Leita í fréttum mbl.is

Bloggfærslur mánaðarins, maí 2007

IMPREGILO - ENN EINN HROÐINN

1

Enn einu sinni heyrir maður ljótar sögur frá fyrirkomulaginu á Kárahnjúkum.  Hrafndís Bára Einarsdóttir, fyrrverandi starfsmaður öryggisdeildar Impregilo, tekur undir ásakanir portúgalsks verkamanns í fjölmiðlum heimalandsins.  Hún talar líka um kynferðislega áreitni þar efra og fleira miður fallegt.

Það er alveg sama hvaða hroðbjóður kemur fram um vinnuaðstæður undir stjórn Impregilo, þeir kannast aldrei við neitt.  Það ætti samt öllum sem vilja á annað borð vita, vera ljóst að það er eitthvað meira en lítið að aðbúnaði og framkomu þessa fyrirtækis við starfsmenn sína.  Hversu mikið þarf að ganga á áður en íslendingar taka sig til og rannsaka hvernig háttsemi fyrirtækisins gerir sig raunverulega við Kárahnjúka?  Svo er það auðvitað ljóst að þetta fyrirtæki er ekki þekkt að mannúð annars staðar sem það hefur borið niður í heiminum.

 


mbl.is „Vildi ekki leika hetju"
Tilkynna um óviðeigandi tengingu við frétt

MIKLAR VÆNTINGAR FRÁ ALMENNINIGI!

Nú er ég komin með sumarstarfsmanninn á stjörnuspá Moggans í gjörgæslu.  Í dag toppar viðkomandi starfsmaður sjálfan sig í fyrirheitunum.

"Steingeit: Þú ert fær með tölur og færð snilldarhugmynd til að bæta núllum aftan við launin þín. Væntingar almennings skipta miklu í framkvæmdum þínum."
Halló, halló ég hef aldrei verið fær með tölur, þvert á móti er ég með upphæðafóbíu og kann varla að reikna (eða þannig).  Hér mun ég fá snilldarhugmynd til að bæta núllum aftan við launin mín.  NÚLLUM ekki einu heldur mörgum.  Mér finnst þetta vera ábending til mín að ræna banka eða aðra peningastofnun.  Hafi ég ekki verið viss þá varð ég þess fullviss þegar ég las afganginn af stjörnuspánni um væntingar almennings sem skipta miklu í framkvæmdum mínum.  Það munar ekki um það.  Þetta er örgla rán sem ég á að fremja.  Svona stikkemup fyrirkomulag.  Almenningur á peninga í banka, það hlýtur að skipta hann miklu ef einhver rænir þær stofnanir.
En bíðið þið aðeins við.  Kannski er þetta Glitnistilboð.  Eins og Ellý og fl. fengu!  OMG ætli það bæti MÖRGUM núllum aftan við launin? Nú sé ég þetta kýrskýrt.  Ég fæ tilboð frá Glitni og auðvitað skiptir það almenning miklu máli ef þeir græða háar fjárhæðir þegar þeir auglýsa á síðunni minni.
Sorry sumarstarfsmaður.  Nú rek ég húsbandið úr símanum.  Ætla að vera tilbúin þegar þeir hringja.

KOMIN MEÐ STUBBANA Á HEILANN

Vissuð þið að umboðsmaður barna í Póllandi er hætt við að láta sálfræðinga rannsaka áhrif Tinky Winkys með handtöskuna, á börn?  Hvernig skyldi nú standa á því?  Ætli einhver hafi hringt í hana í ofboði þegar fréttin um vitleysuna í henni flaug um heimsbyggðina og sagt við hana t.d. "Umboðska! Ekki gera okkur að algjörum fílfum, hættu við, Pólland er orðið að athlægi út um víðan heim".  Sennilega eða þá að það hefur runnið upp fyrir henni ljós. Ég veit ekki og mér er sama.  Ég mun aldrei gleyma Fröken umboðsmanni Polski sem var með alvöru áhyggjur af engu á meðan Pólland er allt löðrandi í félagslegum vandamálum og ekki nokkur leið að fara að telja þau öll upp hér.

 


ÁGÆTIS BYRJUN!

1

Mér fannst það fín byrjun hjá ISG, utanríkisráðherra, að segja okkur að hún væri ekki hlynnt hvalveiðum.  Hún sagði jafnframt að það væri ekki hægt að fórna minni hagsmunum fyrir meiri.  Ég er svo algjörlega sammála Sollu.  Þessar hvalveiðar eru fráránlegar.  Við höfum dagað uppi eins og náttröll, veiðandi hvali sem enginn hefur áhuga á að kaupa.  Mikið skelfing finnst mér það hallærislegt að við skulum vera að ögra alþjóðasamfélaginu með þessum hætti.  Við erum í sandkassaleik.  Ég reikna með að utanríkisráðherra geri eitthvað í málunum.  Reyndar trúi ég því og treysti.

