Ísland vinnur Júró

 

Ég er með það á hreinu að Ísland verður ofarlega í Júróvisjón.  Gott ef við vinnum ekki.

Ég er komin með pottþétta leið til að komast að því hvað fellur í kramið og hvað ekki.

Bördí Jennýjarson, þ.e. Gárinn okkar og sonur Jennýjar Unu er með lélegan tónlistarsmekk.

Hann flautar eins og vitfyrtur smali í Austurrísku Ölpunum yfir friggings fréttastefinu á RÚV

Ef mér verður á að spila eðalmúsík hér við hirðina, þá veinar hann af kvölum undir Dylan og Morrison, svo dæmi séu tekin.

Þegar ég hins vegar, í einhverju bríaríi skoðaði myndbönd með sænska, íslenska og danska framlaginu í Júróvisjón, þá söng hann eins og næturgali, dillaði sér og gerði sig til uppi á bókaskápnum, hvar hann hangir löngum stundum.

Og það var þá sem ég fékk hugmynd að ofan.  Ég setti fuglinn í test.  Hann varð hvað væmnastur og tilgerðarlegur undir íslenska laginu.  Hann var allur á iði og söng undir með því sænska, þó merkjanlega minna en því íslenska.  Þegar það danska hljómaði þá reyndi hann að flýja af hólmi.  Hnitaði hringi yfir hausnum á mér og lét eins og það ætti að slátra honum til kvöldverðar.

Svo hef ég tekið stikkprufur hérna, á hin og þessi framlög.  Bördí er mishrifinn.  En íslenska framlagið fær alltaf sömu viðbrögðin, fuglinn verður eins og vankaður unglingur á bítlatónleikum í hvert skipti.

Ég tek fram að ég er ekki hrifin af Jóróvisjónlögum.  En ég elska að fylgjast með öllum sem eru svo intú it, að þeir lifa fyrir þessa merkilegu "keppni" í plebbisma.

Og í morgun neitaði Jenný Una Eriksdóttir að fara í gallabuxur á leikskólann, af því að hún er alvöru prinsessa.

Mamman: En ég er líka prinsessa Jenný og ég fer oft í gallabuxur.

Jenný Una: Nei ég er alvöru prinsessa, þú ert FEMÍN-NISTI

Og barn fór í fallegum kjól á leikskólann.

12 stig barni til handa.

Athugasemdir

[Hrönn Sigurðardóttir, 15.5.2008 kl. 11:14]

Þetta var ekki verri rannsókn en hver önnur og marktæk niðurstaða að auki

Jenný Una er krútt fyrir nú utan það að vera prinsessa

[Jónína Dúadóttir, 15.5.2008 kl. 11:22]

12 af 10 mögulegum handa prinsessunni

[Jóhanna Magnúsar- og Völudóttir , 15.5.2008 kl. 11:45]

Setjum páfagauka í dómnefndina!

Douze points Jenný Una.

[María Guðmundsdóttir, 15.5.2008 kl. 11:47]

marktækt skal thad vera og halelúja bara. àfram Island

                                               

[halkatla, 15.5.2008 kl. 12:36]

ég sagði það fyrir nokkrum vikum að við ættum eftir að vinna, ég er búin að lofa fólki því og allt. Ég er ekki að meina að ég sé bjartsýn eða að lagið sé gott heldur veit ég bara að við vinnum og mér skjátlast ekki um svona lagað. Það er svo einfalt

[Ragnhildur Sverrisdóttir, 15.5.2008 kl. 12:38]

Hún er nú ekkert normal krútt, þessi stelpa!

[Jenný Anna Baldursdóttir, 15.5.2008 kl. 12:43]

Takk stelpur.  Já Ragnhildur hún er súperkrútt stelpan.

[Tiger, 15.5.2008 kl. 20:18]

Ég er á sama máli og fiðurfénaðurinn þinn Jenný. Ótrúlega yndisleg litla útgáfan af þér, eða nei - ekki ótrúlega - hún er bara yndisleg.