Í gargandi gír

 

Dagur þverbrotinna prinsippa er senn á enda liðinn.  Hann var dásamlegur auðvitað og ævintýrin biðu eftir mér við hvert horn. 

Ég byrjaði og endaði í Hagkaup í Holtagörðum, eftir að hafa verið leidd burt í járnum eftir grun um mögulegan búðarþjófnað.  Ekki alveg, en nærri því.  Við tökum þetta í réttri röð.

Ég skveraði mig til, fór í hálæana, úr þeim aftur, speglaði, greiddi, málaði, skipti um kjól, fór úr honum aftur (búðarferð er biggdíl, þegar maður hefur varla farið út í viku vegna hita).  Ég sættist á dásamlegan kjól sem dró fram massaðan og fagurlimaðan líkamann.  Þegar ég gekk inn í verslunina, stoppuðu allir, hálsar snérust og það heyrðist hvíslað úr öllum áttum; þarna er hún, þarna er hún.  Nokkrir féllu í öngvit.

Ók, taka tvö.  Ég fór í Hagkaup með miða, verslaði eins og motherfucker, og á leiðinni út, pípti á mig í hliðinu.  Í fyrsta sinn á ævinni.  Mér fannst þetta spennandi, enda blásaklaus, til tilbreytingar, og ég spjallaði glaðlega við öryggisverðina sem höfðu nálgast mig ógnandi.  Sá ég glitta í gasbrúsa?  Ók, þetta var misskilningur, konurnar fóru yfir málið og báðu mig afsökunar.  Mér varð litið á húsband.  Hann var rauður í framan, svona vandræðalegur.  Þá rann upp fyrir mér að það er ekki sniðug hugmynd til félagslegs samneytis að láta taka sig á þjófapípinu.  Frrrrusssss!

Ég hundskaðist út í bíl.  Afskaplega glöð og ánægð.  Það fer ekki langri sögu af gleði eiginmannsins, en hva, ég skemmti mér.

En ég vildi bara segja ykkur að ég keypti mér stórar náttbuxur, örugglega í karladeildinni, ég veit það ekki, stórköflóttar og þær eru þægilegar.

En það er óþægilegt að ganga fram hjá spegli.  Mér bregður.  Ég garga.

Okí?

Cry me a river.

Líf mitt er vonderfúll.

Athugasemdir

[Lára Hanna Einarsdóttir, 1.5.2008 kl. 22:29]

Ertu mössuð??? 

Er þér eitthvað að förlast í tískufílingunni. Næst segirðu okkur að þú hafir keypt þér ÚLPU !!! 

[Jenný Anna Baldursdóttir, 1.5.2008 kl. 22:31]

Nei ég er ekki mössuð, en mér fannst það svo flott að skrifa það.  Hehe.

Úlpa, aldregi, aldregi.  Over my dead you know.

[Hrönn Sigurðardóttir, 1.5.2008 kl. 22:48]

Já það lúkkar flott að skrifa mössuð

[Huld S. Ringsted, 1.5.2008 kl. 22:48]

Ég er ekki ennþá búin að fá mér stórköflóttar stórar náttbuxur (örugglega úr karlmannadeildinni) en hef skoðað þær nokkrum sinnum en ég er þó búin að fá mér úlpu af illri nauðsyn

[Ásgerður Jóna Flosadóttir, 1.5.2008 kl. 22:48]

Að fara í búðir er eitthvað sem mér líkar mjög illa. Það þýðir bara að ég verð krónunum fátækari fyrir vikið því ég á það til að kaupa endalaust eitthvað handa  ömmuprinsinn minn eitthvað sem  er algjör óþarfi.  Að láta taka sig á pípinu er algjör hryllingur, lenti í því í New York sem er mín draumaborg árið 1987.  Var á ferðalagi með fjölmiðlafræðinemum Háskóla Íslands og brá mér í búð til að kaupa jólakjóla á eldri dóttur mína og tvær systurdætur mínar.  Fékk ég þessa fína prinsessukjóla á kúk og kanil og greiddi fyrir þá með mínu korti og hélt mína leið.  En viti menn í næstu búð sem ég kom inn Í fór allt að pípa.  En sem betur fer var ég með allar kvittanir sem sönnuðu að borgað hafði verið fyrir kjólana.  En Guð minn góður að lenda í Pípi í New York er ekkert grín.

Ég skil þig Jenný mjög vel.

[María Kristjánsdóttir, 1.5.2008 kl. 22:55]

Mér finnst þetta bara gott á þig-fyrst þú ert að fara í Hagkaup á 1.maí en ekki í gönguna með mér og mínum!

[Jóna Á. Gísladóttir, 1.5.2008 kl. 22:58]

Var opið í Hagkaup!!! Taktu mynd af konu í náttbuxum. Setja á veraldarvefinn.

[Ía Jóhannsdóttir, 1.5.2008 kl. 23:56]

Hehehhehehe tekin í hliðinu með köflóttan náttfatnað!  Nú garga ég, hehehe .... hef sjálf lent í því að vera tekin í hliðinu sárasaklaus auðvitað, en þar sem maður stendur flissandi og lætur grandskoða pokaskjattana standa hinir viðskiptavinirnir með svona aumkunarsvip haldandi höndum þétt að síðunum og hugsa, æ grei konan ætli hún sé með stelsýki hehehehhe .... I love it, eða næstum því... 

[Hrafnhildur Ýr Vilbertsdóttir, 2.5.2008 kl. 00:29]

Ég elska köflóttar náttbuxur.....segi kannski ekki að þær séu smart en andskotanum þægilegri

[Steinn Hafliðason, 2.5.2008 kl. 01:23]

Þú ert snillingur að vanda

[Tiger, 2.5.2008 kl. 02:12]

Hmmm...að vera tekinn í hliðinu hljómar nú ekki mjög spennandi, myndi frekar vera tekinn einhvers staðar annars staðar - þannig séð náttúrulega. Ég skil húsband þitt mjög vel, enda sér fólk sem horfir á svona uppákomur ekkert annað en sekt og ræningjapakk. þegar maður lendir í svona í sakleysi sínu - er maður þegar dæmdur sekur/þjófur af þeim sem horfa á uppákomuna.

Náttbuxurnar hljóma svona frekar eins og framhald af því að hafa verið "tekin" í hliðinu - og verið settur á bakvið rimla - en hugsanlega eru buxurnar samt góðar fyrir hjartað, enda styrkir það  að hrökkva við í tíma og ótíma. Vonandi eru mjög margir speglar í þínum híbýlum elskulegust.. Eigðu yndislegan föstudag og njóttu þess að spranga um á þeim köflóttu á morgun.

[Jónína Dúadóttir, 2.5.2008 kl. 06:20]

Var þjófavörnin kannski að mótmæla stórköflóttu náttbuxunum ?

[Helga skjol, 2.5.2008 kl. 07:17]

Algjör snilld eins og alltaf

Knús

[Birna Dis Vilbertsdóttir (IP-tala skráð) 2.5.2008 kl. 09:32]

Já mynd af náttbuxum með massaðri konunni innan íMagga massi hvað?