BS, viðskiptaráðherra var líka með góðar fréttir í fréttatímanum í kvöld.  Hann getur hugsað sér lög um kynjakvóta í stjórnum fyrirtækja, t.d.  Til að gera róttækar breytingar þarf að grípa til róttækra aðgerða sagði maðurinn.  Mikið skelfing var fréttatíminn ánægjulegur í kvöld.

Muhahahahaha..


TÍU-NÚLL FYRIR SVÍÞJÓÐ..

Legally Blonde

..fyrir að senda ekki Fröken Svíþjóð (sem er á myndunum hér fyrir ofan) í alheims fegurðarsamkeppnina sem haldin var í gær.  Ég er hætt að reyna að vera kurteis þegar keppnir í fegurð eru annars vegar og er komin með þær upp í kok.  Hvernig dettur einhverjum í hug í nútímanum að halda þessari vitleysu áfram?  Að viðhalda staðalímyndunum, hlutgera konur, vega þær og meta upp á  mm er svo mikið stílbrot að það er ekki vinnandi vegur að mæla því bót. 

Jájá konur sem eru á móti keppnum í fegurð eru afbrýðisamar, ljótar, feitar, gamlar, vitlausar, nöldurtýpur, femínistar (þú getur bölvað þér upp á það) og fleiri hugtök og orð sem notuð eru sem neikvæð lýsingarorð yfir konur með skoðanir á þessum tilteknu uppákomum.  Af hverju má stúlka í fegurðarsamkeppni ekki eiga barn?  Er það fantasían um Lolítu sem þar ræður för?  Er það kannski draumurinn um hina óspjölluðu mey?  Það væri áhugavert að fá svar við því.  Þær mega ekki hafa farið í lýtaaðgerð hm.. nema kannski brjóstastækkun, þær eiga að vera með sína náttúrulegu fegurð.  Hvað er náttúrulegt við að ganga um á sundbol fyrir fleirhundruð manns?  Eða að klæða sig í galakjóla og ganga á pinnahælum þegar stúlka er á aldrinum 17-20 ára?  Kvöl og pína, niðurlæging og hallærislegheit.

Ungfrú Ísland er ákaflega falleg stúlka.  Mér finnst hún eiga allt gott skilið.  Þessi gagnrýni beinist ekki að stúlkunum persónulega. 

 


STELPAN MÍN FLOGIN Á BRAUT..

Andrea bestavinkona og Maysubarnið á góðri stund.

..en hún er u.þ.b. að fara í loftið núna.  Búhú!  Þetta var stutt gaman en svakalega skemmtilegt en mamman verður alltaf smá döpur þegar stelpan hennar fer aftur heim.  Nú er það London næsta hjá mér eins fljótt og auðið er.  Oliver og Robbi verða lengur sem nemur tveimur dögum og það er auðvitað yndislegt.

Í matarveislunni stóru í gær sem taldi 12 manns var mikil háreysti, talað og hlegið, borðað og drukkið (kaffi og meððí).  Tíminn líður bara svo fljótt þegar allt er skemmtilegt og eins gott að reyna að frysta augnablikin og geyma þau innra með sér.  Jenny hrinti Oliver (hún setti sig þess vegna sjálf í skammarkrók) en ég held að það hafi hlaupið lítill villingur í stelpuna því Jenny veit auðvitað,  að maður er góður við börn.  Oliver fór að gráta smá en hann er svo duglegur að hann jafnaði sig fljótt.  Svo fóru þau í ömmurrrrúm og hoppuðu þar og borðuðu ís (ójá það gerðu þau) og Jökull stóri frændi leit eftir þeim svo þau færu sér ekki að voða.

En nú er Maysan mín flogin, enn einn ganginn.  Svona er lífið.  Búhú!


VEL SLOPPIÐ..

1

..hjá tveimur örvitum sem Héraðsdómur Norðurlands vestra hefur sektar um samtals 350 þúsund krónur fyrir að hafa staðið að áfengisveitingum gegn gjaldi á skemmtistað á Sauðárkróki nokkur kvöld í mánuði á árunum 2004 til 2005 án lögboðins vínveitingaleyfis.  Það er þó ekki það sem gerir þá að fíflum í mínum huga og að stórhættulegum mönnum, þar að auki,  heldur sú staðreynd að annar maðurinn var einnig sakfelldur fyrir að hafa látið birta í héraðsdagskránni Sjónhorninu auglýsingu um keppni í áfengisdrykkju.  Síðan veittu þeir í keppninni umtalsvert magn áfengis gegn gjaldi til þriggja einstaklinga sem ekki höfðu náð 20 ára aldri og tóku þátt í drykkjukeppninni.

"Keppnin fólst í því hver keppenda gæti innbyrt flest Ópal- eða Tópas-vodkaskot með 27% vínandastyrkleika. Afleiðingarnar urðu þær að unglingarnir þrír voru fluttir á sjúkrahús vegna ofneyslu áfengis."

