Ég er langt á undan minni samtíð :)

 

Eftir daginn í dag er ég með amk. eitt á hreinu.

Ég er langt á undan minni samtíð.

Í dag var ég að fara yfir gamlar vídeóspólur og datt þá niður á eina frá 1989, frá Mallorca þar sem ég og einn af mínum fjölmörgu eiginmönnum mínum fórum með tvær yngri dæturnar.

Og þær voru krútt.  Ég skrifa meira um það seinna.  Svo litlar og yndislegar, en núna eru þær aðeins hærri í loftinu og yndislegri ef það er mögulegt.

En Jesús minn almáttugur hvað ég er búin að hlægja mig máttlausa.

Að sjálfri mér og öllum sem væfluðust fyrir vídeóvél eiginmannsins.

Hárið sítt að aftan, permanentkrullur og gott ef allir voru ekki með sama heygula háralitinn.

Allir voru með girt upp í heila, þá meina ég þeir sem voru í buxum og pilsum.  Stuttbuxurnar voru girtar upp að brjóstum og skárust upp í júnóvott.

Og gallabuxurnar maður minn, kyrfilega reyrðar að með belti fyrir ofan mittislínu og víðar að ofan og þráðbeinar niður.  Konurnar voru eins og perur í laginu.

Það dásamlega við þetta fyrirkomulag var svo, að allir voru alveg eðlilegir á svipinn, fannst þeir alveg flottir sko, höfðu ekki hugmynd um að eftir 19 ár yrðu þeir skemmtiatriði fyrir alla sem mögulega myndu berja þá augum.

Það er það sem er svo leiðinlegt og í leiðinni frábært, hvað hver tími skilur sig frá öðrum í tísku og tíðaranda.

Ég man eftir að hafa trúað því eins og prestur biblíunni að ég ætti aldrei eftir að fara úr plattaraskónum.  Þessum með uppfyllingu á sóla upp á 15 cm.  Vá hvað ég hafði rangt fyrir mér.

En aftur að vídeóinu.  Ég er búin að sjá að ég er langt á undan minni samtíð.

Ég var ekki girt fyrir ofan miðbaug, og ég var ekki með sítt að aftan.  Gæti sennilega gengið í gegnum miðbæinn í dag í átfitti umrædds árs, en fólk myndi auðvitað halda að ég væri stórbilaður utanbæjarmaður en ég var alls ekki svo slæm.  Alls ekki svo voðalega, skelfingarósköp slæm.

Var reyndar með glataðar permanettkrullur í hárinu og í stuttu pilsi upp á mið læri og alveg ógeðslega góð með þig þarna í sólinni.  En ég kem þokkalega út svona miðað við alla vegfarendur á strandlengjunni þarna um sumarið 1989.  Og svo var ég sorglega ung, ég meina miðað við hvað ég er hryllilega 19 árum eldri núna.

En á strandlengjunni þeirri arna voru reyndar bara útlendingar.  Ég held í þá trú að við Íslendingar höfum verið hipp og kúl, þá sem nú amk. miðað við höfðatölu.

Afneitunin er sterkt og dásamlegt deyfilyf í öllum þrengingum.

Adjö.

Athugasemdir

[Valgerður Sigurðardóttir, 16.6.2008 kl. 00:41]

Skemmtileg færsla Innlitskvitt og fæ ég að vera bloggvinkona þín?

[Jenný Anna Baldursdóttir, 16.6.2008 kl. 00:42]

Að sjálfsögðu.  Ertu búin að leggja inn beiðnina?  Ef svo er þá samþykki ég að sjálfsögðu.

[Valgerður Sigurðardóttir, 16.6.2008 kl. 00:44]

Þúsund þakkir. Les oft og iðulega hjá þér færslurnar

[Jóna Á. Gísladóttir, 16.6.2008 kl. 00:46]

ég er í kasti. Girt upp í júnóvott.. Fær mig til að hugsa um buxur sem eru svo þröngar og vel girtar að það skiptist í miðju.. þarna niðri skiluru.

