Markaðstorg blebbismans

Ég þekki ekki marga sem sem segjast hafa gaman af Evróvisjón.  Þvert á móti, þá virðist ég bara þekkja fólk sem telur þessa keppni mestu plebbaráðstefnu sem til er í músík.  Þar er ég sjálf og mín fjölskylda meðtalin.

En getur verið að við séum öll að fokka með sannleikann, að við séum duldir aðdáendur keppninnar en þorum ekki að viðurkenna það?  Að Dallas heilkennið margfræga vaði uppi?  Við horfum en neitum að viðurkenna það?  Hm...

Ekki ég...

Fyrr á árum sat ég límd yfir Evróvisjón.  Það var áður en heimurinn opnaðist og músík varð aðgengilegri.  Það var eiginlega fatatískan sem ég hafði mestan áhuga á.  Fékk hugmyndir. "Those were the days".

Nú kemst engin plata með tærnar þar sem Evróplatan hefur hælana.  Samt halda allir áfram að þverneita að þeir horfi á keppnina.  Þekki ég þá eintóma kverúlanta sem eru með sjúklegan músíksmekk?  Jeræt. 

S.l. þrjú ár hef ég aðeins horft á tvö framlög, þ.e. Íslands og Svíþjóðar.  Í fyrra var Eki flottur.  Í ár er lagið svo leiðinlegt, uppstillt og fullt tilgerðar að ég fyllist aumingjahrolli.  Ég ætla ekki að kveikja á sjónvarpinu nema til að hlusta á Sigmar tala, því hann er svo launfyndinn andskoti.  Ég kem til með að setja á "mute" á meðan lögin eru flutt.  Það er á hreinu.

Ég ætla að vaða á ættingja og vini og KREFJA þá um sannleikann.  Eru þeir að kaupa Evróvisjónplötuna á bak við mig?  Þekki ég bara laumunerði? 

Má ég þá frekar biðja um Silvíu Nótt!!  Ég er ein af þeim sem elskaði hana og hélt áfram að finnast hún megakrútt, líka eftir að hún setti Ísland í tómt tjón.  Hræsnarar þið sem kusu stelpuna og afneituðu henni svo þegar djókið gekk ekki upp.

Eftir að hafa skrifað þennan pistil hefur sannleikurinn runnið upp fyrir mér.

Það eina góða við Evróvisjón er Gleðibankinn (af því hann var fyrstur) og þulirnir okkar í gegnum tíðina, því þeir hafa verið svo andskoti skemmtilegir að þeir ættu að vera á plötu.

Farin í meðferð dagsins.

Hér er móment sem ég vil ekki gleyma í Evróvisjón 1974

Abba

Evróvisjónáhugi sem aldrei fyrr

Athugasemdir

[Ragnheiður , 13.3.2008 kl. 09:29]

Ég horfi alveg á þetta ef ég er ekki í vinnunni, hef verið mörg undanfarin ár í vinnunni þegar þetta er sýnt. Mér finnst gaman að þessu. Og hana, þá þekkirðu einn. Ég fer samt ekkert að gráta (voðalega) ef ég missi af þessu.

[Jenný Anna Baldursdóttir, 13.3.2008 kl. 09:31]

Ragga: Einn, híhí er að telja.

[Gísli Baldvinsson (IP-tala skráð) 13.3.2008 kl. 10:08]

Hvor þulurinn var betri...Kolla  Halldórs eða Gísli Marteinn?  Þau sömdu og fluttu svo mun betri lög síðar. En Júróið kom þeim á kortið.

[Huld S. Ringsted, 13.3.2008 kl. 10:25]

Já Jenný, einu sinni var gaman að horfa á Eurovision en ekki lengur, dætur mínar fylgjast með þessu af miklum áhuga en ég er yfirleitt eitthvað annað að bardúsa á meðan.

