Ekta Silfur

Ég verð að óska okkur öllum til hamingju með nýja forsætisráðherrann.

Hvar sem fólk stendur í pólitík eru flestir sammála um að Jóhanna sé strangheiðarlegur stjórnmálamaður.

Svo sjáum við til hvernig til tekst hjá Rauðkunni.

En Silfrið brást ekki frekar en venjulega og á bráðskemmtilegum vettvangi dagsins var það hann Viðar sem kom sá og sigraði vegna þess að hugmyndafræðin hans á alla leið upp á pallborð hér á kærleiks.

Mergur máls er nefnilega að mannfjandsamlegt stjórnarfar sem nú hefur hrunið ofan í hausinn á heiminum snýst ekki bara um peninga.

Það snýst líka um viðhorf til stríðs, svo ég taki dæmi.

Annað dæmi er um afstöðu til náttúruauðlindanna.

Ég er sammála Viðari með að það dugir lítið að setja nokkrar konur hér, einhverja úr grasrót þar til að ná fram róttækum breytingum á samfélagsgrunngildunum.

Hér þarf grundvallar byltingu á hugsunarhætti.

Þeir sem trúa á ofurmátt fjármagnsins eru þeir sem vilja virkja alls staðar sem því verður við komið.

Það eru þeir sem aðhyllast nýfrjálshyggjuna sem gjarnan vilja byggja eiturspúandi stóriðjuver á kostnað komandi kynslóða.  Skammtímagróðinn er þar primus motor.

Og það eru þeir sem trúa á mátt fjármagnsins sem tala fyrir stríði.

Það heitir að fara í stríð til að bjarga einhverjum x-hópi fólks á kostnað annars hóps.

Nú eða vegna trúarbragða.

En hin raunverulega ástæða er hergagnaframleiðsla og landtaka.

Já, mér datt þetta bara svona í hug.

Svo bíð ég spennt eftir sjónkanum kl. 16,00

Jabb, ég geri það.

Ekta Silfur dagsins

Jóhönnustjórnin tekur við undir kvöld

Athugasemdir

[Óskar Þorkelsson, 1.2.2009 kl. 15:01]

Mér finnst silfrið ekki hafa skilað sínu í dag.. fyrir það fyrsta þá gjammar Egill óþolandi oft ofaní viðmælendur sína til að fá þeirra samþykki við hans skoðunum.. hann td þaggaði niður í Svanfríði með gjammi og hún hætti að tala um það sem hún var að reyna að koma á framfæri en fór yfir í samþykkingargírinn við Egil.. Egill verður að fara að læra að vera þáttastjórnandi en ekki miðdepill umræðnanna.

[Björgvin R. Leifsson, 1.2.2009 kl. 15:18]

Verst við Silfrið þykir mér þegar Egill byrjar að gera fólki upp skoðanir, bæði nærstöddum sem fjarstöddum.

[Sigrún Jónsdóttir, 1.2.2009 kl. 15:24]

Viðar var mjög góður og dr. Andrés líka.  Sýnir manni skýrt að leita þarf út fyrir hina hefðbundnu flokka til að nálgast þær breytingar sem þjóðin þráir.

[Marta B Helgadóttir, 1.2.2009 kl. 19:58]

Þoli ekki hve Egill er hlutdrægur þáttastjórnandi, yfirlýsingaglaður og hrokafullur. Tek undir það sem Björgvin segir þarna, hann er verstur þegar hann er farinn beinlínis að tala fyrir viðmælendur sína. Hann er búinn að setja sjálfan sig á stall.

Jóhanna er mín kona! Glæsilegur stjórnmálamaður, gegnumheil og vönduð hugsjónamanneskja. Þeir mættu fleiri vera á hennar level.

[Jenný Anna Baldursdóttir, 1.2.2009 kl. 20:13]

Ég nenni ekki að fara að rífast um persónu Egils.

En hann hefur óumdeilanlega finnst mér, staðið sig mjög vel í að taka nýjan vinkil á umræðuna eftir kreppu.

Hjá honum hef ég sé stóran hluta þess fólks sem nú er hlustað á af alvöru.  Fólk sem ekki sást né heyrðist fyrr en Egill fékk það í þáttinn.

Ég er líka þeirrar skoðunar að það sé bara fínt að hafa líflega stjórnendur sem taka þátt.

Og hroka verð ég ekki var við en öllum eru mislagðar hendur.

Að mínu mati þá er Silfrið dúndur góður þáttur.