IMELDU MARKOSAR HEILKENNIÐ

Ég elska skó, sérstaklega háhælur.  Ég er í fjölskyldu sem er brjáluð í skó.  Systurnar mínar sex eru allar meira og minna skótrylltar.  Í gegnum árin höfum við haft vöruskipti í skóm.  Ágirnumst alltaf fótabúnað hvor annarrar og höfum lagt heilmikið á okkur til að ná honum af hvor annarri..  Sama máli gegnir með dætur mínar.  Skór eru uppáhalds.  Maysan mín sem skildi eftir afganginn af fötunum sínum hjá mér (eftir að hafa selt góðan hluta þeirra áður en hún flutti út) er með stóran kassa afgangs af skóm í geymslunni hjá mér.  Ætli þetta sé eitthvað sem Erfðagreining ætti að rannsaka? 

Ég á hóp af hælaháum.  Rosaflottum og nánast ónotuðum.  Ég veit ekki hvað er að gerast með mig en ég er meira og minna alltaf í sömu skónum núorðið.  Þe. svona fimm pör í gangi og engar háhælur.  Er ég orðin gömul?  Get ég ekki gengið eins lengur létt á fæti eins og það sé ekki stórmál að vera á pinnum?  Að það sé bara asskoti þægilegt?  Nógu vön er ég enda með meirapróf í að klæða mig til ólífis.  Ég held að ég viti núna hvar "skóinn kreppir".  Tilfellunum til að klæðast fótabúnaði dauðans hefur fækkað.  Ég er ekki lengur í háhælubransanum.  Ég er orðin svo svakalega dómestikk.  Núna sit ég með flottu skóna, strýk þeim og legg þá undir vangann en skelli mér svo í einhverja þægilega og tekst á við lífið.  Tímarnir eru svo sannarlega breyttir. 

Athugasemdir

[Laufey Ólafsdóttir, 23.6.2007 kl. 12:58]

Ég held þetta sé líka þolinmæðispursmál. Persónulega verð ég þreytt við tilhugsunina um að vera í óþægilegum skóm og lenda svo í að labba heim. Áður fyrr hugsaði ég aldrei svo langt. Þetta er svipað með karlmenn. Áður var nóg að þeir litu vel út núna eru þægindin í fyrirrúmi

[Hrönn Sigurðardóttir, 23.6.2007 kl. 13:17]

hehehehehe - ég er á sömu línu og Laufey....

....hefði ekki getað sagt það betur

[Björg K. Sigurðardóttir, 23.6.2007 kl. 13:22]

Uhh, ég er bara að spá...

Skórinn á myndinni, er ætlast til að það sé labbað í honum eða er þetta bara svona puntskór???

[Jenný Anna Baldursdóttir, 23.6.2007 kl. 13:26]

Björg er í lagi heima hjá þér???? Puntskór?  Hm.. kona er hneyksluð á vankunnáttu þinni í skóheimum.  Auðvitað eru þetta "gönguskór" eftir kvöldmat.  Hehe

[Björg K. Sigurðardóttir, 23.6.2007 kl. 13:37]

Hehe, já gönguskór sem gera konur örugglega að öryrkjum eftir kvöldgönguna.

[Ásdís Sigurðardóttir, 23.6.2007 kl. 13:56]

Setjum Geir Ólafs á hæla og sjáum hvað gerist. Það minnkar kannsi í honum bjánagangurinn. Annars fékk ég þetta skósyndrom fyrir stuttu. Málið er að ég nota 42 (ekki segja neinum) og hér áður fyrr þurftu að sérpanta á mig frá Bruno Magli, Stenar Waage sá um það, en svo komu stórir skór og mín tók aldeilis gleði sína. Húsabandið á núna bara lítið horn í skóskápnum en líka flottustu kelluna í bænum   skór eru statemnt

[Hrönn Sigurðardóttir, 23.6.2007 kl. 18:47]

vó, ég segi það nú líka Björg! Ertu utan af landi eða hvað?

[Jóna Á. Gísladóttir, 23.6.2007 kl. 19:02]

Ég fékk skósýkina fyrir svona 5 árum síðan og hún fer versnandi. Bretinn hleypur við fót fram hjá öllum skó-útstillingagluggum með mig í eftirdragi. alltaf að spara þessi elska.