Auðvitað blogga ég ekki um þetta

Ég varð náttúrulega skelfingu lostin yfir þessari stormviðvörun og dreif mig í lágvöruverslun til að birgja mig upp.  Svo sá ég reyndar að þessari viðvörun er beint til fólks á suðausturlandi en ég held að Reykjavík sé á suðvestur.  Vona amk. að allir komist í skjól.

En ég fór í hina hefðbundnu innkaupaferð núna áðan og húsband með mér.

Ég skil ekki af hverju ég er að þrjóskast við að hafa manninn með mér.  Hann drepur fyrir mér alla verslunargleðina.

Hann kvartar yfir hillusvipnum títtnefnda sem hann segir að komi á mig þegar ég renni augunum yfir vöruúrval verslunarinnar.  Í morgun var hann erfiðari en vant er, heimtaði að ég skrifaði miða, hvað ég auðvitað gerði og svo fór hann fram á að ég héldi mér við hann.  Af hverju nenni ég þessu?

Ég benti honum á að við værum þó farin að versla í lágvöruverslun að staðaldri, mikil og góð þróun.  Hann stóð með hálfgerðan fýlusvip við innkaupavagninn, amk. held ég það en ég sá hann ekki svo greinilega fyrir vöruhlaðanum í honum.

Hann: Við erum tvö í heimili, hvernig getum við þurft svona mikið af vörum?

Ég: Æi ekki byrja á þessu. Við erum orðin eins og lélegur brandari um steríótýpurnar.  Karl vill ekki kaupa, kerling missir sig í búðum.

Hann: Já en þannig er það í okkar tilfelli.

Ég: Villtu ekki fara í svona smíðabúð eða eitthvað á meðan?

Hann: Smíðabúð, hvað er það og til hvers?

Ég: Æi sem selur nagla og allskonar dót, finnst þér ekki gaman að smíðadóti?

Hann: Er í lagi með þig?  Flýttu þér svo við komumst heim án þess að þurfa að hringja á flutningabíl   og þú bloggar EKKI um þetta samtal.

Ég: Ég elska þig líka Einar minn og auðvitað myndi mér ekki detta til hugar að blogga um þetta.

Reikningurinn hljómaði upp á sóandsó og einhverja aura.

Hann er farinn að vinna hörðum höndum og ég er farin að sauma harðangur og klaustur.

Við erum svo týpísk eitthvað.

Í péessi og fullri einlægni þá held ég að það verði stormur hér á suðvesturhorninu um kvöldmatarleytið.  Þ.e. þegar sumir lesa sumar bloggfærslur skrifaðar af sumum!

Varað við stormi

Athugasemdir

[Hrafnhildur Ýr Vilbertsdóttir, 1.7.2008 kl. 12:58]

HAHAHA....finnst þér ekki gaman af smíðadóti 

......ég gerði þetta um daginn, verslaði inn eins og allir afkomendur væru enn heima en svo er ekki, ég er meira og minna ein heima í sumar...

[Helga Magnúsdóttir, 1.7.2008 kl. 13:10]

Maðurinn er miklu meira búðar svona heldur en ég. Þegar við erum í útlöndum getur hann endalaust farið í búðir, ég sit bara á pöbb á meðan. Um daginn fór maðurinn meira að segja einn í IKEA og keypti svona hitt og þetta smálegt sem honum fannst okkur vanta. Á viðbrögðum vinkvenna og samstarfskvenna virðist hann vera eini maðurinn í heiminum sem fer sjálfviljugur og einn í IKEA.

[María Guðmundsdóttir, 1.7.2008 kl. 13:22]

 killer bara!!! kallgreyid.. "æ naglar og sonna smidadót" thú ert óborganleg. Ég reyndar er hætt thessu,tek kallinn ekki ordid med i neitt svona,bara skemmileggur allt saman med svona "hangi hér og bíd " svip svo nú er thad bara mí mæself end æ...thegar i verslid er farid.

eigdu gódan dag 

[Jóhanna Magnúsar- og Völudóttir , 1.7.2008 kl. 13:40]

Ég skil þetta tótallí með smíðabúðina. Ég fékk einu sinni að kenna á ,,eigin meðali" en þá var ég búin að fara með minn fyrrverandi í öll Moll Ameríku eða svona hér um bil. Þá stakk hann upp á að fara í ,,Home Depot" þar sem hann gat skoðað vélar, sagir og hamra tímunum saman. Mér leiddist ótrúlega mikið og skildi ekki tímann sem hann gat varið í þetta....   Mér finnst best að fara ein í búðir.. en stundum gott að hafa kallinn til að raða í poka, hata að vera í stressi á kassanum í kappi við afgreiðslumanninn/konuna..

[Lára Hanna Einarsdóttir, 1.7.2008 kl. 15:03]

Við látum bara eins og við höfum ekki lesið þetta og Einar verður engu nær.

Annars er ég með verkfærablæti. Skemmtilegustu búðir sem ég fer í eru verkfærabúðir eins og Brynja, Byko og Húsasmiðjan. Var búin að koma mér upp lager af alls konar verkfærum sem ég vissi ekki einu sinni til hvers voru.

En mér leiðist að kaupa í matinn. Mér finnst ekki skemmtilegast að versla í Hagkaup - eins og þeir hömruðu alltaf á.

[Ía Jóhannsdóttir, 1.7.2008 kl. 15:19]

Elsku Jenný mín ég ætlaði nú bara að senda þér smá sudda en ekki STORM....  en ég veit aldrei hvað nornin í mér er áhrifamikil...Úps!

[Elísabet Sigurðardóttir, 1.7.2008 kl. 15:44]

Þú ert snilldin ein. 

Ég mæli með dótabúðunum fyrir karlana, þar get ég geymt minn karl vel og lengi.

[Guðríður Hrefna Haraldsdóttir, 1.7.2008 kl. 17:22]

Flott hjá þér að vera ekkert að blogga um þetta samtal ykkar húsbands, múahahahah! Þið eruð flott. Mér finnst mjög leiðinlegt í búðum og t.d. eftir að IKEA flutti í sveitina hef ég bara farið þangað einu sinni. Lét mig alveg hafa það þrisvar á ári að fara þegar það var á betri stað. Hér á Skaganum er samt allt til alls, nema það vantar Rúmfatalagerinn!

[Sigurður Þór Guðjónsson, 1.7.2008 kl. 18:50]

Mig langar til að hugga þig með því að það er ekki bara spáð smá stormi heldur á eftir honum miklum hlýindum og "góðvirðrii" eins og segir í spánni.