Ég er að hugsa um að koma í kaffi, sígó og kynningu á myndbandi, til þín á morgun. 

[Einar Örn Einarsson, 16.6.2008 kl. 00:48]

Ég hugsa til baka...Í hverju var ég þetta árið,,,,hvernig var dooið?

Og ég ROÐNA

Takk fyrir góðan vinkil á söguna.

Leynifélagsknús á þig með kremju

[Jenný Anna Baldursdóttir, 16.6.2008 kl. 01:10]

Einar Örn: Sömuleiðis.

Jóna: Æði, ég hlakka til að sjá þig, hringdu í mig.

Valgerður: Innilega velkomin.

[M, 16.6.2008 kl. 01:21]

Camel toe kallast það þegar girt er uppí you know

Farin að sofa í hausinn á mér. Góða nótt

[Edda Agnarsdóttir, 16.6.2008 kl. 01:27]

Ja hérna, ég kann greinilega ekki að gyrða mig!

[Hrafnhildur Ýr Vilbertsdóttir, 16.6.2008 kl. 04:31]

og allir voru eðlilegir á svipinn....ég kafna úr hlátri.......

[Hulla Dan, 16.6.2008 kl. 06:03]

Þú færð mig einhvernegin alltaf til að hugsa... Klukkan er bara 8 hjá mér og ég er djúpt hugsi yfir klæðaburði mínum 1989.
Hlýt bara að hafa verið í einhverju víðu, ég var alltaf ólétt.

Þetta er ekki hollt. S.s að hugsa fyrir hádegi.

Góðan dag á þig...

[Jónína Dúadóttir, 16.6.2008 kl. 06:34]

Góðan dag sprelligosi

[Ía Jóhannsdóttir, 16.6.2008 kl. 06:38]

Tek undir með Hullu Dan þetta er ekki hollt að hugsa svona með morgunsopanum. 1989!  Hvar var ég og í hverju?  Man ekki enda bara búin að drekka einn kaffibolla kemur e.t.v. með þeim þriðja.

Kveðja inn í góðan dag.

[Ester Júlía, 16.6.2008 kl. 06:51]

Skemmtilegt að lesa þetta .  Fór að rifja upp uniformið mitt '89..ég var með aflitað hár og eins og það sé ekki nóg, permanett og hárið var oftar en ekki tekið upp í hliðunum með stórum kömbum (hrollur). Á vídeó tekið 89-90 þar sem að ég er í skærbláum glans SAMFESTING..sko ef ég myndi ganga um götur bæjarins í þessu átfitti þá yrði ég snarlega lögð inn á geðdeild!

[Tína, 16.6.2008 kl. 08:46]

Góðan daginn frábæra kona. Ekki slæm byrjun á degi hjá mér að lesa þessa færslu hjá þér. Drepfyndin að venju.

Knús í daginn og takk fyrir kvittið hjá mér

[Elías Halldór Ágústsson, 16.6.2008 kl. 10:08]

Fyrir 19 árum kom ég með þáverandi kærustu mína til Íslands. Hún var frá Ítalíu en hafði lengi búið í Frakklandi, Þýskalandi og Bretlandi og lært ljósmyndun, listasögu og hönnun. Það fyrsta sem hún spurði þegar hún barði hóp Íslendinga augum var "Why is everyone so trendy?" ("Hvers vegna eru allir hér klæddir samkvæmt nýjustu tísku?")

Nýjabrumið datt þó fljótlega af Íslendingunum þegar hún sá drykkjulætin ... 

[Heiður Þórunn Sverrisdóttir, 16.6.2008 kl. 10:17]

hehe takk fyrir góða sögu ...1989 vá hvernig var ég þá þarf að skoða myndir til að rifja það upp ég var svo mikil strákastelpa að það hálfa hefði verið miklu meira en nóg...

Keðja inn í daginn til þín. 

[Jenný Anna Baldursdóttir, 16.6.2008 kl. 10:26]

Takk fyrir innlitið og kommentin öll.

Elías: Varðandi drykkjulætin þá máttu kíkja á nýjustu færlsuna.