LAUGARDAGSPÆLINGAR

Það er svo margt sem mig langar að blogga um.  Samt er það stundum þannig að hugsanirnar eru eins og rússibani á fullri ferð, láta ekki að stjórn.  Þannig hefur það verið undanfarið hjá mér, einfaldlega vegna þess að ég hef látið öllum illum látum með sjálfa mig.  Farið fram úr mér, gert of mikið, mæðst í mörgu eins og Marta greyið og hreinlega gleymt að forgangsraða.

Ég var að hugsa um hversu rík þörf er innra með okkur að máta alla skapað hluti við okkur sjálf. Auðvitað er það nauðsynlegt að velflestu leyti, við höfum bara okkar reynslu til að notast við. Það sem er þó að fara í taugarnar á mér er þessi þörf margra til að hafna öllu sem er þeim ekki þóknanlegt.

Áður en ég komst til vits og ára uþb í október á síðasta ári (ekki alveg svona slæmt) þá var ég óþolandi dómhörð oft á tíðum.  Ég hafði ZERO tolerans fyrir fólki sem fór aðrar leiðir en ég.  Þetta viðurkenndi ég ekki svona opinberlega en ef ég dæmi sjálfa mig af ummælum mínum á þessum sokkabandsárum þroska míns, þá er ég vegin og léttvæg fundin.  Ergo: "Guilty as charged".  Ég ætla ekki að mála skrattann á vegginn en ég var illa haldin af dómhörku. Einkum og sérílagi upp úr þrítugt. Ég er núna eldri en sjálf erfðasyndin (af hinni friðelskandi blómakynslóð) en sem betur fer hefur mér með víxlsporum mínum í lífinu lærst að hver manneskja er dýrmæt, þrátt fyrir að hún sé etv hundleiðinleg, með allt aðra lífsýn en ég sjálf og að viðhorf hennar minni mig á geimveru.

Til að útskýra hvað ég meina svona blákallt þá kem ég með nokkur dæmi um fullyrðingar mínar:

Alkahólistar eru aumingjar (þarna hef ég greinilega ræst karmalögmálið því ég endaði í meðferð sjálf og fékk upplýsingar um sjúkdóminn alkahólisma frá fyrstu hendi. Ég lærði "the hard way" að alkahólistar eru ekki aumingjar enda hefði ég seint skrifað upp á að ég væri vesalingur)

Fólk sem er ekki sammála mér í pólitík eru hugsjónalausir hálfvitar Þarna varð mér illa á í messunni og fékk að komast að því fullkeyptu að fólk er,  án tillits til stjórnmálaskoðana, fyrst og fremst manneskjur sem allar hafa sama útgangspunkt.  Þe að betrumbæta samfélagið. Eini munurinn á  milli fólks eru leiðirnar að markinu. (verð þó að taka fram að "sumir" virðast löngu hafa gleymt þessari fallegu fyrirætlun og skara bara eld að eigin köku).

Konur sem kjósa Sjálfstæðisflokkinn eru handbendi kvennakúgunarafla og því með greindarvísitölu langt undir stofuhita Þetta þurfti ég að éta ofan í mig eins og margt annað.  Allar konur sem vilja hafa áhrifa á samfélagið eru af hinu góða en eins og áður er nefnt eru leiðirnar að markinu margar og þótt ég sé fullkomlega og algjörlega óssammála þeim þá þýðir það ekki að þeirra hugsjónir séu eitthvað verri en mínar.

Ég tók nú bara svona yfirborðskennd dæmi.  Dómharka sem beinist persónulega að fólki er þó verst og ég kom því miður við í þeirri deild líka og dvaldi þar mun lengur en sem nam einum kaffibolla. En ég gengst við vanþroska mínum. Orð og hugsanir hafa ábyrgð.

Í dag ætla ég ætla ég að tala rólega og koma kurteislega fram.  Gagnrýna engan.  Reyna ekki að bæta eða aga nokkurn annan en sjálfa mig.

Svo mörg voru þau orð.

 

 

Athugasemdir

[Jenný Anna Baldursdóttir, 24.3.2007 kl. 14:26]

Sammála enda ekki ætlunin að verða að fiðruðum engli heldur aðeins að þræða hin gullna meðalveg. 

Sumir hafa enda fyrirgert forréttindum sínum til að fá að vera í félagsskap hinna dásamlegu og það ER fjörbaugsgarður.

[Hrönn Sigurðardóttir, 24.3.2007 kl. 14:51]

Bezt ég taki þig mér til fyrirmyndar í dag

[Björn Heiðdal, 24.3.2007 kl. 16:33]

Ég var mjög dómharður frá fæðingu og svona til fimmtán ára aldurs.  T.d. þegar ég var fimm ára lamdi ég alla sem ekki voru mér sammála.   Hina lamdi ég líka bara til að vera alveg viss.

En með samstilltu átaki foreldra og skóla tókst að laga þennan ósið.  Í dag reyni ég að umbera annað fólk eftir bestu getu og án verulegs ofbeldis.  Þrátt fyrir þetta umburðarlyndi þoli ég ekki fólk sem lýgur eða svíkur mig.

[Katrín Snæhólm Baldursdóttir, 24.3.2007 kl. 19:17]

Aldeilis góð færsla. Fólkið sem skilur um hvað það sjálft er og hvernig og hvers vegna...hefur svo langmestu möguleikana á að laga brestina og verða snarfiðraðir englabossar.

Smjúts