...með þökk fyrir viðskiptin á árinu sem er að líða

Þegar ég sá frétt um rafmagnsreikninga og að Belgi einn hafi borgað sinn með klinki þá brosti ég út í annað.

Á mínum eiginlegu blankárunum var ég jafnframt spennufíkill sem sá ekki ástæðu til að borga RÚV og rafmagn á gjalddaga (tekið fram að það er langt síðan hehemm), borgaði fyrst Visa og svona svo ég gæti haldið áfram að eyða og spenna. 

Þess vegna var ég oft á síðasta snúning þegar Knold og Tott (tveir geðvondir vel miðaldra tvíburar, amk. mjög líkir) komu til að loka.  Og þá fékk ég hland fyrir hjartað og hundskaðist til að borga.  Helst ekki fyrr.  Rosa kikk eða þannig.

Sama gilti með RÚV og ég get ekki sagt mér til málsbóta að ég hafi verið í réttindabaráttu vegna afnotagjaldanna, ónei, ég er með RÚV alla leið alveg hreint.  Minni frestunaráráttu var um að kenna og ég gerðist mjög náinn kunningi lögfræðinganna sem innheimtu fyrir útvarpið, þeir voru farnir að senda mér jólakort og myndir af afkomendunum þarna í lokin. Eða hefðu gert ef þeim hefði dottið það í hug.

En..

Hafið þið pælt í því hversu óréttlátt það er að þeir skuldseigu meðal vor (ég þar lengi meðlimur) mæta miklu vanþakklæti þrátt fyrir þeir haldi uppi heilu fyrirtækjunum með því að borga ekki fyrr en allt er komið í hönk?  Þá er ég að tala um fyrirtæki dúlludúskanna með löffaprófið.  Sjaldan sá ég flottari skrifstofur og einmitt hjá þessum elskum.

Þegar ég hélt uppi nokkrum slíkum með stórum umsvifum í mínusdeildinni var mér aldrei þakkað.  Það var hvæst á mig þegar ég hringdi og mér settir afarkostir.  Algjört "uppmeðhendur" attitjúd hjá þessu liði.  Mér leið eins og.. hvað skal segja.. skuldara. 

Eitt jólakort með þökkum fyrir viðskiptin hefði verið nægt tilefni til að gleðja í mér gaddfreðið skuldahjartað.

Og á endanum sagði ég þeim upp störfum fyrir mína hönd og merkilegt nokk þá sakna ég þeirra ekki rassgat.

Enda allt vaðandi í lögfræðingum í kringum mig.

Súmígæs.

Borgaði rafmagnsreikninginn með einseyringum

Athugasemdir

[Lára Hanna Einarsdóttir, 20.7.2008 kl. 20:57]

Maður reynir að borga fyrir eindaga þótt ekki sé nema til að halda þessu liði EKKI uppi og borga fyrir lífsstílinn. Það er ekkert smáræði sem smurt er á hjá þessum innheimtufyrirtækjum!

Annars hef ég aldrei skilið það fólk sem hefur geð í sér til að stunda þessa starfsemi. 

[Jenný Anna Baldursdóttir, 20.7.2008 kl. 21:02]

Nú er bankinn bara í að borga á réttum tíma.  Annars voru þetta hryllilegir tímar.  Úff.

[Helga Magnúsdóttir, 20.7.2008 kl. 21:05]

Been there, done that. Allt annað líf síðan allt var sett í greiðsluþjónustu. Er hætt að kaupa silkiskyrtur á löffana.

[Kolgrima, 20.7.2008 kl. 21:09]

Góð! Hvað ég hef oft hugsað svona (ekki þetta með jólakortin að vísu, jólakort frá innheimtulögfræðingi myndi gera mig alveg tryllta, ég tala nú ekki um ef í því væri mynd). 

En innheimtulögfræðingar eru svona nútímaútgáfa af púkanum á fjósbitanum. 

[Jónína Dúadóttir, 20.7.2008 kl. 21:47]

Ég man eitthvað svona líka.... með hryllingi

[Steingrímur Helgason, 20.7.2008 kl. 22:01]

Eitt af því örfáa sem að ég viðurkenni í laumi hálfvegis upphátt um auma ríkisstjórnina er feluaðdáun mín á Samfylkíngar-viðskiptaráðherranum, vegna hans innslags í að vilja setja hömlur á gjaldskrá 'innheimtararukkaraskrílsins'.  Náttúrlega stoppuðu 'Sjallarnir' það af í bili, enda man Samfylkíngin ekki fram á litlutá fram að næztu kosníngum.

Fílenzteinar & farízerar, afætur, hræætur & sjakalar, upp til hópa.

[Sigrún Jónsdóttir, 20.7.2008 kl. 22:19]

Ég held því miður að það séu gósentímar framundan hjá innheimtufyrirtækjum

[Lilja Guðrún Þorvaldsdóttir, 20.7.2008 kl. 22:24]

Mér sýnist nú innheimtupúkarnir á fjósbitanum strax vera farnir að fitna, og belgjast út, - enda gósentíð í vændum hjá þeim. 

[Jenný Anna Baldursdóttir, 20.7.2008 kl. 23:34]

Ég held að það sé að koma hrina, vertíð hjá milliliðunum.  Þeir eiga eftir að mala gull.

Takk fyrir innlegg.

[Freyja, 21.7.2008 kl. 14:00]

ég er einmitt ein af þeim sem heldur þessu fólki uppi en ekki bara vegna þess að ég trassa það að borga reikningana mína heldur vegna þess að ég virðist ekki fá nema helminginn af póstinum mínum fólkið fyrir ofan mig fær stórann hluta af því sem vantar en ekki allt ég held að manneskjan sem er að bera út póstinn hjá mér sé að reyna að fokka eitthvað í mér með því að halda eftir póstinum mínum þangað til að ég fæ ítrekun eða intrum

en svo er ég líka svoddan trassari þannig að allt þetta innheimtupakk er að græða heilan helling á mér