CATCH 22

Ég get nú ekki á mér setið að blogga um þessa frétt.  Flest verður konum að meini.  Núna er búið að rannsaka 18.000 danskar hjúkkur og niðurstaðan er að áfengisneyslan auki líkur á brjóstakrabbameini.  Sem alka þá kemur mér auðvitað ekki á óvart að áfengi í óhóflegu magni geti valdið alls konar veikindum (sbr. mína eigin sykursýki) en það er að verða vandlifað fyrir konur vegna eilíflegra sektartrippa sem vísindin leggja þeim á herðar.  Við erum ömurlegar mæður ef við borðum þetta eða drekkum hitt á meðgöngunni. Jafn slæmar ef við drekkum EKKI þetta og EKKI hitt.  Bara svo eitt dæmi sé tekið. 

Þegar ég átti miðstelpuna mína hana Maysu sagði ljósmóðirin við mig í vandlætingar tón (Maysan var minnst minna stelpna sem voru þó agnir líka en hún var 10 merkur og 48 cm) "Sjáðu hvað hinar konurnar eiga stór og stæðileg börn.  Þitt barn er svona lítið vegna þess að þú reykir". Ég var svo hrædd við áktorítet á þessum tíma að ég þorði ekki að segja kerlu að ég hafi ekki reykt á meðgöngunni. Sumir eiga lítil börn aðrir mun stærri.

Burtséð frá þessu og aftur að fréttinni.  Rannsóknir sem þessar eru góðra gjalda verðar en ég man eftir skrilljón rannsóknum varðandi drykkju bæði manna og kvenna og hvað hún eigi að geta leitt af sér.  Þess vegna kippir þessi óvirki alki sér ekki upp við nýjar rannsóknir sem segja að áfengisdrykkja auki líkurnar á þessum eða hinum sjúkdómnum.  Það er þegar vitað að óhófleg áfengisneysla er alvarlegt heilsufarslegt vandamál sem orsakar oft alvarlega sjúkdóma.

Hófdrykkjufólk hlýtur að geta drukkið áfram með góðri samvisku án allrar líkindaspeki.

Sólin skín og hvað er búið að rannsaka oft að sólin geti beinlínis verið lífshættuleg (ekki að tala um gróðurhúsadæmið).  Það er vandlifað í þessum heimi.

Áfengisneysla eykur líkur á brjóstakrabbameini

Athugasemdir

[Þorsteinn Gunnarsson, 24.4.2007 kl. 15:04]

Sæl Jenný... Við alkarnir erum sannarlega búnir að koma óorði á brennivínið, en það er nú bara einu sinni þannig að ef maður ætti að forðast allt það sem búið er, með einhverjum hætti að koma óorði á, væri lítil tilgangurinn með þessari jarðvistinni.

Ég hef með aldrinum orðið æ sannfærðari um það að þessar eilífu áhyggjur manna af óhollustu eru miklum mun hættulegri en "óhollustan sjálf".

[Jenný Anna Baldursdóttir, 24.4.2007 kl. 15:07]

Nei Þorsteinn minn það er brennivínið sem komið hefur óorði á okkur

[Ásthildur Cesil Þórðardóttir, 24.4.2007 kl. 15:42]

Ég man eftir niðurstöðum rannsókna um að lýsi væri óhollt það þurfti bara að drekka svo mikið af því að það myndi enginn gera.  Kók átti að drepa mann líka einu sinni, en þá þurfti heilt baðkar á dag.  Meira að segja vatn er stórhættulegt í of miklu magni.  Eftir þessar upplýsingar hætti ég eiginlega að taka mark á slíkum rannsóknum.  Held að við sækjumst í þau efni sem okkur vantar.  Er þá ekki að tala um fíkn hehehe....

[Jenný Anna Baldursdóttir, 24.4.2007 kl. 15:55]

Nákvæmlega Ásthildur, nákvæmlega.

[Ásthildur Cesil Þórðardóttir, 24.4.2007 kl. 18:48]

Ef einhver ætlar að koma óorði á fyrrverandi alkóhólista, þá er mér að mæta.  Bretti upp ermar og bíður eftir einhverjum,  þekki allavega eina hetju hér sem heitir Jenný, læt öngvan tala illa um hana sko !!

[Kristín Katla Árnadóttir, 24.4.2007 kl. 20:07]

Jenný min strákurin minn var 11 merkur  og 49  cm .

[Katrín Snæhólm Baldursdóttir, 24.4.2007 kl. 20:19]

Neikvæðar tilfinningar eru langhættulegastar heilsunni af öllu í heimi og geimi. Og ekki batnar það þegar heilsufræðingarnir og vísindamenn bæta enn á vondu tilfinningarnar með enn meiri ótta...þá er sko alvarlegur heilsubrestur í sjónmáli hjá fleirum en hjúkkunum. 85 % allra sjúkdóma eru tilkomnir vegna neikvæðra tilfinninga.

Já og það er víst "rétt" að það er hægt að drepa sig á vatnsdrykkjunni líka...Ég meina meira að segja loftið sem við öndum að okkur er stórhættulegt. Iss...maður er nú löngu hættur að láta hræða sig með svona upplýsingum..þær stangast á annan hvorn daginn og enginn veit lengur hvað er hollt og hvað er bráðabanvænt.

[Ester Júlía, 25.4.2007 kl. 08:44]

Lifum á vatni og bítum gras...búum í einangrun uppí sveit þar sem er engin mengun. Forðumst fólk þar sem það getur smitað okkur af hinum og þessum sjúkdómum.   Deyjum svo úr leiðindum.