Hvað varðar plötuna, það er mikið búið að suða um það hér að kaupa hana en einhvern veginn hef ég náð því hingað til að skipta um umræðuefni, mig langar ekki að hafa þessi lög í botni hér alla daga

[Markús frá Djúpalæk, 13.3.2008 kl. 10:26]

Ég er yfirlýstur Eurovision nörd. Ég fíla þessa keppni í ræmur, en ég sakna svona hallærislegra keppnismyndbanda sem sýna náttúrufegurð keppnislandsins - nú eru bara uppstoppaðir kalkúnar á sviði og eistar í sjóræningjabúningum.

[Dísa Dóra, 13.3.2008 kl. 10:37]

Ekki græt ég nú ef ég missi af þessu en verð að viðurkenna að mér finnst nú samt lúmskt gaman af þessu - tja nema svona kannski allra síðust árin - ætli það séu merki um háan aldur??

Gleymi ALDREI þegar ABBA vann og þessi hljómsveit heillaði mig frá upphafi og hefur verið mitt uppáhald síðan

[Hildigunnur Rúnarsdóttir, 13.3.2008 kl. 10:37]

Við höldum alltaf júróvisjónpartí en yfirleitt er enginn að horfa á lögin. Glápum á stigagjöfina.

Mér finnst reyndar alltaf kynningarlagið best...

[Jóna Á. Gísladóttir, 13.3.2008 kl. 10:46]

Eurovision er eins nauðsynlegur partur af lífinu og árstíðarnar. Bara möst. Ég hef ekki verið nógu dugleg að kaupa mér Eurovision diskana.

Ég horfði á ABBA myndbandið og hárin risu á handleggjunum á mér að nostalgíu-vellíðunartilfinningu. Meira hvað þetta fólk lagði heiminn að fótum sér.

[Helga Magnúsdóttir, 13.3.2008 kl. 11:00]

Í minni fjölskyldu voru alltaf haldin Eurovision-partí þar sem börnin bjuggu til kjörseðla fyrir alla til að velja besta lagið, giska á hvar Ísland lenti í röðinni og svoleiðis. Svaka spenningur hver væri getspakastur. Nú eru börnin orðin stór og nenna þessu ekki lengur og þá nenni ég ekki að horfa á Eurovision. Sakna þessara partía samt smá.

[M, 13.3.2008 kl. 11:11]

Hef lúmskt gaman af svona keppni og horfi alltaf á.  Það er alveg merkilegt hvað þessi lög síast inní kollinn á manni. Raula með lögum frá 1974 til dagsins í dag.  Númer hvað er ég í eurovisionnördalistanum ?

[Markús frá Djúpalæk, 13.3.2008 kl. 11:13]

Já, á þessum tíma var líka mikið lagt í. Hljómsveitir sem ætluðu að meika það fóru í Eurovision. Meira að segja fólk eins og Cliff Richard, Olivia Newton-John, Lulu og Julio Iglesias kepptu í þessu. Svo breyttist eiginlega allt eins og hendi væri veifað þegar MTV varð til. Þá varð til grundvöllur fyrir flytjendur að koma tónlist sinni á framfæri með nýjum og öflugum hætti. Menn voru meira að segja að velta því fyrir í alvöru að leggja keppnina af. Það má segja að símakosningin, þeas bein þátttaka áhorfenda heima í stofu hafi blásið nýju lífi í Eurovision. Svo er hún alltaf að þróast, eins og núna eru tvær undankeppnir því það eru bara 5 þjóðir öruggar á úrslitakvöldinu, Bretland, Frakkland, Þýskaland og Spánn ásamt sigurvegara síðasta árs Serbíu. Tíu þjóðir komast áfram úr hvorri undankeppni og þeim hefur verið stillt upp þannig að minni hætta verði á nágranna og vinaþjóðakosningu en verið hefur. Ísland keppir á seinna undanúrslitakvöldinu 22. maí og mætir þar m.a. Danmörku, Hvíta-Rússlandi, Tyrklandi og Albaníu. Aserbadjsan og San Marino eru að taka þátt í fyrsta skipti í ár og keppa á fyrra kvöldinu. Við skulum vona að þetta blási nýju lífi í keppnina, ekki veitir af.

