VIÐ OG ÞAU..

Var að hlusta á umræðuna í sjónkanum þar sem foringjar stjórnmálaflokkanna spjölluðu.  Ansi lítið nýtt kom í ljós og staða flokkanna varðandi innflytjendamál er nokkurn veginn á hreinu.  Enginn flokkana, lítur á innflytjendur sem vandamál, utan frjálslyndir, og sjá það sem jákvæðan hlut að hér séu innflytjendur og allir virðast þeir leggja sama skilning í "vandamálaauglýsingu" Frjálslynda flokksins.  Ég ætla ekki að fullyrða að frjálslyndir séu útlendingahatarar, langt frá því, en skilningur fólks á auglýsingunni títtnefndu hinni svokölluðu vandamálaviðvörun virðist vera sá hinn sami hjá þeim sem ég tala við þe. að þarna sé nálgunin á málefninu röng, ali á fordómum og ótta.  Mér finnst þessi neikvæða aðferðarfræði þeirra höfða til fremur lágra hvata fólks.  Ef ekki liggur neitt óeðlilegt að baki þessa málflutnings Frjálslynda flokksins er þeim í lófa lagið að breyta nálgun sinni á málefnið.  Getur verið að þetta sé populismi?  Léleg leið til að ná sér í atkvæði?  Mér er spurn.

Mér finnast það forréttindi að búa í fjölþjóðasamfélagi.  Það getur bara verið gott að fá hingað nýja strauma frá öðrum menningarsvæðum og það gerir þjóðfélagið mun litríkara og skemmtilegra.  Við sem búum hér og störfum höfum getað breikkað sjóndeildarhringinn með því að fara til annara landa til náms og starfa.  Því skyldum við ekki gjalda líku líkt?

Athugasemdir

[Ari Johannesson (IP-tala skráð) 10.4.2007 kl. 00:25]

Alveg klárlega populismi, ég er alveg klár á að þeir hafa leitað í smiðju Carl I. Hagen og Norska Framfaraflokksins.

Það er dansað eins nálagt línu rasisma og hægt er, daðrað við hann.

[Ásthildur Cesil Þórðardóttir, 10.4.2007 kl. 10:49]

Populismi er að spila eins og vindurinn blæs, það er því alveg úr út kú að kall frjálslynda populista, því þeir standa fast á sínu, hvað sem tautar og raular.  Nú ætla ég ekki að segja að auglýsingin hafi verið það besta sem til er.  En hún er samin af auglýsingastofu sem er að vinna fyrir flokkinn.  Ég get trúað að menn hafi treyst þeim best til að gera rétt.  Og það á eftir að koma í ljós reyndar.  En ef menn vilja virkilega sjá hvað við erum að tala um í Frjálslynda flokknum, þá er betra að kynna sér stefnuskrána og nýsamþykkta ályktun á landsþingi.  Umræðan er alveg ótrúleg, og það er bæði í gangi þöggun og eins afskræming á umræðunni.  Og hún er fullkomlega meðvituð af þeim sem standa fyrir henni.  Þið ættuð ef til vill að kynna ykkur málin betur áður en þið dæmið.  Ég er ekki að meina þig Jenný mín.