Ég er grenjuskjóða

Mikið rosalega er ég þakklát Stöð 2 fyrir að senda út mótmælin í beinni.

Ég er ein af þeim sem átti ekki heimangengt og mikið skelfing þótti mér vænt um að geta fylgst með.

Ég er tilfinningamanneskja, ég fór að grenja undir ræðunni hennar Kristínar Helgu.

Annars voru ræðumennirnir hver öðrum flottari.

Hörður Torfa líka.  Hann er náttúrulega snillingur maðurinn að halda þessum mótmælum gangandi ásamt sínu fólki og það sex laugardaga í röð.

En ástæðan fyrir því ég grét er samansafn af mörgu.

Eins og vonbrigðum, reiði, ótta og örvæntingu.  Örvæntingin er verst.  Vegna þess að það er ekki hlustað á fólkið í landinu.  Svo var ég auðvitað smá meyr og flippuð út af öllu þessu frábæra fólki sem stóð og mótmælti.

Ég finn reyndar fyrir von.  Ég held nefnilega að nú sé almenningur á Íslandi að skrifa merkilega sögu.

Ég held að íslenskt samfélag hafi vaknað og áttað sig á að valdið til að breyta er hjá fólkinu falið, við vorum bara búin að gleyma því.

Svo ætla ég að kúvenda í skoðun minni á unga fólkinu sem virkjaði eggjabúskap heimilanna í þágu lýðræðis.

Á meðan að ofbeldi er ekki beitt þá ætla ég ekki að fara að æsa mig yfir hvernig fólk kýs að tjá líðan sína.

Egg eru reyndar helvíti subbuleg og erfið að ná af - en það eru óvenjulegir tímar.  Hvað get ég sagt?

En ég er grenjuskjóða og ég viðurkenni það hér með.

Takk stöð 2.

Þúsundir mótmæla á Austurvelli

Athugasemdir

[Jón Steinar Ragnarsson, 15.11.2008 kl. 16:27]

Og Gei´r Jón og lögguskátarnir hans fengu blóm. Það fannst mér fallegt. Þá komu tár hjá mér.

[Ásthildur Cesil Þórðardóttir, 15.11.2008 kl. 16:36]

Ég er líka hrærð og ánægð. Eins og út úr mínu brjósti talað Jenný mín.

[Hrönn Sigurðardóttir, 15.11.2008 kl. 16:36]

Rás eitt sendi líka beint frá mótmælunum! Það fannst mér flott framtak hjá þeim.

[Jón Steinar Ragnarsson, 15.11.2008 kl. 16:40]

Það var sent út á netinu á báðum miðlum.

[Isis, 15.11.2008 kl. 16:41]

Þetta voru frábær mótmæli... og líklega þau bestu til þessa. Ræðumennirnir voru snilld. Viðar (eða hét hann það ekki? heimspekingurinn.. athyglisbresturinn er að fara mig með hérna..), fyrsti fræðumaður dagsins var alveg spot on og var ræðan hans eins og töluð frá mínu hjarta... væri gaman ef þessi ræða kæmist á netið fyrir þá sem ekki sáu og heyrðu, því hún ætti að verða að skyldulesningu.

Ræðan hennar Kristínar Helgu var ekki verri, játa það að það spruttu fram tár sem ég þó náði að hemja... enda eins gott innan um fleiri þúsund manns... og svo ræðan hans Andra Snæs... þarf að ræða hana eitthvað frekar? verulega góð... væri gaman að sjá hana á prenti líka... segi ekki annað... 

Mér fannst líka gaman að sjá að lögreglan fékk blóm frá mörgum, hvítblóm... tákn friðar. Það var góður leikur...

Síðast en ekki síst þá er ég bara algjörlega sammála þér með Hörð Torfa. Hann er duglegur og á allt props skilið.

Amen!

[Nína S (IP-tala skráð) 15.11.2008 kl. 16:52]

Alveg sammála þér Jenný. Það er frábært að geta séð og horft héðan af Vestfjörðum með fjölmennum mótmælum og ræðuhöldum, fá þannig að taka þátt. Munum. Gleymum ekki. Þegar frá líður. Munum næst þegar við kjósum.

[María Guðmundsdóttir, 15.11.2008 kl. 16:57]

frábært ad geta fylgst med fyrir thá sem ekki komast. flott framtak hjá stød 2.

hafdu góda helgi

[María Kristjánsdóttir, 15.11.2008 kl. 17:06]

Þetta voru flott mólmæli en í hræðilega kulda. Ég er búin að borða heitan hafragraut og nú ætla ég að fá mér kaffi - því mér enn kalt og var þó í kanínuull innst.

Útaf með ríkisstjórnina!

[Heiða B. Heiðars, 15.11.2008 kl. 20:19]

Þetta var allt voða fínt... í sjötta skipti

Hvað ætli það eigi annars að láta þetta duga lengi?

[Lilja Guðrún Þorvaldsdóttir, 15.11.2008 kl. 20:53]

Mikið finnst mér gott að heyra að allt hafi gengið vel, ég komst ekki í samstöðugönguna sem fram fór hér á Akureyri eins og ég hafði gert ráð fyrir, og það sem verra var ég hafði ekki einusinni aðstöðu til að sjá eða heyra af mótmælafundinum. - Mikið væri gott ef hægt væri að setja þessar ræður á netið. - Baráttukveðjur. -

[Greta Björg Úlfsdóttir, 15.11.2008 kl. 22:30]

Lilja Guðrún, þú getur séð fundinn (og okkur Heidi veifa hvítum fánum! á hárréttum stað í viðtalinu við Hörð!) á netinu á visir.is ef þú hfur aðgang að tölvu.

Það var stórkostlegt að vera þarna í dag - þrátt fyrir kulda. Við konur vorum þvílíkt dúðaðar og næstum ekkert kalt. Nú er Heidi heima að saum fleiri fána.

Mætum öll næsta laugardag.

[Hákon Jóhannesson (IP-tala skráð) 16.11.2008 kl. 00:18]

Viðar Þorsteinsson heimspekingur sagði allt sem segja þurfti á þessari stundu og kom einstaklega vel fyrir sig orði, hann sagði m.a.:

...hér er alls ekkert lýðræði - vinir , synir og ættingjar eru ráðnir í ábyrgðarstöður,

... íslensk stjórnvöld hafa ekki umboð fólksins í landinu

Þessi skortur á umboði er einmitt kjarni málsins og er það sem gerir stöðuna í dag svo erfiða og enn erfiðari - verði ekki grundvallarbreyting á. Þessir einstaklingar sem nú sem skipa ráðherrastöður , alþingisþingismenn, bankastjórn Seðlabanka og forstöðumenn fjármálaeftirlits eru rúnir trausti og þurfa nú að  taka pokann sinn og leita að nýjum starfsvettvangi, þar sem viðkomandi geta virkilega orðið að gagni í þjóðfélaginu, en ekki sitja í óþökk fólksins í vonlausri aðstöðu.

Ekkert persónulegt -  það er bara eina færa leiðin í stöðunni og því lengur sem líður verður það sýnilegra.   Með kveðju Hákon