Hvað er á milli eyrnanna á fólki?  Sumir gera allt til að selja jafnvel þótt það geti kostað mannslíf.  Að hvetja til drykkjukeppni er ekki aðeins stórhættulegt heldur bætist við þarna að unglingar voru að taka þátt og allir voru þeir fluttir á sjúkrahús vegna ofneyslu. Ef mitt barn ætti þarna í hlut væri ég að gera eitthvað annað en blogga get ég sagt ykkur.  Arg.. hvað ég myndi leggja á mig til þess að svona fólk fái ekki að höndla með áfengi.  Siðleysið er stundum algjört.


mbl.is Sektaður fyrir að standa fyrir drykkjukeppni
Tilkynna um óviðeigandi tengingu við frétt

Í MATARBOÐINU Í GÆR...

 11

...sem var hreint svakalega skemmtilegt og á eftir að verða mér innblástur til blogga um langa framtíð (róleg á dramanu kona) gerðist sá merki viðburður að í miðri "grillun" á kjöti, varð gaskúturinn tómur og allt fór í steik (í orðsins örgustu).  Neh.. sendur var maður eftir grillkút, matur frestaðist um hálftíma eða svo og allir fengu að borða í fyllingu tímans.  Þetta eru jafn merkileg tíðindi og að Tinky Winky geti mögulega verið samkynhneigður karlmaður með handtösku og sent litlum óvitum dulin skilaboð um hommaskap.

Þessi siðlausa fjölskylda sem ég tilheyri létu sig ekki muna um að láta Jenny og Oliver leika sér með þennan klámfengna viðbjóð því þau voru með hina rauðu Lala á milli sín og ekki kjaftur svo mikið sem roðnaði yfir þessum óþvera.  Lala var það að auki uppblásin.  Fruuuuuuussssss...

Meira seinna.


HVAÐ ER ÞETTA "ÞAÐ"??

Einu sinni enn hef ég fallið í stafi yfir dásamlegri hnyttni, gífurlegri máltilfinningu og þýðingarhæfileikum sumarstarfsmannsins sem vinnur við stjörnuspána á Mogganum.  Þessi sumarafleysingamaður er svo skemmtilegur að ég er farin að lesa spána reglulega, hvað ég aldrei gerði áður.  Í dag (þ.e. mánudag) hljóðaði spáin fyrir steingeitina svona:

"Þú ert til staðar fyrir aðra. Þeir segjast ekki geta framkvæmt "það" án þín, en þér er kannski meira sama um "það" en þeim. Vertu því til staðar fyrir sjálfan þig."

Nú þegar ég stefni í að fara að halla mér bráðum þ.e. ef mér tekst að halda gleði minni yfir þessum djúpu spádómsorðum í skefjum og til að geta sofnað langar mig svo að vita hvað "ÞAÐ" er. 

Einhver???

P.s. Ég set ykkur inn í veisluhöld og gestagang dagsins fljótlega en nú ætla ég blogghringinn og fara svo að halla mér.  Er búin á því eftir skemmtilegan dag.

Gúddnætgæs!


NÚ FRÍKA ÉG ÚT..ARG!!

 Nú held ég að ég leggist fyrir og brjálist í rólegheitunum.  Pólsk yfirvöld rannsaka hvort Stubbarnir séu samkynhneigðir.  Það er þó sérstaklega Tinky Winky sem liggur undir grun.  Hann muni vera karlkyns og með handtösku!  Guðminngóðuríhimnum! Það er stórhættulegt að sýna börnum karlkyns dúkku með handtösku.  Það getur beinlínis haft geigvænleg áhrif á börn, gert þau að hommum og kannski lesbíum líka.  Hversu örvita er hægt að vera? Þarna er umboðsmaður barna greinilega með vitsmunaprósentu langt undir stofuhita. 

"Talið er að hinn breiði og fjólublái Tinky Winky sé karlkyns, en hann ber hinsvegar handtösku.„Ég hef heyrt að þetta gæti verið leynileg vísun í samkynhneigð,“ segir Sowinska.!

Svona stór eru vandamálin í Póllandi í dag!


mbl.is Pólsk yfirvöld rannsaka hvort Stubbarnir séu samkynhneigðir
Tilkynna um óviðeigandi tengingu við frétt

« Fyrri síða | Næsta síða »

Höfundur

Jenný Anna Baldursdóttir
Jenný Anna Baldursdóttir

Bara eins og ég kem fyrir af skepnunni.  Er með róttæka vinstri slagsíðu, með fagurgrænu ívafi ásamt femínískum töktum þegar við á.  Ég bít ekki.  Eða bít ég?  Það fer tvennum sögum af því. 

jennfo.baldursdttir@gmail.com

Heimsóknir

Flettingar

  • Í dag (29.3.): 0
  • Sl. sólarhring: 9
  • Sl. viku: 16
  • Frá upphafi: 0

Annað

  • Innlit í dag: 0
  • Innlit sl. viku: 16
  • Gestir í dag: 0
  • IP-tölur í dag: 0

Uppfært á 3 mín. fresti.
Skýringar

Mars 2024
S M Þ M F F L
          1 2
3 4 5 6 7 8 9
10 11 12 13 14 15 16
17 18 19 20 21 22 23
24 25 26 27 28 29 30
31            

Innskráning

Ath. Vinsamlegast kveikið á Javascript til að hefja innskráningu.