þekkingu á sínu sviði, öfugt við einn samráðherra sinn, nefni engin nöfn en fyrsti stafurinn er Björgvin G. Sigurðsson... Og já, ég fagna fyrst manna ef Árni og BB fara, og þótt fyrr hefði nú verið. Held samt að það sé alveg hárrétt að það verður aldrei nein almennileg tiltekt í Stjórnarráðinu eða neinum stofnunum nema að Sjálftökuflokkurinn fari frá völdum. Held reyndar að Guðfinna sé MUN betri kostur þrátt fyrir setu í stjórnum en þeir sem fyrir eru. Það er reyndar liggur við ALLT betra en þeir.

[Helga Magnúsdóttir, 14.12.2008 kl. 21:56]

Ég fæ nú ekki séð að það breyti neinu hvaða apaköttur situr í hvaða stól. Sagt er að þjóðir fái þá ríkisstjórn sem þær eiga skilið. Hvað í andskotanum höfum við gert af okkur eiginlega?

[Blaðurskjóðan, 14.12.2008 kl. 22:07]

STÓRIÐJA já auðvitað þurfum við að reisa álver núna þegar bíla og flugvélaverksmiðjur loka hver í kapp við aðra..  svo langar mig til að okkur verði sagt hvað vantar marga miljarða til að landsvirkjun géti borgað niður rafmagnið vegna kárahnjúka...  ástæðuna fyrir því að landsvirkjun vill virkja hverja sprænu tel ég að sé að lánin sem þá fást megi nota til að borga af öðrum lánum...

Þórunn er eini ráðherrann sem hefur tafið fyrir þessu bulli

[Ingibjörg Hinriksdóttir, 14.12.2008 kl. 23:34]

Sammála þér Jenný, það þarf að breyta en þessar tiltektir sem RÚV segir frá eru náttúrulega bara uppá punt. Þú orðar þetta best sjálf:

Málið er að aðalleikendur bankahrunsins í hugum fólks eru útrásarvíkingar, bankastjórar ríkisbankanna, Davíð Oddsson, nördinn í Fjármálaeftirlitinu, ISG og GHH ásamt auðvitað ráðherra bankamála og fjármála sem samkvæmt þessum orðrómi eru á leiðinni út.

Ég held að almenningur verði ekki ánægður fyrr en hann fær að exa á kjörseðilinn og þá væntanlega við nýtt fólk með nýjar og ferskar hugmyndir um alvöru lýðræði. 

Í upptalningu þinni gleymir þú hins vegar Framsóknarósómanum sem hefur hlaupið í felur hver á fætur öðrum á undanförnum vikum. Guðni hættur, farinn og tekur ekki lengur þátt í þessu asnalega leikriti og Valgerður búin að láta vita að hún hafi ekki áhuga heldur.

Ég held að Íslendingar þurfi að fara að snúa sér að útrásarvíkingunum, við þurfum að magna seyð svo þeir snúi heim á ný og hafi með sér fullar ferðatöskur af peningum, þeim sömu og þeir höfðu með sér út, og skili þeim til íslensku þjóðarinnar.

[Sigrún Jónsdóttir, 14.12.2008 kl. 23:37]

Plástrar á krabbamein, duga ekki

[Sævar Einarsson, 15.12.2008 kl. 00:35]

Viðurstyggileg athugasemd hjá þér Sigrún Jónsdóttir !

[101 (IP-tala skráð) 15.12.2008 kl. 00:55]

Breytingar nú eru aðeins til þess fallnar að slá ryki í augu fólks.  Láta það halda að það hafi haft einhver áhrif.

Nýir menn með sömu viðhorf og sömu hlýðni breyta engu.

Annað mál ef drengurinn í Fjármálaeftirlitinu færi og inn kæmi einhver með viti.

Meir þörf á að sýna breytingu þar en kojuskitpi í baðstofu ríkisstjórnarinnar.

[Jóna Kolbrún Garðarsdóttir, 15.12.2008 kl. 01:02]

Ég heyrði í kvöld að Árni og Björgvin séu öruggir með tilfærslur í starfi

[Hildur Helga Sigurðardóttir, 15.12.2008 kl. 02:08]

Sé að ég er ekki eini snillinn sem fattaði strax hvað það er hentugt að losa sig við Þórunni Sveinbjarnard. v.þ.a. hún hefur sýnt viðleitni til að standa í ístaðinu gagnvart stóriðjugömmunum.

Svo má auðvitað bara kenna henni um bankahrunið í leiðinni...

[Solveig (IP-tala skráð) 15.12.2008 kl. 02:38]

Sendi eftirfarandi bréf áðan til ISG (og Þórunnar.)
Utanríkisráðherra er eini ráðherrann sem ekki er með netfang.
Sæl  Ingibjörg Sólrún.  
Sendi þetta til aðstoðarmanns þíns þar sem þú býður ekki uppá  netfang til þín beint.
Í fréttum er verið að tala um breytingar á ráðherraskipan. Mig langar að koma eftirfarandi skoðun minni á framfæri og það sem varð til þess að ég skrifa þetta er að ég veit að margir fleiri eru sama sinnis.  Ég var kjósandi Samfylkingarinnar. Ég var ekki ánægð með samstarfið við Sjálfstæðisflokkinn en varði það þó vegna ráðherravals ykkar. Sérstaklega hvað varðar Jóhönnu og Þórunni. Þær eru að margra mati þeir ráðherrar sem standa uppúr hvað varðar heilindi og fagmennsku. Ekki síst hafa þær staðið vörð umþað sem við kjósendur Samfylkingarinnar teljum að þið eigið að standa fyrir, réttindi fólks og réttindi náttúrunnar. Ef það er rétt að til standi að Þórunn víki þá er verið að gera mikil mistök. Þórunn hefur staðið vörð um umhverfisvernd, verið fagleg og hlustað á rök vísindamanna, evidence based, eins og krafist er að ég geri í minni vinnu. Fyrir það hefur hún þurft að berjast gegn (fjár)hagsmunum annarra en ekki gefist upp. Ef hún verður látin fara vegna einhverra hrossakaupahagsmuna mun ég aldrei aftur kjósa Samfylkinguna. Þér er kannski sama um það, hvað er eitt atkvæði. En ég get fullvissað þig um að fleirum finnst það sama.  Fleira hefur reyndar orðið til þess að ég hef orðið afhuga Samfylkingunni eins og skortur á skilningi á stöðu þeirra sem munu horfa á eign sína hverfa á verðtryggingarbálinu eins og ég mun gera. En þarna var kornið sem fyllti mælinn. Peningar eru eitt, náttúra Íslands er annað, hún á að lifa okkur öll af.

[Hlédís, 15.12.2008 kl. 06:33]

Takk, Solveig! Mun senda mjög líkt bréf!

[Villi Asgeirsson, 15.12.2008 kl. 09:16]

Dittó, Jenný Anna.

[Rut Sumarliðadóttir, 15.12.2008 kl. 09:52]

Plástrar á krabbamein, duga ekki, frábær athugasemd Sigrún.

Sólveig og Jenný Anna svo sammála ykkur um þessar frábæru konur. Þó ég sé búin að segja mig úr flokknum í mótmælaskyni.

[halkatla, 15.12.2008 kl. 13:54]

Það segir allt sem segja þarf um Þórunni að "þessu liði" langi að losna við hana...