Af lifrarpylsum og fataleppum

Tarammtammtata!

Það hefur fallið dómur í máli konu á sjötugsaldri sem gerðist sek um að stela tveimur bolum og einu pilsi í Markaðstorgi Kringlunnar, að verðmæti 1970 krónur.  Konan hlaut mánaðarlangt skilorðsbundið fangelsi fyrir athæfið.

Það eru engin smámál til þegar Héraðsdómur Reykjavíkur er annars vegar.  Bara svo það sé á hreinu.

Því í dag á að dómfesta "Stóra lifrarpylsumálið" í Héraðsdómi, þar sem heimilislaus maður er færður fyrir dóm vegna lifrarpylsukepps sem hann gerði tilraun til að næla sér í,  til matar.  Verslunareigandinn hefur ekki kært stuldinn, lifrarpylsan komst óétin í hillu verslunarinnar og hefur örugglega verið seld einhverjum velmegandi viðskiptavini til átu. 

En þjóð sem hefur sent sauða- og snærisþjófa til vistunar á Brimarhólm í fortíðinni, getur auðvitað ekki verið að gera lítið úr sér og sleppa lifrarpylsumanninum, enda mikið í húfi.

Á Íslandi eiga allir nefnilega nóg að borða.

Eða er það ekki?

P.s. Bendi á pistil Ólínu Þorvarðardóttur um lifrapylsumálið ógurlega en það má lesa hér.

Skilorðsbundið fangelsi fyrir búðarhnupl

Athugasemdir

[Bjarndís Helena Mitchell, 10.12.2007 kl. 11:51]

Uss og hneyksl. Þvílík fásinna og orka sem fer í þetta mál. Þetta minnir mig bara á Afríku! Nema það að þar er hitastigið mannúðlegra á þessum árstíma.

[Kolgrima, 10.12.2007 kl. 11:59]

Ef ráðist er á mann, verður hann að kæra. Annars gerir lögreglan ekkert í því nema viðkomandi sé stunginn, skotinn eða dauður. Jafnvel þótt bæði lögregla og sjúkrabíll séu kölluð til.

Þó að lögregla sé kölluð til vegna heimilisofbeldis og þarf að fjarlægja mann frá grátandi börnum og (lú)barinni eiginkonu, er ekkert í því gert og málið fer ekki fyrir dóm.   

En þegar heimilislaus maður stelur lifrarpylsu og lögreglan fréttir af því nánast af tilviljun (af því að eigandinn kærir ekki einu sinni), þá fer málið fyrir dóm?

[Ásthildur Cesil Þórðardóttir, 10.12.2007 kl. 12:35]

Ég er svo sammála ykkur í dag skammast ég mín fyrir að vera íslendingur.  Ef eitthvað er lúalegt þá er það einmitt svona mál.  Ég hefði gefið manninum lyfrapylsuna, ef ég hefði verið þarna innanbúðar, hefði borgað hana sjálf úr eigin vasa.  En allt það sem á eftir kom, er hreinasta skömm.  Nú þyrftu bloggheimar að loga yfir þessu.  Það virðist vera tekið tillit til þess, ef bloggheimar loga yfir einhverju, þá koma fréttamenn og þáttastjórnendur og fara að spyrja óþægilegra spurninga, en hefur einhver heyrt eitthvað píp um þetta mál, nema einu sinni í Fréttablaðinu ? Þegar stórt er spurt........

[Jónína Dúadóttir, 10.12.2007 kl. 12:37]

En af hverju fer þetta lifrarpylsumál þá alla leið í dóm ? Þurfti ekki verslunareigandinn að kæra ? Ekki getur lögreglan tekið upp hjá sjálfri sér að kæra manninn eða hvað ? Ég skil ekki.....

[Lára Hanna Einarsdóttir, 10.12.2007 kl. 13:18]

Hvað ætli þetta rugl kosti okkur skattgreiðendur andvirði margra lifrarpylsupakkninga?

[Stefán (IP-tala skráð) 10.12.2007 kl. 13:45]

Íslenska dómarastéttin virðist alltaf ráðast mest á garðinn þar sem hann er allra lægstur, en sleppa svo aðalkrimmunum, þeim allra stærstu. Ég sem Íslendingur stórskammast mín fyrir hina siðblindu íslensku dómarastétt.  

[Kristín Katla Árnadóttir, 10.12.2007 kl. 14:28]

Ég er svo sammála henni Ásthildi.

[Blómið, 10.12.2007 kl. 15:03]

Þetta er bara því líkt rugl að maður á ekki orð yfir þessu lifrarpylsumáli

[Jenný Anna Baldursdóttir, 10.12.2007 kl. 15:05]

Stefán: Þarna er í raun ekki við dómara að sakast, heldur þann sem ákærir. 

Lára Hanna: Í stóru málunum skipta peningar engu máli.

Auðvitað er það stórundarlegt að það skuli vera lögð áhersla á að láta dómtaka þetta mál, meðan alvarleg ofbeldismál fara áfram aðeins og þolandinn kærir.  Alveg með ólíkindum.