FIMM DAGA FRÍ, HM

Það er að bresta á með páskum.  Þrátt fyrir að ég hlakki oftast til þá get ég ekki neitað því að þeir eru lengi að líða.  Það situr enn í mér þessi yfirþyrmandi helgislepja sem einkenndi hátíðina þegar ég var barn.  Allt var lokað frá skírdegi og fram á þriðjudag eftir páska.  Bókstaflega allt.  Föstudagurinn langi var svo langur og það var ekkert við að vera.  Krakkarnir voru ekki einu sinni á róluvellinum.  Í útvarpinu voru sálmar og sorgarljóð og háheilagar hugvekjur allan daginn.  Ég ætlaði einu sinni að bursta mottur fyrir ömmu mína og ég hélt að hún myndi detta niður dauð þegar motturnar blöktu á snúrunni og ég mundaði bankarann.  Bannað sagði hún, á Föstudaginn langa syrgjum við og gerum bara það allra nauðsynlegasta.

Þetta hefur skánað en jafnaldrar mínir hafa lýst þessari tilfinningu fyrir mér, að þetta hafi enn áhrif á þá.  Hvað getur kona gert?  Í þetta sinn ætla ég að byrgja mig upp af bókum, fá stelpurnar mínar í mat, leigja mér góðar myndir, fara í göngutúr (ef það snjóar ekki) og passa mig á að líta ekki á klukkuna.

Gleðilega páska

Athugasemdir

[Kristín Katla Árnadóttir, 1.4.2007 kl. 14:32]

Já ég man alltaf að maðu mátti ekkert gera skemtilegt  á föstudaginn langa  það var allt bannað.

[Kristján Kristjánsson, 1.4.2007 kl. 15:39]

Já mig hlakkar til. Verð í sumarbústað með vinum og vandamönnum og enda svo páskana á stórtónleikum með Björk :-) Lífið er yndislegt :-)

[Sædís Ósk Harðardóttir, 1.4.2007 kl. 19:58]

Já föstudagurinn langi var rosa heilagur þegar maður var barn, það mátti ekkert gera. Þetta hefur nú breyst svoldið mikið.  Ég hlakka voða til páskanna, tek forskot á sæluna og fer til Köben á morgun og verð svo með krökkunum mínum yfir hátíðirnar í notalegheitum

[Ásthildur Cesil Þórðardóttir, 2.4.2007 kl. 10:19]

Páskar hafa alltaf verið skemmtilegir hér á Ísafirði, það er vegna þess að skíðavika er haldinn hér ár hvert bærinn fyllist af fólki og hér eru dansleikir tónleikar og allskonar uppákomur.  Ég sá einmitt um skíðavikuna í nokkur ár, það var virkilega skemmtilegt.  Stóð m.a. fyrir því að færa út kvíarnar til Flateyriar, Suðureyrar, Þingeyrar og Bolungavíkur.  

Og núna hefur bæst við Aldrei fór ég suður tónleikarnir, þar sem fólk kemur allstaðar að og hljómsveitir erlendis frá líka, svo og blaðamenn.  Það er fjör á Ísó um páska.