OG HVAÐ Á BARNIÐ AÐ HEITA???

..mynduð þið vilja heita einhverju eftirfarandi nafna (en ég tek fram að öll þessi nöfn hafa verið notuð á Íslandi)??

Almannagjáa.. Sautjándajúnía.. Giljá... Lofthæna... Marsibil..  Kapítóla.. Magnhildur ... Ljóselfa.. Ljótunn.. Ljót (ofbeldi á barni)

Eða þessum..

Jósefína.. Jenssína .. Guðmundína.. Sigurðína.. Fjóla.. Rósamunda .. Lúpína (okokok gæti verið)

Allt stelpunöfn, hef ekki asnaleg karlanöfn á hraðbergi nema ef vera skyldi Skæringur sem ég gæti aldrei talað við öðruvísi en að hlægja eins og fífl og Meyvant sem mér finnst nú ekkert annað en vond álög foreldra með lélegan húmor,  sem dæma barnið til einlífis.  Þið mættuð endilega stinga að mér "skemmtilegum" nöfnum krakkar í athugasemdakerfið en þar sem von er á barnabarni þá væri gott að fá hugmyndir.  Hm...

Síjúgæs

Athugasemdir

[Guðríður Hrefna Haraldsdóttir, 14.6.2007 kl. 12:58]

Sting upp á þessum nöfnum á barnabarnið þitt:  Dimmblá Heiðlóa og Ljótur Bambi. Frumlegt, ekki satt? Þessi nöfn eru leyfð.

Annars er Marsibil nokkuð algengt nafn og ekki mikið framandi við það. Takk fyrir að setja ekki nafnið mitt, fannst nóg um að það skyldi vera valið eitt ljótasta íslenska nafnið á sjálfu Barnalandi.

[Jenný Anna Baldursdóttir, 14.6.2007 kl. 13:02]

Ég hef aldrei getað vanist Marsibil.  Heyrði það fyrst í einni af Kötlubókum Ragnheiðar Jónsdóttur og fannst það hroði.  Það breytist ekki.

Kunni ekki við að setja nafnið þitt, vildi ekki að þú brotnaðir endanlega niður. Hehe

[bingo (IP-tala skráð) 14.6.2007 kl. 13:33]

 Klamidía...reyndar er hún spönsk, en mér svelgdist á eigin munnvatni þegar hún kynnti sig.

[Edda Agnarsdóttir, 14.6.2007 kl. 13:37]

Þetta fer nú allt eftir tilfinningum og smekk. Ein hér á Skaga átti að heita Villimey og heitir reyndar en var skírð Kristín Mist vegna þess að fyrra nafnið fékkst ekki skýrt. Hins vegar ef við höldum okkur við Ísfólkið að þá voru fullt af flottum nöfnum í þeim sögum ( ég held ég hafi lesið 10 eða 11 fyrst bækurnar sumarið 1982 - vann í sjoppu það sumar eftir kennslu um veturinn og flutti svo til DK) eins og Viljar og það er einn frændi minn líka hér á Skaga sem heitir það. Svo get ég nú haldið lengi áfram, dóttir vinkonu minnar heitir Jósefine í DK og mér finnst það nafn einstaklega kjút og rómantískt. Mamma mín heitir Jensey Jörgína - viltu meir?

Svo á ég ágætan sannsögulegan brandara um Guðríðar nafnið en segi hann ekki á prenti, svo að þú og Guðríður verðið að koma í heimsókn eða hittast á kaffihúsinu Skrúði hér á Skaga!

[Kristín Katla Árnadóttir, 14.6.2007 kl. 13:46]

Hvernig finnst þér nöfnin....Villimey l eða Líf   og Margit eða bara Mjallhvít,

[Guðríður Hrefna Haraldsdóttir, 14.6.2007 kl. 13:46]

Jenný, við bara beint í Skrúðgarðinn að hitta Eddu!

Ég gerði einu sinni nafnabók, litla og sæta fyrir Vikuna. Í henni má finna m.a.:

Úr gömlum kirkjubókum: Grómundur, Guðgils, Hyppolyte, Pelagónía, Óljóna, Gerilíus, Hjálmhlíf, Fástína, Björnósk, Bjarnaþórey, Jólavísa, Siguröld. 

Fékk frábæra hjálp frá Mannanafnanefnd og Hagstofunni Kona í Mannan.nefnd sagðist lítið sjá því til fyrirstöðu að nafnið Villimey fengist samþykkt. Prestur getur ekki neitað ef nefndin samþykkir. Áhrif Ísfólksins eru mikil. Bara ein kona hét Líf áður en það kom til sögunnar og þegar ég gerði litlu bókina voru þær yfir 300, flestar sem 2. eiginnafn.

