Kórónur, pell og pluss

 

Þegar ég var bara ögn, sandkorn á lífsströndinni, sem ég er reyndar enn, kom Noregskonungur ásamt drottningu til Íslands.

Ég hef sennilega verið sex ára.  Það var mætt með mig út í Melaskóla til að berja goðin augum.

Alvöru kóngur og alvöru drottning!  Ég man enn spenninginn og tilhlökkunina sem hríslaðist um mig, enda með kónga og drottningar, prinsessur og prinsa á hreinu úr heimi ævintýrabóka.

Vonbrigðin voru gífurleg.  Maður í borðalögðum búning með húfu á höfðinu og drottningin var ekki með kórónu heldur og ekki var hún hlaðin gulli, konan sú.  Þau voru eins hversdagsleg og hugsast gat.  Ég held að ég hafi misst trúna á ævintýrin þarna í vornepjunni úti í Meló.  Við fórum samt niður í Tjarnargötu og horfðum á þau fara inn í Ráðherrabústaðinn og ekki höfðu þau orðið konunglegri í útliti við fataskiptin.

Þarna hefur örugglega orðið til græðlingur, sem síðan varð að heilum frumskógi.  Þarna fæddist nefnilega andúð mín og antípat á hvers kyns fyrirmennadýrkun.  Guð, takk fyrir það, hver sem þú ert.  Ég hef nefnilega komist að því að kóngar, bæði alvöru og sjálfskipaðir, standa aldrei undir væntingum enda af holdi og blóði eins og afgangurinn af mannkyninu.

Danska kóngafjölskyldan er þó krúttlegust og þolanlegust af öllu þessu eðalborna slekti.  Þórhildur er töffari og þessi ungu hjón Frikki og Mary eru nokkuð kúl.

Ég mun því ekki henda í þau eggjum við komuna til landsins.

Þeim verður hent við önnur og merkilegri tilfelli.

Súmí.

Konungssteinar fá nýja ásýnd

Athugasemdir

[Ásgerður Jóna Flosadóttir, 4.5.2008 kl. 09:54]

Hef svipaðar minningar í huga og þú.  Tíðarandinn breytist og fólkið með, því varla fer ég með ömmustrákinn minn til að berja hið eðalborna fólk augum.

Eigðu góðan dag.

[Jóna Guðmundsdóttir (IP-tala skráð) 4.5.2008 kl. 12:01]

Noregskóngur - já  en með drottningu?  Varla.
Hákon var kóngur 1905 - 57 en hann var ekkill frá ´38.
Ólafur var kóngur 1957 - 91 og var ekkill allan tímann.
Haraldur hefur síðan verið kóngur og Sonja er held ég hress - og þau hafa vafalaust komið en þá hefur þú nú verið búin í Melaskóla?

[Þröstur Unnar, 4.5.2008 kl. 12:10]

Hvað er Pell?

[Ásdís Sigurðardóttir, 4.5.2008 kl. 12:52]

Haraldur kom til Íslands með fríðu föruneyti þegar milli 1965-70 ég var þá í sveit í Hótel Reykjahlíð og fékk að vaska upp og elda með frænkum mínum á hótelinu, heilsaði honum og fleirum fyrirmönnum, voða gaman. Hann fékk bláberjaskyr og nýveiddan silung sem við frændi sóttum snemma nætur út á vatnið. Ógleymanlegur dagur í lífi mínu. 

[Lára Hanna Einarsdóttir, 4.5.2008 kl. 12:58]

Þröstur...
-s, -HK

• dýrt fataefni, upphaflega líklega skinn

silkipell

pell

pell og purpuri skrautleg hefðarklæði, upphaflega purpuralituð skikkja og axlaslá úr skinni (hátíðarbúningur þjóðhöfðingja), síðar líklega e-s konar silkivefnaður

[Þröstur Unnar, 4.5.2008 kl. 13:00]

Vó, taaaakk Lára Hanna.

[Jenný Anna Baldursdóttir, 4.5.2008 kl. 13:01]

Kannski var það Svíakóngur sem kom, man það ekki en kóngur var það.

[Jenný Anna Baldursdóttir, 4.5.2008 kl. 13:02]

Þröstur: Hættu svo að röfla.

[Þröstur Unnar, 4.5.2008 kl. 13:05]

Hvað er röfl?

[Þröstur Unnar, 4.5.2008 kl. 13:05]

*Djók, farinn að mála.

[Birna Dis Vilbertsdóttir (IP-tala skráð) 4.5.2008 kl. 13:10]

Pjattrófan þínGóðan dag

[Jóhanna Magnúsar- og Völudóttir , 4.5.2008 kl. 13:31]

Man alltaf eftir sögunni um prinsessuna sem átti 365 kjóla og stelpunni sem vann í eldhúsinu. Las hana 3650 sinnum fyrir yngri systur mína og svo eflaust fyrir börnin mín síðar. Hún var svona frækorn í mínum huga.

Þekki sjálfa mig það vel að eftir því meiri þörf sem ég hef fyrir ný föt, er ég óánægð með eitthvað annað í lífinu!

Hmm... tengist þetta eitthvað kóngafólksumræðunni? Veit það ekki, en þetta kveikti a.m.k. þetta minni hjá minni.

Knús og takk fyrir að koma með svona skemmtileg efni til að pæla í!