KÆRLEIKSBÖRN

Ég óska Bolvíkingum til hamingju með þetta stórsniðuga fólksfjölgunarátak! Í mínu ungdæmi hefði þótt óhugsandi að gera svona, hvað þá heldur setja fram hugmyndir um að einbeita sér að dodoinu í heila viku.  En ég er gömul eins og ég hef áður sagt.  Þegar ég var í 12 ára bekk í Meló ræddum við mikið um hvort bls. 82 í Heilsufræðibókinni yrði tekin fyrir.  Ég man eftir einum bekk í skólanum sem lenti í þeim hörmungum að fara í gegnum bls. 82 þar sem fjallað var, á einni síðu um býflugurnar og blómin.  Ég man að á myndinni fylgdi mynd af legi (jabb legi ekki píku) eins og við gerðum það með leiginu. Einhver álíka skilaboð til strákanna voru á sömu örsíðu og í okkar bekk tókum við EKKI bls. 82.  Ekki að það hefði einhverju breytt í upplýsingalegu tilliti.  Við vorum kynferðismálalegir örvitar.

Í fávisku minni hélt ég að barnafjöldi segði til um iðkunartíðni kynmaka hjá fólki og ég er ekki að grínast.  Vinkonur mínar sem áttu ekki systkini eða bara eitt sluppu með skrekkinn.  Ég hins vegar var komin af stóðlífissteggjum.  7 stelpur áttu foreldrar mínir og 1 bróður. Ég var ekki mjög glöð þegar ég var spurð um systkinafjölda..  Einhvers staðar las ég um konu sem fékk um það martraðir, á þessum árum fákunnáttu um kynlíf, á nóttunni að hún yrði tekin upp í smokkfisknum í Dýrafræðinni.  Ég skil hana svakalega vel.  Ég hefði ekki getað stunið þessu orði út úr mér fyrir framan bekkinn þó líf mitt hefði legið við.

En nú heyrir öll þessi forpokun sögunni til og dætur mínar tala opið um kynlífsmál.  Það er vel.  Ég vona að Bolvíkingar og aðrir landsmenn geriða þar til að þeir verði bláir í framan og eignist í rökréttu framhaldi helling af börnum (hehe).

Góða skemmtun

Von á tveimur ástarvikubörnum í Bolungarvík

Athugasemdir

[Jenný Anna Baldursdóttir, 12.3.2007 kl. 14:12]

Lol! Já ég var að heyra að það teldi svo rosalega að vera fréttabloggari!