[halkatla, 14.6.2007 kl. 13:57]

ég held uppá gamaldags nöfn úr Landnámu, einsog t.d Gráfríður og Loðmundur. Ég held að þau komi vel út á börnum þegar þau eru orðin háöldruð annars er Meyvant alveg sjúklegt nafn, en Marsibil finnst mér dáldið töff. Dagmar er síðan í alvörunni flott nafn, en það tekur mörg ár að venjast því. Hildigunnur er mitt uppáhalds kvenmannsnafn....

annars dýrka ég líka svona nafnapælingar, en ég er á hraðferð og ætlaði bara að skilja eftir kveðju - ég var sko að fá netið aftur eftir flutninga en kemst ekki inná mitt eigið stjórnborð

[Sigrún Magnúsdóttir (IP-tala skráð) 14.6.2007 kl. 13:57]

Fjóla? Finnst þér það asnalegt? Mér finnst það svo sætt nafn. Í sömu deild og Sóley. Þá finnst mér Fjólmundur verra. Svo þekki ég eina æðislega Jensínu svo ég get ekki verið alveg sammála þér þar... hér eru nokkur sem ég sá um daginn í karladeildinni og ég setti þau saman og fannst mjög skondið: Elífur Bambi (annað en mamman), Álfþór Búri, Bjartmann Dreki, Kveldúlfur Eldur, Eggþór Ubbi, Engiljón Ylur, Fjólmundur Kaktus... Æjæjæ!

[halkatla, 14.6.2007 kl. 13:58]

Karólína Nótt 

[Sigrún Magnúsdóttir (IP-tala skráð) 14.6.2007 kl. 14:03]

Jáh, og til að bæta í flóruna þá hét hún langamma mín Sigríður Híremína! Ekki alveg viss um að það sé skrifað svona en það gildir einu. Henni fannst nafnið ekki frábært og sá til þess að það hyrfi með henni. Áður náði þó vinnukonan hjá henni að skýra dóttur sína þessu nafni, hún hefur ábyggilega ekki vitað að ömmu gömlu væri svona illa við nafnið og þetta er náttúrulega mikill virðingarvottur. Jæja, það náðist allavega að þurrka þetta út úr ættartrénu.

[Jenný Anna Baldursdóttir, 14.6.2007 kl. 14:15]

Þið eruð æðisleg.  Í mannanafnadeildinni er ég eins og kettlingur í samanburði við ykkur.  Þvílík nöfn.  Josephine er líka fallegt í Svíþjóð en það er arfaljótt upp á Íslensku.  Svo verða nöfn falleg af því manneskjan sem heitir því er það.  Einfalt mál.

[Jenný Anna Baldursdóttir, 14.6.2007 kl. 14:16]

Já Gurrí við í Skrúðgarðinn, kominn tími til. 

[Birna Dis Vilbertsdóttir (IP-tala skráð) 14.6.2007 kl. 15:32]

Svalþúfa, Stormur, Ormur, Drengur og Einarína  Þorvaldína

[Ragnheiður , 14.6.2007 kl. 16:47]

sem strákanöfn ;

Mýrkjartan og Elliðagrímur, þeir voru bræður.

[Katrín Snæhólm Baldursdóttir, 14.6.2007 kl. 19:40]

Ipippanía er voða fallegt. Annars væri ég alveg til í að heita Ljóselfa Skarpheiður.

[Laufey Ólafsdóttir, 14.6.2007 kl. 20:42]

Ég þekki einmitt eina Guðmundínu sem hefur gefið því nafni sérstaka fegurð í mínum huga. Það er einmitt hægt að venjast öllum nöfnum bara með því að kynnast góðu fólki sem heitir þeim rétt eins og leiðinlegt fólk eyðileggur falleg nöfn.

Mannanafnanefnd hefur gert mér lífið leitt en prestar segja stundum já og nefndarfjandinn segir svo nei. Maya var skráð í Bretlandi og gátu fasistar nefndarinnar lítið sagt við því en hún heitir Maya Andrea. Tara fæddist á Íslandi og ég hef ekki enn fengið að skrá seinna nafnið hennar sem er Jelisha. Svo er alls konar óskapnaður leyfður! Fuss.

Knús til þín

[Ibba Sig., 15.6.2007 kl. 09:49]

Vá hvað það er til mikið af skrítnum nöfnum. Eitt karlmannsnafn kom í huga mér við lesturinn en það er Dufþakur. Alveg agalegt nafn. Ég man eftir einum með þetta nafn, hann var sætur strákur með hræðilegt nafn. 

[Jenný Anna Baldursdóttir, 15.6.2007 kl. 10:15]

Ég myndi aldrei hafa sénsast með "Dufa" Ibbs, jafnvel þótt hann hefði verið fegurri en sjálf erfðasyndin (sem mér skilst að sé mjög falleg)