Ég versla í matinn og verð ekki söm upp frá því - GMG

Ég er með flensu og ég á bágt - búhú.  Þá er það frá.

En ég lét ekki smá hita og beinverki aftra mér frá nauðsynlegum búðarferðum í dag, hvert ég æddi og verslaði nauðsynjar.

Nauðsynjar í formi fata og matvöru.

Ég fór í búð og verslaði mér nauðsynlega hluti eins og sokkabuxur og hlýraboli.  Og auðvitað fleira smálegt sem ég nenni ekki að tíunda.

Það sem ég týndi saman lá í einu körfuhorninu og varla sást.

Og ég borgaði tæpar níuþúsund krónur fyrir varninginn.

Og ég small í gólf.

Í matvöruversluninni keypti ég smáræði sem innihélt þrjár máltíðir (fyrir tvo), þvottaefni, mýkingarefni, grænmeti, ávexti, mjólk, safa og svoleiðis.

Reikningurinn var upp á ellefu þúsund krónur!

Hvernig fer barnafólk að því að lifa í þessu landi?  Ekkert í körfunni var lúxus, bara venjuleg matvara og slíkt fyrir þetta míkró heimilishald hér á kærleiksheimilinu.

Ég fer að veiða í matinn niður á höfn og skjóta rjúpur í Heiðmörkinni ef ekkert fer að breytast.  Hvers eigum við að gjalda almenningur í þessu landi?

Þessi rányrkja í formi matarprísa er að gera mig að heitum ESB-sinna.  Mér líður eins og fórnarlambi ræningja þegar ég versla í matinn. Þetta gengur ekki lengur.

En annars bíð ég spennt eftir haustinu.  Ésús hvað ég elska haustið, árstíðaskipti, kertaljós, rökkur, lauf um allar jarðir, stöku storm og bullandi rigningu.

Úff, svona er að fæðast að vetri.  Ég vakna til lífsins þegar degi fer að halla og eflist svo jafnt og þétt fram á vor. 

Ég vaki þegar aðrir sofa.  Jájá.

En sumarið er æði.

 

Athugasemdir

[Edda Agnarsdóttir, 6.8.2008 kl. 00:42]

Ég kem með þér í veiði!

Áttu græjur?

[Jenný Anna Baldursdóttir, 6.8.2008 kl. 00:44]

Nei er að vinna að því að ná mér í hólk, snæri og öngul. Lalalala.

[Ásdís Sigurðardóttir, 6.8.2008 kl. 00:48]

Rómantíkin ríður röftum á haustin,  djö.. er allt orðið dýrt.  Farðu varlega með veiðarfæri, aldrei að vita nema þú setjir í einhvern sem þú ekki vilt.  Knús inn í nóttina

[Guðrún B. (IP-tala skráð) 6.8.2008 kl. 00:50]

Hehe, já dýr eru heimsins gæði.

Knús.

[Brynja skordal, 6.8.2008 kl. 00:55]

iss stelpur ég er með allar græjur bæði fyrir fugla og fisk hvenar eigum við að fara annars læt ég kallinn um þetta hann kemur með bráðina í hús honum finnst sinn matur sem hann veiðir miklu betri en sá sem fæst í kæliborðinu í Hagkaup eða annarstaðar En já þetta er orðið rosalegt maður kaupir smotterí sem dugar valla daginn þegar allt liðið er búið að úða í sig öllu sem til er svei mér þá á vissum aldri eru krakkar botnlausir hér getur alveg farið heilt oststykki og brauð á góðum degi ásamt matartímum þarf að fjárfesta í kistu því hin brann yfir og fylla hana af því sem kallinn veiðir og slátur og fl baka brauð ja hérna hvurslags munnræpa er í mér ætlaði bara að skrifa smá en já manni ofbýður þetta verðlag!!! Annars Jenný Góða nótt

[Bergljót Hreinsdóttir, 6.8.2008 kl. 01:12]

Rányrkja er nákvæmlega rétta orðið....líklega nýr þáttur í neytendlandslaginu ...garðyrkja...rányrkja....vínyrkja....samyrkja......

