HVAÐA GUÐ ER MAÐURINN AÐ TALA UM?

Ég hef nokkur prinsipp á mínum bloggfjölmiðli.  Ef undan eru skildir Bítles- og Stónsmeðlimir þá blogga ég yfirleitt ekki um "selebs".  Mér finnst það svo leiðinlegt og yfirborðskennt, eins og tilveran hjá því sjálfu virðist oft vera.  Núna bara verð ég að tjá mig um þessa frétt.  Lindsey Lohan, er sum sé komin í meðferð út af alkóhóli og dópi (bæði læknadópi og svo kókaíni).  Karlinn vonar auðvitað að dóttirin nái bata og hann segir að Promises meðferðarstöðin í Malibú þar sem Britney Spears fór til að komast að því að hún væri EKKI alki, ynni aðallega eftir tólf spora kerfinu sem væri byggt á boðorðum Guðs.  Vó.. hugsaði ég eru tólf sporin byggð á boðorðum Guðs?  Aldrei veit maður nokkurn skapaðan hlut.

Það er reyndar ansi oft minnst á Guð í tólf spora kerfi AA-samtakanna en samkvæmt skilningi OKKAR á honum.  Þ.e. við horfumst í augu við að það er til máttur okkur æðri en sá máttur er að eigin vali þess sem tileinkar sér þetta stórkostlega kerfi.  Mig langaði bara að hnykkja á því vegna þess að þeir sem ekki trúa á hin venjulega Guð geta sett hvað og hvern sem er í það hlutverk.  Við þurfum ekki að vera hefðbundinnar trúar til að nýta okkur AA-samtökin.  Það er það sem er svo æðislegt og sporin hafa hjálpað mér mikið þessa mánuði sem ég hef verið á snúrunni.  Hér koma svo hin tólf reynsluspor.

1. Við viðurkenndum vanmátt okkar gagnvart áfengi og að við gætum ekki lengur stjórnað eigin lífi.
2. Við fórum að trúa að máttur okkur æðri gæti gert okkur andlega heilbrigð að nýju.
3. Við tókum þá ákvörðun að fela líf okkar og vilja umsjá Guðs,samkvæmt skilningi okkar á honum.
4. Við gerðum rækilega og óttalaust siðferðileg reikningsskil í lífi okkar.
5. Við játuðum misgjörðir okkar fyrir Guði,sjálfum okkur og annarri manneskju og nákvæmlega hvað í þeim fólst.
6. Við vorum þess albúin að láta Guð fjarlægja alla skapgerðarbrestina.
7. Við báðum Guð í auðmýkt að losa okkur við brestina.
8. Við skráðum misgjörðir okkar gagnvart náunganum og urðum fús til að bæta fyrir þær.
9. Við bættum fyrir brot okkar milliliðalaust svo framarlega sem það særði engan.
10. Við iðkuðum stöðuga sjálfsrannsókn og þegar út afbar viðurkenndum yfirsjónir okkar umsvifalaust.
11. Við leituðumst við með bæn og hugleiðslu að styrkja vitundarsamband okkar við Guð, samkvæmt skilningi okkar á honum, og báðum um það eitt að vita vilja hans og hafa mátt til að framkvæma hann.
12. Við urðum fyrir andlegri vakningu er við stigum þessi spor og reyndum því að flytja öðrum alkóhólistum þennan boðskap og fylgja þessum meginreglum í lífi okkar og starfi.

 

Auðvitað óska ég svo stúlkunni Lindsey góðs bata og að hún finni sinn æðri mátt "samkvæmt skilningi sínum á honum".

 

Michael Lohan segir dóttur sína háða ýmsum lyfjum og fíkniefnum

Athugasemdir

[Ásthildur Cesil Þórðardóttir, 3.6.2007 kl. 11:26]

Já ég hef fylgst með mínum syni vinna úr 12 sporunum.  Hann tók það mjög alvarlega, þegar hann loksins fór í alvöru að vinna í sínmum málum.

[Kristín Katla Árnadóttir, 3.6.2007 kl. 11:38]

Ég kannast svolítið við  þetta.

[Birna Dis Vilbertsdóttir (IP-tala skráð) 3.6.2007 kl. 11:50]

Sporin virka ef maður nennir að vinna þau og gera þau að sínum lífstíl. Ég gerði það. Svo er þetta með Guð.  Það virðist standa í sumum. Það er einmitt SAMKVÆMT SKILNINGI OKKAR Á HONUM. Svo velur hver og einn sinn skilning.

[Eva Þorsteinsdóttir, 3.6.2007 kl. 12:15]

Ég vona líka að hún finni sinn æðri mátt.

