Ég held að ég láti leggja mig inn!

 

Ég nenni ekki að vera í fári vegna ástandsins á Íslandi.

Amk. tek ég mér frí frá því til klukkan 14,32 og verð í góðu skapi þangað til.

Svo brjálast ég.

En.. Ég er að verða gömul, nú eða þá að lyktarskyn mitt hefur bilað í bankahruninu.

Ég er ofsótt af allskyns lykt sem tengir mig við atburði í lífi mínu, suma skemmtilega, aðra síðri.

Ég fæ reglulega lyktarkast sem tengir mig inn á spítalann á Spáni þar sem ég lá nánast milli heims og helju fyrir nokkrum árum.

Hún er svona: Ólívuolíumatarlykt, sótthreinsiefni, blönduð líkamslykt og blómaangan.

Oj.

Svo fæ ég reglulega lyktrænar heimsóknir frá bernsku minni.

Ég seldi stundum Mánudagsblaðið (þann sorasnepil) á laugardögum.

Þá voru allir, svei mér þá, að bóna í Vesturbænum.   Húsmæður hljóta að hafa haft sameiginlega stundarskrá, ég sverða.  Lyktin af Mjallar og Sjafnarbóni er yfirgengilega sterk.  Það er ljúft.

"Ekki vaða yfir nýbónað gólfið krakki"; hljómaði um göturnar þegar ég tróð mér inn til að selja.

Það var meira framboð en eftirspurn á smáfólki á þessum tímum og því ekki verið að vanda sig neitt sérstaklega í samskiptum við þessi kvikindi.

Ég seldi merki fyrir allskonar líknarfélög og það var gert á sunnudögum.

Þá voru allir (sama stundarskrá aftur) að steikja sunnudagsverð fyrir hádegi.

Hryggur, grænar, rauðkál og sósa.

Halló hvað þessi óholli málsverður lyktaði vel.

Stundum finn ég lykt af vori og sumri úr Vesturbænum (það var allt öðru vísi þar en annars staðar), sú lykt er milljónsinnum betri en árstíðalyktin í dag.

Ætli það komi ekki til af hreinni náttúru, ómenguðu grasi og minni bílaumferð?

Æi, ég veit það ekki, en núna hellist yfir mig lyktin af nýrri skólatösku, brakandi leðurlykt.

Andskotans ófriður er þetta.

Ég held að ég láti leggja mig inn.

P.s. Popplyktin úr Tjarnarbíó getur komið þegar minnst varir.

Síðasti bærinn í dalnum og allur sá ballett.

Ómæ.

Athugasemdir

[Jónína Dúadóttir, 29.5.2009 kl. 11:30]

Góða helgi

[Ragna Birgisdóttir (IP-tala skráð) 29.5.2009 kl. 11:33]

 Þú glæðir lífið gleði.

[Hrönn Sigurðardóttir, 29.5.2009 kl. 11:34]

mmmm.... manstu eftir fyrstu skólatöskunni þinni? Samblandi af óútskýranlegri ánægju, stolti og gleði... ásamt leðurlyktinni og myndinni á töskunni :)

[zappa (IP-tala skráð) 29.5.2009 kl. 11:56]

fljótlega ferðu að fá svona flash back of finna brennivíns og bensínlykt líka...

[Jenný Anna Baldursdóttir, 29.5.2009 kl. 12:59]

Hrönnsla: Það var Mjallhvít og dvergarnir sjö.  Jesús.

[Þröstur Unnar, 29.5.2009 kl. 15:46]

Mjallarbónsverksmiðjan var staðsett í vesturbænum við flugvöllin, var það ekki?

[Lilja Guðrún Þorvaldsdóttir, 29.5.2009 kl. 17:11]

Skemmtileg áminning Jenný Anna,  við erum jú að hverfa þetta langt aftur í tímann, hvað varðar gjaldeyrishöft og vöruskort. -

Dóttir mín sem er komin yfir þrítugt sagði við mig í gær!  Oj, mamma þarf maður nú aftur að fara að borða hrogn og lifur í tíma og ótíma. Hún var að rifja upp námsáratímabilið mitt.

[Jenný Anna Baldursdóttir, 29.5.2009 kl. 17:12]

LG: Gafstu barninu hrogn og lifur?  Ésús minn. Hehe.

Þröstur: Man það ekki.  En það lyktaði vel.