[Brjánn Guðjónsson, 13.3.2008 kl. 11:34]

ég held að þorri fólks sitji ekki límt yfir þessu. fólk kemur gjarnan saman í júrósamkvæmum. þótt kveikt sé á sjónvarpinu, er það í raun bara mallandi í bakgrunni. fólk situr og kjaftar, eins og fólk gerir gjarnan í samkvæmum. síðan þagna allir og hlusta á íslenska lagið. halda svo áfram að kjafta saman, þá um frammistöðu íslands. kannski ein og ein hræða sem raunverulega er að fylgjast með keppninni.

[Ía Jóhannsdóttir, 13.3.2008 kl. 11:37]

Hér risu hárin og sælutilfinning hríslaðist um mig alla og augun flutu í tárum.  Mér er svo skítsama um þetta Júóvisíon að það hálfa væri nóg.  En ABBA voru flottust, ég meina það.  Sá húsið hennar Anne Frid úr fjarðlægð þegar ég sigldi á Göte-Canal fyrir rétt rúmu ári.  Býr glæsilega pían.           Sástu MamaMia í London Jenný?  

 Flottur stjörnugítarinn tala nú ekki um Napoleon.   

[Guðríður Hrefna Haraldsdóttir, 13.3.2008 kl. 12:52]

Áhuginn hefur minnkað með árunum hjá mér, viðurkenni það alveg. Líklega vegna slaks gengis íslensku laganna. Klíkuskapur ríður röftum þarna og smekklausir Evrópubúar kunna ekki að meta þessi klikkaðislega góðu lög sem við höfum sent í gegnum tíðina. Var t.d. viss um að Selma kæmist áfram, líka Eiríkur og fleiri og fleiri. Norrænu þættirnir (með Eirík f. Íslands hönd) þar sem lögin eru krufin til mergjar eru mikil snilld, eiginlega bara skemmtilegri en keppnin sjálf.

[Ásthildur Cesil Þórðardóttir, 13.3.2008 kl. 13:05]

Ég hef gaman af að horfa á Júróvisjón.  Mér finnst þetta skemmtilegt efni og ég fylgist líka spennt með úrslitunum.  Ég er ánægð með lagið sem fer út í ár.  En besta júróvisjónlagið er náttúrlega spaugstofulagið; Þetta er júróvisjón lag, ekta júróvisjón lag....

[Ásthildur Cesil Þórðardóttir, 13.3.2008 kl. 13:06]

Ergo ég er plebbi

[Jenný Anna Baldursdóttir, 13.3.2008 kl. 13:34]

Elsku plebbarnir mínir, hehe, þið sem horfið á Júró, góða skemmtun, þið sem hlustið á þulinn, ennþá betri skemmtun

Gurrí: Sammála um að norrænu þættirnir með Eika og félgöum eru ómissandi.  Á þá horfi ég alltaf.

[Edda Agnarsdóttir, 13.3.2008 kl. 13:44]

Amen

Á þetta sameiginlegt með þér hvað varðar föt, útlit  og skrautti í kringum keppnina.

[Markús frá Djúpalæk, 13.3.2008 kl. 14:40]

Nördí nörd. Ég held að norrænu þættirnir verði blásnir af þetta árið.

[Laufey Ólafsdóttir, 13.3.2008 kl. 16:22]

Ég hafði húmor fyrir eurovision á meðan allir sungu á sínu tungumáli en núna er djókið alveg runnið í sandinn. Allt eins. Keppnin er best á mute enda eru tískuundrin sem þar finnast efni í mastersritgerð og njóta sín betur þegar eyrunum er hlíft.

Kv. Fúll á móti sem ekki kaupir diskinn  

[Eyrún Gísladóttir (IP-tala skráð) 13.3.2008 kl. 23:18]

Já ég er sammála þér Jenný eruovision er svo hrútleiðinlegt( samt mæti ég nú alltaf í eurovision partíið)en fer ekkert leint með hvað mér finst um þessa keppni er bara að hitta hópinn.