DÚNDUR DAGUR ÞEGAR HANN BYRJAÐI..

...upp úr hádegi eða svo, þar sem ég einhverra hluta vegna svaf eins og unglingur fram að því.  Eftir að hafa náð úr mér skelfingunni, bloggað um hana og horft á hádegisviðtalið við Steingrím J. sem er krútt dauðans í pólitískum skilningi fór ég að líta í kringum mig eftir verkefnum.  Þau blöstu við mér hvert sem ég leit.  Ég tók mér hálftíma í að forgangsraða og annan hálftíma í að forgangsraða forgangsröðuninni svo hófst ég handa.  Ég gerði eftirfarandi stórvirki:

1. Skrifaði á miða og sendi húsbandið í búðina af því ég var sjálf of busy.

2. Þurrkaði af eldhúsborðinu.

3. Þvoði 2 bolla og einn disk (djúúúpan)

4. Fór út á svalir og hugsaði.

5. Færði stólana aðeins til í stofunni (þrjá að tölu)

6. Reykti 16 sígarettur (eða uþb) úti á svölum.

7. Raðaði einu skópari í ganginum.

8. Opnaði tvö umslög sem komu í póstinum.

9. Beið á skeiðklukkunni eftir að Jenny Una Errriksdóttir kæmi í gistingu til okkar.

Ég veit að þið verðið þreytt bara á því að lesa um annir mínar í dag.  Ég legg því ekki meira á ykkur en tilkynni ykkur hér með að við Jenny Una erum búnar að skemmta okkur stórkostlega og við forgangsröðuðum ekki neinu.

Athugasemdir

[Ásdís Sigurðardóttir, 17.5.2007 kl. 00:04]

úff fúff fúff, þetta hefur verið jafn erfiður fyrripartur eins og hjá mér, þú verður að hvíla þig á morgun 

[Jóna Á. Gísladóttir, 17.5.2007 kl. 00:47]

Ég er nú bara búin að troða lúnum fótunum ofan í fótanuddtæki svo þreytt er ég eftir þessa þeytinga á þér kona

[Laufey Ólafsdóttir, 17.5.2007 kl. 09:18]

Hahaha! Ég er einmitt búin að vera að plana vorhreingerningu og hef verið álíka afkastamikil! Uppvaskið var samt aðeins meira og ég vaknaði með tak í bakinu. Ég hef tekið þá ákvörðun að fjárfesta í uppþvottavél. 

[Laufey Ólafsdóttir, 17.5.2007 kl. 09:20]

...ps. Steingrímur ER einmitt krútt dauðans í pólitískum skilningi!!! Þarna komstu með það!

[Jenný Anna Baldursdóttir, 17.5.2007 kl. 10:10]

Laufey á ekki að fara að skella inn nýrri færslu?  Er komin með fráhvörf

[Laufey Ólafsdóttir, 17.5.2007 kl. 11:32]

Elsku Jenný, ég geri það alveg bráðum! Ég er svo mikið að drepast í bakinu og það er að stífla flæðið til heilans. Var að poppa einni voltarin rapid og vona að það dugi!!! Ég skal bæta úr þessu þegar ég er búin að gefa litla grís að borða og fá mér kaffi .