[Orri Harðarson, 3.6.2007 kl. 12:23]

Í sporunum tólf eru fín tæki og tól til edrúmennsku sem og almennrar mannræktar. Þau voru upphaflega sex en eru byggð á fjögurra spora kerfi Oxford hreyfingarinnar sem var kristilegt költ, hvar Bill og Bob voru báðir aktívir meðlimir. Saga þeirrar hreyfingar skiptir annars engu máli - aðalatriðið er að fókusera á eigin bata, einn dag í einu. Og sporin hjálpa vitanlega mörgum til þess.  

[Sigga (IP-tala skráð) 3.6.2007 kl. 13:26]

Þó að faðir hennar segir að þetta byggist að mörgu leyti af boðorðunum tíu getur það einmitt verið "hans skilningur" á 12 sporunum. Þú mátt ekki gleyma því að með því að stunda sporin og lifa í þeim þá verður fólk að kappkosta á hundrað prósent heiðaleika - og ef það klúðrast sem stendur í AA bókinni "Þegar þeim skjátlaðist" þá eiga þeir bara að bæta fyrir brot sitt. Sá sem er virkur í sporunum veit að hann á ekki að stela, drýgja hór, vera gramur út í nágrannan sinn né girnast konu hans, lítur á fólk sem jafningja og virðir því foreldra sína, o.s.frv. - Þannig það er nú ekki svo fáránlegt að segja að þetta tengist boðorðunum. En ef þú lest bibilíuna þá eru undirstöðu atriði 12 sporana mest byggð á bibilíunni - en það er haft að hver og einn geti túlkað sinn æðri mátt svo að sem fleiri taki þessi frábæru spor - en það er hins vegar staðreynd að sporin eru byggð af Biblíunni og grundvöllur þeirra er innblástur sem Bill fékk frá kristinlegum hópum sem vinur hans var í. Svo ég myndi nú ekki alveg missa þig yfir þessu Guða tali þó þú viljir túlka þinn guð á allt annan hátt.

[Edda Agnarsdóttir, 3.6.2007 kl. 13:45]

Ég sé að það er alltaf hægt að gera betur, þarf að endurnýja kynni mín við þennan boðskap!

[Ásdís Sigurðardóttir, 3.6.2007 kl. 13:56]

Hef verið að fylgjast með syni mínum í þessum sporum síðustu mánuði, virkar vel fyrir hann.Takk fyrir að setja þau hér inni, hafði ekki lesið þetta sjálf bara heyrt hans útskýringar á málinu. Virkar vel.

[Jenný Anna Baldursdóttir, 3.6.2007 kl. 14:39]

Sigga vil endilega koma því á framfæri að ég er ekki að missa mig yfir túlkun mannsins á sporunum en ég veit að margir hafa ekki viljað tileinka sér fræðin einfaldlega vegna þess að "guðstalið" hefur fælt frá.  Ég skrifaði þessa færslu til að fá smá umræðu um sporin og ég læt minn skining á guði nægja mér og gef öðrum það fullkomlega frjálst að nota sinn.  Bara á meðan það virkar því það er það sem skiptir máli.

Ásdís: Þetta er mannrækt í sínu tærasta formi.  Does wonders for your health.

[Árni Helgi Gunnlaugsson, 3.6.2007 kl. 15:11]

Ef við lesum sögu þeirra Bills og Bobs, þá komumst við fljótlega að því, að þeirra æðri máttur var Jesú Kristur.  Eðlilega varð þó að setja hugtakið "æðri máttur" inn í sporin, því ekki eru allir alkar kristnir, eða geta tileinkað sér trú á andlegan Guð, sem er skapari alls. 

Þó er áhugavert að lesa kaflann "Vér trúleysingjar" í AA-bókinni.  Hvet þig til þess að lesa hann aftur Jenný (geri ráð fyrir að þú hafir lesið hann).  Þar er þetta Guðshugtak rætt á þessum nótum.

[Jens Guð, 3.6.2007 kl. 15:57]

Og hver eru svo þessi Lindsay og Michael Lohan?  Ég kannast ekki við þessi nöfn þó að þetta eigi að vera frægt fólk.   

[Jenný Anna Baldursdóttir, 3.6.2007 kl. 16:04]

Ég er dagfastur lesandi AA-bókarinnar Árni Helgi og finn nýtt í henni í hvert skipti.  Mín biblía.  Læt ekki einu sinni kvennaviðhorfið í henni fara í taugarnar á mér svo umburðarlynd er ég orðin.  Hm.. takk allir fyrir góð innlegg.  Jens Guð. þú kemur að tómum kofanum hjá mér varðandi þetta fólk en hef séð amk. eina mynd með dömunni Lohan.  Man ekki hvað hún heitir.

[Jens Guð, 3.6.2007 kl. 16:25]

Ókey.  Þau eru sem sagt kvikmyndaleikarar.  Leika sennilega í öðrum myndum en minn smekkur sækir í. 

[Einar Óli (IP-tala skráð) 3.6.2007 kl. 20:38]

Mæli með South Park þættinum sem fjallar um AA og 12 spora kerfið. Skemmtilegur þáttur.