Lygastjórnmál

Nú segir Geir að þeir Guðni hafi talað saman um meirihlutamyndunina í borginni.

En hér þ.e. daginn áður en meirihlutinn var myndaður kannaðist Geir ekki við neitt og það sem meira er, hann taldi samstarf síns flokks og Ólafs F. alls ekki til mistaka, samstarfið hafi bara gengið nokkuð vel.

Undanfarna daga hefur sá einn heljarinnar lygafarsi átt sér stað í kringum borgarmálin þar sem hver stjórnmálamaðurinn af öðrum hefur logið sem best hann getur beint upp í opið fésið á okkur sem heima sitjum og erum fórnarlamb klækjanna og makksins sem fram hefur farið á bak við tjöldin.

Ég hef alltaf haldið að forsætisráðherrar væru okkar allra hvar í flokki sem við stöndum. 

Mér finnst því grábölvað að horfa upp á viðkomandi segja ósatt eins og ekkert sé sjálfsagðara.

Er það bara gott og gilt í stjórnmálum að stunda lygapólitík?

Hvernig á maður að bera virðingu fyrir stjórnmálamönnum þegar þeir sjá ekkert athugavert að ljúga þannig að bunan stendur út úr þeim og þeir blikka ekki auga?

Þeir sjá ekki einu sinni ástæðu til að biðjast afsökunar svona eftirá þegar lygin er orðin öllum ljós.

Það er eins gott að fara að halda dagbók yfir lygimálin svo þau falli ekki í gleymskunnar dá.

Ekki að ég hafi neinar sérstakar ástæður til að hræðast minnisleysi í þessum efnum.

En fyrirfram aðvöruð verð ég fyrirfram vopnuð í kjörklefanum.

Þannig er nú það og ekkert andskotans úje.

Geir ræddi við formann Framsóknarflokksins

Athugasemdir

[Einar Indriðason, 15.8.2008 kl. 11:27]

Svei!  Ekki þér, heldur þeim!  Þetta fylgir starfsheitinu pólitíkus.  Geir er, fyrir mína parta, búinn að missa *allt* traust.  Þessi "stefna" hans í efnahagsmálum, að "gera ekki neitt, og sjá til"..... Hvað þarf að hrista svona fólk mikið, til að það taki við sér?

Margræddar, og marghrósaðar skattalækkanir frá D listanum?  Hverjum gagnast þær best?  Jú, fyrirtækjunum.  Við einstaklingar, okkur er enn haldið undir fjölinni, stigið fast á.  Við erum víst með óendanlega breiðar herðar, og getum tekið óendanlega lengi við.

*ARGH*!!!!!!!

Og þessi .... Farsi.... í borginni?  SVEI!!!

[Þröstur Unnar, 15.8.2008 kl. 11:50]

Æi já, allt í plati.

Annars hefur mig alltaf langað að kyssa Hönnu Birnu og væri alveg til í að plata pínu ef það þyrfti með.

[Þröstur Unnar, 15.8.2008 kl. 11:51]

*******þess þyrfti með.

[Lilja Guðrún Þorvaldsdóttir, 15.8.2008 kl. 13:30]

Það er sem ég segi: Hún er skrítin tík þessi pólitík. - 

Svona "hráskinnaleikur" eins og leikinn er núna, stinkar af nálykt. -

 Enda ekkert skrítið þarna eru uppvakningar komnir á kreik, svo nályktina leggur langar leiðir.