Maður hættir sér inn í Bónus eða Krónus eða hvað þetta heitir....verslar það sem vantar og verður að snara fram tuttugukalli til að komast heim með varninginn...og það líða bara þrír...fjórir dagar...hviss bamm búmm...önnur ferð nauðsynleg.....þetta er orðið eitt allsherjar bull á þessum klaka hérna.......  

[Anna Margrét Bragadóttir, 6.8.2008 kl. 01:28]

Sammála Beggu

knús knús á þig ;)

[Hrafnhildur Ýr Vilbertsdóttir, 6.8.2008 kl. 02:08]

Eftir að allt verðlag fór úr böndunum ákváðum ég og húsband að fara í massíva ræktun á grænmeti......komum til með að eiga tvö heimili annað með fínum garði þar sem sjálfsþurftarbúskapur verður og já ég ætla meira að segja að fá mér hænur....

[Hulla Dan, 6.8.2008 kl. 03:00]

Æ kjellingin... ertu lasarus... vona ad tad lídi hjá á ofur skømmum tíma.

Ég var barnafólk á Íslandi og flutti til Danmerkur. Hef tad asskoti fínt í dag. Samt á hann Eiki minn byssu og drap stundum saklausa fugla tegar trøngt var i búi. Og vid vorum med hænur! Og vid átum hafragraut 6 sinnum í viku.

Knús

[Jónína Dúadóttir, 6.8.2008 kl. 06:23]

Æi skinnið, góðan bata

[Birna Guðmundsdóttir, 6.8.2008 kl. 07:35]

Vonandi batnar flensan fljótt, svo þú komist niður á höfn að veiða. Fyrir rómantískar konur og svona haust konur eins og þig  www.heillaljos.com og www.lysslottett.dk  kertin skapa stemmingu og gefa lífinu lit

[Linda litla, 6.8.2008 kl. 08:24]

Ég get alveg sagt þér að ó að ég se´bara með eitt barn á framfæri þá finnst mér helv... dýrt að versla í matinn fyrir okkur. Og þetta er víst eitthvað sem að við verðum að sætta okkur við. En endilega láttu mig vita þegar þú ferð í Heiðmörkina..... þú kippir mér kannski með.

Láttu þér batna sem fyrst svo að við getum farið á veiðar. Knús inn í daginn til þín.

[Steingerður Steinarsdóttir, 6.8.2008 kl. 09:19]

Já, þetta er ótrúlegt. Matarreikningurinn hjá mér hefur hækkað um sex þúsund krónur á mánuði í sumar og samt finnst mér ég í engu hafa breytt neysluvenjum mínum.

[Ásthildur Cesil Þórðardóttir, 6.8.2008 kl. 09:22]

Já það er þetta rosalega matarverð.  En ég verð víst að gera eitthvað annað en að veiða í matinn, því ég get einfaldlega ekki drepið flugu hvað þá meir.  Ætli ég verði ekki bara að fara að éta plönturnar mínar  Eða það sem ég klippi af þeim.

[Jóna Á. Gísladóttir, 6.8.2008 kl. 10:51]

Mér skilst að kanínurnar í Öskjuhlíðinni séu orðnar svo aðþrengdar að þær grátbiðji gangandi vegfarendur to put them out of their misery.

Já væna mín. Nóg að bíta og brenna í Öskjuhlíðinni. Senda EV þangað með snærisspotta og vasahníf.

[Elísabet Sigurðardóttir, 6.8.2008 kl. 11:42]

Hérna í heimabæ mínum eru pólverjarnir að veiða sér marhnúta niðri á bryggju.  Ég er mikið að spá í að gera það sama áður en maður verður gjaldþrota.  Við erum sex í heimili þegar við erum öll heima og það er bara hrikalega dýr matarkarfa.  Gengur alls ekki upp.

[Lilja Guðrún Þorvaldsdóttir, 7.8.2008 kl. 01:33]

Hér í heimabæ mínum, höfuðborg Íslands, eru Pólverjarnir eða Litháarnir að veiða sér marhnúta niður á bryggju, og litla ömmustelpan mín 7. ára, hefur fylgst með þeim koma heim dag eftir dag með veiðina og hún hefur svo miklar áhyggjur afþví að þeir lifi þetta ekki af,  þar sem sjórinn við Reykjavíkurhöfnina er svo mengaður. -  Það veit hún þó ung sé, lærði um það í skólanum sínum.