KANNTU BRAUÐ AÐ BAKA?

Eftir að ég varð svona alvirk amma sem vil gjarnan hafa barnabörnin eins oft og ég mögulega fæ hef ég skilið nauðsyn þess að fara að smella í karakter.  Ég er búin að baka pönnukökur grimmt frá áramótum en móður minni til hrellingar, vissi hún um það, baka ég þær enn eftir uppskrift.  Bakarar með meirapróf eru stórhneykslaðir á þessu og finnst ekkert plebbalegra en að geta ekki sirkað í pönnukökudruslur og notað innsæið á magn og innihald.  Nú Jenny sem er mikið hjá ömmu sinni er búin að fá leið á að paka pönnukökur.  Hún neitaði að taka þátt s.l. sunnudag.  Skildi mig eina eftir við baksturinn.  Ég sá að fjölbreytni er nauðsynleg til að viðhalda áhuga barnsins og ákvað að skutla mér í djúpu laugina.  Pabbi hennar Jenny hann Erik Quick gaf mér sænska uppskrift móður sinnar af kanelsnúðum en sænskar uppskriftir eru ídíótprúf í dl.  Þegar ég var með stelpurnar mínar litlar í Svíþjóð bakaði ég brauð og kanelsnúða.  Lengra hef ég ekki komist í bökunarheiminum.  Tertur og kökur stráfalla af skelfingu reyni ég að baka þær.  Ég hef klúðrað Betty Crocker (get svarið það) gleymdi að bæta í vatninu sem er náttulega bara hégómi og algjör óþarfi en það varð til þess að Betty skítféll.

Nú í dag hélt ég generalprufu á kanelbollubakstri með fullu rennsli, til að vera til í slaginn þegar við Jenny bökum um helgina.

14 dl. hveiti 1..2...3...4...7..8..4..sjitt síminn hringdi.  Hveiti aftur ofan í pokann og byrjað upp á nýtt.  Eins og ég er vel af Guði gerð þá þurfti ég samt að endurtaka þetta þrisvar sinnum áður en ég gat einbeitt mér að talningu.

1 dl. sykur og 1 tsk. salt út í hveitið og þessu blandað saman.  Þetta gekk svona líka glimrandi.  Algjört sökksess.  Jess.

5 dl. mjólk og 150 gr. smjörlíki (brætt) haft ca. 37C°heitt (ekki spyrja mig að því hvernig ég fann út úr hitadæminu það er of flókið) og 1 pakka af geri skutlað út í.  Svo stendur að vekja eigi gerið þegar það sé komið út í vökvann.  Vaknaðu gerfjári, vaknaðu garga ég ofan í skálina.  Síðan geng ég út frá því sem vísu að gerið sé vaknað og klárt í slaginn.  Úje það gengur eftir.

Deigið flott og látið hefast í 40 mín. kanelsnúðar gerðir og aftur látið hefast í 15 mín.  Snúðar bakaðir.  Þeir eru flottastir og bragðgóðir með afbrigðum.

Niðurstaða: Generalprufa ásættanleg.  Frumsýning á kanelbollubakstri verður haldinn með Jenny Unu Errriksdótturrr sem hægri hönd bakara um næst komandi helgi.

Adjö mina vänner

Athugasemdir

[Heiða Þórðar, 19.4.2007 kl. 01:47]

Ég legg nú ekki einu sinni í að byrja, síminn stoppar ekki á þessu heimili. Knus og klemm

[Ýr (IP-tala skráð) 19.4.2007 kl. 03:21]

Skemmtileg færsla 

Ég er einmitt að fara að baka kanelsnúða í fyrramálið fyrir lítinn 5 ára gutta og ég sem baka aldrei. ÓMG. Prófa þessa uppskrift!

[Jenný Anna Baldursdóttir, 19.4.2007 kl. 11:09]

Takk stelpur mínar.  Beta mín ég held að það sé ákveðinn hæfileiki að geta klúðrað Betty. Sendi þér batakveðjur héðan.

[Anna Lilja, 19.4.2007 kl. 11:25]

Stundum held ég bara að þetta sé sumum konum meðfætt og öðrum ekki, mér er t.d. lífsins ómögulegt að sirka á nokkurn skapaðan hlut sem kemur eldamennsku við.

[Ásthildur Cesil Þórðardóttir, 19.4.2007 kl. 11:37]

Mér þykir svo vænt um að fá fréttir af henni Jenný Unu Errriksdótturrrr Það er lítil stúlka sem ég gæti alveg hugsað mér að bæta inn í barnahópinn minn. 

[Jenný Anna Baldursdóttir, 19.4.2007 kl. 11:55]

Það gæti nú bara verið Ásthildur mín að hún Jeny kæmi í djús til þín í sumar.  Barnið verður að fá að taka út kúluna.  SS maður veit aldrei.

[Hrönn Sigurðardóttir, 19.4.2007 kl. 13:28]

 Vaknaðu ger Vaknaðu

ég græt af hlátri

[Ásthildur Cesil Þórðardóttir, 20.4.2007 kl. 00:44]

Já komið þið bara það verður örugglega til djúr, eða Frissi fríski