SUMARDAGURINN FYRSTI.

Svei mér þá,  það er að bresta á með Sumardeginum fyrsta.  Reyndar er staðsetning þessa dags á almanakinu alveg út úr kortinu en ég veit að sakvæmt dagatalinu munu vera jafndægur á vori þann dag.  Rökrétt væri þá að þessi dagur héti einfaldlega jafndægur að vori.  Hvern er verið að blekkja?    Ég man eftir sjálfri mér á upphlut, í sportsokkum og titrandi af kulda.  Samt var spennan algjör.  Þetta var æfing fyrir 17. júní sem var uppáhaldsdagurinn minn fyrir utan aðfangadag.  Á Sumardaginn fyrsta í bernsku minni voru sölutjöld í Lækjargötu þar sem mátti kaupa pylsur, popp og blöðrur.  Íslenski fáninn var þar líka í hávegum hafður.  Í minningunni var mér bókstaflega alltaf kallt.  Ef ekki var hríðarbylur eða frost þá forringdi svo að ég kom gegnvot heim. Við þræluðum okkur undantekningalaus í skrúðgönguna.  Amma mín var eins og björgunarsveit fyrir mig og mínar vinkonur og hafði heitt súkkulaði tilbúið þegar við hrísluðumst heim úr bæjarferðinni allar príma kanditatar fyrir blöðrubólgu.  Íslendingar eru bjartsýnir þegar beðið er eftir sumrinu.  Það veit náttúrulega hver maður að sumarið kemur í júní og stundum ef heppnin er með um miðjan maí.  Við búum á Íslandi og ekki við öðru að búast.  En við getum látið okkur hlakka til. 

Ég veit um eina konu sem fer ekki fet á Sumardaginn fyrsta sem verður nk. fimmtudag.  Hins vegar ætla ég að æða í bæinn þ. 1. júní nk. með flagg og blöðru og halda upp á sumarið þannig að eftir verið tekið.

Athugasemdir

[Sigríður Laufey Einarsdóttir, 17.4.2007 kl. 06:17]

Vorjafndægur er 21. mars og þá fullsnemmt í sumar.

Svona er bara sumarkoman okkar í norðrinu.  Birtan gefur okkur von um betri tíð og blóm í haga og okkur hlýnar um hjararæturnar á sumardaginn fyrsta þrátt fyrir allt. Með kveðju.

[Hrönn Sigurðardóttir, 17.4.2007 kl. 08:53]

Sumardagurinn fyrsti OG dr. Hús. wúhú!!!!!!!!!

[Jenný Anna Baldursdóttir, 17.4.2007 kl. 09:01]

Takk Hrönn.  Þarna varð mér á í messunni.  Auðvitað er sumardagurinn fyrsti ákveðinn áfangi á leið til sumars.  Örlítið of snemma að mínu mati.

Já segðu Hrönnsla Húsið í tilefni dagsins.

[Jenný Anna Baldursdóttir, 17.4.2007 kl. 09:01]

Ég meina takk Sigríður Laufey.

[Ragnheiður , 17.4.2007 kl. 10:06]

Þá vitum við um 2 konur sem ekki ætla að freista þess að rifja upp gamlar blöðrubólgur með eða án fána.

Ætli ég verði ekki að vinna og þá með miðstöðina á fullum styrk til bjargar fórnarlömbum sumarkomunnar ?