Komasho

Gaman að þessu.  Bensín og díselolían að hækka.  Hva!  Nú verður væntanlega tuðpartí hjá öllum þeim sem eru búnir að andskotans út í mótmæli vörubílstjóranna.

Við erum merkilegir Íslendingar.  Hef sjálf tekið þátt í tuðinu þangað til ég var orðin blá í framan.

Samt hljóta allir að vita, a.m.k. gruna, að samtakamátturinn flytur fjöll.

Dæmi: Fjöldauppsagnir hjúkrunarfræðinga sem áttu að taka gildi 1. maí.  Aðgerðum frestað á elleftu stundu, en frestað samt.

Danir eru duglegir í að taka sig saman, finnist þeim þeir vera órétti beittir.  Frakkar líka og má þá nefna sem dæmi vörubílstjórana sem blokkera heilu þjóðvegina og almenningur fylgir þeim að málum, styður þá, enda grunar hinn almenna borgara kannski, að hagsmunir okkar, venjulegs fólks, hanga saman þegar allt kemur til alls.

Nú þegar bílstjórarnir hafa verið að mótmæla, þá bloggar hver beturvitringurinn á fætur öðrum um hversu helvíti böggandi þessir bílstjórar eru.

Sumir gefa góð ráð, sko þeir eiga að skilgreina sig betur, mótmæla þessu en ekki hinu og áfram og áfram.

Mikið skelfing er ég til í að mynda þrýstihóp til lækkunar matvæla.  Til styttingar biðlista á hinar ýmsu stofnanir og ég gæti endalaust talið upp.

En við byrjum á matarverðinu.

Einhver?

Allir hækka bensínið

Athugasemdir

[Hrönn Sigurðardóttir, 29.4.2008 kl. 11:58]

Ójá! Mér verður stundum hugsað til Frakklands - þar sem heilu vegunum er lokað með bílförmum af tómötum og gúrkum ef þeim mislíkar.

Enginn þar er að missa sig af áhyggjum yfir að sjúkrabílar komist ekki leiðar sinnar - eða hvort þingmenn þurfi að komast á slysó

Legg til að Íslendingum verði gefið franskt blóð! 

[Hólmdís Hjartardóttir, 29.4.2008 kl. 11:58]

skráðu þig hjá ns.is í sjálfboðaliðastörf......ég gerði það. Og svo allir í 1. maí göngu.

[Ásthildur Cesil Þórðardóttir, 29.4.2008 kl. 11:59]

Mikið rosaleg er ég sammála þessari færslu frá A til Ö.  Og ég væri avleg til, það er bara spurning um hvernig hægt er að bera sig að.  Ég styð bílstjórana líka alveg, og finnst undarlegt hve sumt fólk tuðar og suðar bara ef það kemst ekki nógu hratt milli staða.  Það vantar oft svo mikið á að fólk líti á heildarmyndina, menn eru alltar að horfa á nefbroddinn á sjálfum sér.  Meðan það er GERIST EKKI NEITT, BARA SVO ÞAÐ SÉ Á HREINU.

[Birgitta Jónsdóttir, 29.4.2008 kl. 12:18]

við getum alltaf riðið á vaðið:) ef við gerum eitthvað og segjum frá því þá er mögulegt að það hvetji aðra til að gera hið sama...

fólk þarf alltaf forustusauði... svo mikið er víst.

góður punktur Hólmdísi að skrá sig á ns.is ... neytendur eru jú við:)

[Ragnheiður , 29.4.2008 kl. 12:25]

Málið er einfalt. Frá áramótum hefur hækkað um tæp 20% dísilolían á leigubílinn minn. Við getum ekki hækkað taxtann eins og sakir standa, við ætlum að bíða og sjá. En ef þetta verður viðvarandi þá verður ekki undan því vikist. Það verður náttlega þá enn einn bagginn sem velt verður á neytendur þessa lands.

Og á meðan enginn gerir neitt þá gerist ekki neitt.

[Sigrún Jónsdóttir, 29.4.2008 kl. 12:34]

Ég tók smá tuð-stuð í gær, en í dag reyni ég að safna liði í 1. maí kröfugönguna og gengur bara ágætlega.  Hef fengið ótrúlega góð viðbrögð frá fólki, sem áður og fyrr hefði ekki látið sjá sig í svona "kommagöngu"!

[Huld S. Ringsted, 29.4.2008 kl. 12:36]

Lítil fugl hvíslaði því að mér um daginn að bændur ætluðu að fjölmenna með skítadreifarana einhvern daginn fyrir framan alþingi og tæma þá þar, þeir eru nefnilega líka óánægðir með olíuverðið, kannski eru svona aðgerðir það eina sem dugar. Ég ætti kannski að smala saman sjómönnum til að mæta með heilu bílfarmana af glaðning. Það vantar alla samstöðu í Íslendinga. Ég er með í svona þrýstihóp.

Á meðan ætla ég að fara að kaupa mér hjól og tilkynna liðinu að héðan í frá sé bara vatn og brauð í matinn 

[Jenný Anna Baldursdóttir, 29.4.2008 kl. 13:50]

Takk fyrir komment stelpur.

Ragga: Það er ekki auðvelt að vera með atvinnutæki sem gengur fyrir rándýru bensíni eða díselolíu.  Ég hélt satt að segja að það kæmi ekki hækkun ofan í ófriðinn sem ólgar undir yfirborðinu.

[Lára Hanna Einarsdóttir, 29.4.2008 kl. 14:17]

Ég sá frétt á Sky í dag þar sem sagt var frá methagnaði BP og Shell...  í Bretlandi væntanlega, en samt...

[Lilja Guðrún Þorvaldsdóttir, 29.4.2008 kl. 15:57]

Mætum í kröfugönguna 1. maí  með kröfuspjöld. - Það er þó byrjunin.

[Hildigunnur Rúnarsdóttir, 29.4.2008 kl. 19:56]

Allir hækka - og svo er talað um enneinn, skeljung og olís. Er Atlantsolía ekki til hjá mogga? Og hafa þeir hækkað?