"Jag har varit på toiletten i Tivoli"

 

Ég myndi ekki vilja vinna fyrir þessa konu.  Þessa með erfiðu börnin og sjálfa sig í messi.

Hún er þó með góðan húmor, gæti verið gaman að þekkja hana, upp að vissu marki.

Það er samt aldrei að marka svona auglýsingar eftir fólki í "vist". 

Þegar ég var á virkum barnapíualdri þá var það höfuðverkur hvers sumars að komast í vist.

Ég var reyndar heppin, lenti á ágætis fólki oftast þó svona eftir á að hyggja finnist mér út úr kortinu að fólk hafi ráðið mig frá sex ára aldri í barnapíudjobb.

Ég sá ekki upp fyrir barnavagninn þarna í fyrstu vistinni, en vagninn var flottur og ég var öfunduð um allan vesturbæ, bæði Á Hofsvallagötu- og Hringbrautarróló.

Ég fékk einn bláan tuttuguogfimmkrónuseðil fyrir vikuna og það er eina skiptið í lífi mínu sem mér hefur tekist að leggja fyrir peninga.  Ég fékk rosalegt kikk út úr því.  Merkilegt að mér hafi ekki tekist að endurtaka þetta.

Svo fór ég til Köben þegar ég var sautján.  Blómasumarið mikla.  Það fór ekki vel get ég sagt ykkur, þó það hafi akktjúallí líka verið kúl og skemmtilegt.

Ég fór sem blanda af gesti og stugepige hjá sjálfum lögreglustjóranum í Köbenhavn.

Engum aukvisa var treyst fyrir villingnum mér sem þótti til als vís og það með réttu. 

Þar voru engin smábörn, ónei, en hjónin áttu tvo syni, annar var skemmtilegur en sjaldnast heima.  Hinn, hann Morten var nörd og lág í bókum alla daga og átti enga vini.  Ég held að Morten hafi verið smá undarlegur.

Þegar ég var í sólbaði eða að vesenast svona yfirleitt í húsinu þá kom hann aftan að mér.  Hann stóð og glápti eins og hann væri að bíða eftir að ég springi í loft upp eða eitthvað en sagði aldrei orð.  Krípí. 

Svo var mér réttur Manhattan kokteill á hverju kvöldi fyrir mat.  Og annar og annar af því þeim fannst Íslendingurinn svo skemmtilegur rallhálfur með lágmarks þol.

Ég röflaði einhver ósköp og mín uppáhaldssetning var "jag har varit på toiletten i Tivoli". Þvílíkt rugl.

Og ég var snögg að finna mér ábót í vínkjallaranum og man ansi lítið frá seinnipörtum daganna þarna í Valby.

Datt í rúmið á kvöldin nánast rænulaus, en merkilegt nokk þá hafði ég hljótt um mig.

Seinna stakk ég svo af úr þessu endalausa eftirmiðdagspartíi og hélt áfram upp á eigin spýtur við að kanna næturlíf Kaupmannahafnar.

Er það nema von að ég hafi beinlínis setið ofan á dætrum mínum þegar þær voru á þessum aldri.

En engin þeirra reyndist svo með villingagen móður sinnar svo ég hefði getað sparað mér áhyggjurnar.

Framhald seinna.

Nokkru seinna.

Síjú.

 

„Börnin mín eru erfið“

Athugasemdir

[Rut Sumarliðadóttir, 30.8.2008 kl. 15:22]

Var líka barnapía, passaði 3 börn sumarið sem ég varð 9 ára að mig minnir. Var þá þrælvön eftir að hafa keyrt tvíburavagn systra minna og passað litla bróður. Hlít að hafa stýrt eftir minni því ég var næstminnst þegar ég fermdist. Hef varla staðið út úr hnefa á þessum tíma. Þætti ekki gott í dag en við munum tímana tvenna í þessu sem öðru. Ég er amma mín, allavega farin að hljóma eins

[Sunna Dóra Möller, 30.8.2008 kl. 15:25]

Ég passaði líka...sumurin þegar ég var 11 og 12! Mér þótti það svo leiðinlegt að ég var farin að efast um að ég gæti eignast mín eigin börn ! En svo komu þessir molar....og þau eru bara ekkert leiðinleg , ætli það hafi ekki bara verið ég sem var orsökin þarna, ekki börnin !

[M, 30.8.2008 kl. 16:15]

Ég var alltaf passandi bæði systkini og önnur börn. Fór líka til USA að passa. Held ég hafi verið orðin of gömul þá, því mér hundleiddist að passa en naut mín í botn í skemmtunum og félagslífi í frítímanum

[Jóna Á. Gísladóttir, 30.8.2008 kl. 16:46]

Þú hefur verið alveg villt manneskja.

Það er alveg á hreinu að barnapíurnar voru yngri í denn. Kannski vegna þess að það þótti sjálfsagt að eldri systkini pössuðu þau yngri um leið og það eldar var orðið klósettvant. Eða var það bara á biluðum heimilum?

[Stella Rán, 30.8.2008 kl. 21:12]

Ertu viss með villingagenið? Veit mamma þín um allt sem þú gerðir af þér?!! Mömmur fá ekki að vita nema 1/3 af því sem gerist...

[Ester Júlía, 31.8.2008 kl. 09:30]

Skemmtileg færsla! Er þetta í alvöru satt þetta með Manhattan-kokkteilinn!?  Ég á ekki til orð..

Nei ég myndi ekki heldur vilja passa fyrir þessa konu sem  auglýsti eftir barnapíu í vist.  Hún er of hreinskilin til að ég myndi sækja um. Hún vill greinlega hafa varan á svo hún missi ekki stelpuna strax úr vistinni, og ráða vélmenni sem ræður vel við þetta.  Sé fyrir mér rússneska valkyrju í þessu starfi helst einhverja vel agaða sem hefur tekið þátt í kúluvarpi á Olympíuleikunum .