Úr lánabók Kaupþings í DV í dag

 

Um daginn gerðist ég áskrifandi að DV.

Hefði aldrei trúað að sá dagur ætti eftir að renna upp enda var blaðið á vafasömum slóðum um tíma.

En nú orðið finnst mér þeir standa sig afskaplega vel.

Í blaði dagsins er fyrsta umfjöllun af mörgum úr lánabók Kaupþings 2006.

Kristján Arason og frú eru í umfjöllun dagsins.

Lán Kristjáns (niðurfellt) var upp á litlar 893 milljónir króna.

Ásamt með þáverandi yfirlögfræðingi bankans Helga Sigurðssyni sem gaf stjórninni grænt ljós á að fella niður persónulegar ábyrgðir starfsmanna út af lánveitingunum.

Helgi Sigurðsson, sem sjálfur segist ekki gefa upp neitt um eigin fjármál, telur þau einkamál, skuldaði sjálfur um 450 milljónir króna samkvæmt lánabókinni.

Ég veit ekki með ykkur en ég er algjörlega yfir mig gáttuð á þessu framferði peningagræðgismannanna.

Og er það ekki sjúkt að varaformaður Sjálfstæðisflokksins skuli nú fara fram með hrópum og köllum gagnvart ríkisstjórn landsins sem þarf að þrífa upp eftir hana og eiginmanninn og aðra græðgifursta í Kaupþingi?

Á næstu dögum mun DV birta frekari upplýsingar úr lánabókinni.

Það kemur líka fram að með þessu kann blaðið (ritstjórnin) að baka sér refsiábyrgð vegna brots á bankaleynd (þið munið Egil Helgason sem á yfir höfði sér kæru fyrir sama brot).

En okkur almenningi kemur við hvers vegna svona er komið fyrir okkur.

Takk DV fyrir að leiða okkur í sannleikann um þessi mál.

Áhugi á að ljóstra upp sannleikanum um athæfi bankavíkinganna hefur verið í sögulegu lágmarki.

Urrrrrr

Athugasemdir

[Sigurður Þórðarson, 30.6.2009 kl. 10:02]

Skattur af arði er 10%

Hvað ætli Kristján hafi fengið mikinn arð af þessum bréfum, sem hann borgaði aldreieina krónu fyrir?

[Þór Ludwig Stiefel TORA, 30.6.2009 kl. 11:10]

Já hægt og rólega eru hlutirnir að koma í ljós. Og hugsanlega refsivert að birta XXX. Maður veit ekki hvort maður á að vera algerlega vonlaus eða brjálæðislega reiður argh...

[Sigurður Þorsteinsson, 30.6.2009 kl. 11:15]

Jenný Anna og Reynir Trausta. Það að taka menn niður. Annars hver á DV? Það kæmi á óvart að það liðist í nágrannalöndunum, ,að útrásarvíkingarnir sem settu þjóðina á hausinn fengju að eiga fjölmiðla til þess að hreinsa til eftir sig. Þér finnst það  í lagi. Aðeins 4,1% þjóðarinnar telja þetta blað trúverðugt. Þú verður svo að meta hvort þér finnst það styrkur eða veikleiki að tilheyra þeim hópi.

[Heiða B. Heiðars, 30.6.2009 kl. 11:24]

Sigurður; Hvaða andskotans máli skiptir það í stóru myndinni? Hverjir eiga Moggann?

Ef einhver miðill er að standa sig í því að fletta ofan af þessum krimmum þá er það DV. Og mér gæti ekki staðið meira á sama um eignaraðild á meðan svo er. Hvaða miðli treystir þú? Er einhver miðill á Íslandi sem er ekki undir vafasömum stjórnendum?

[Finnur Bárðarson, 30.6.2009 kl. 11:31]

Sigurði hugnast ekki þessi uppljóstrun það er greinilegt.

[Jenný Anna Baldursdóttir, 30.6.2009 kl. 11:47]

Sigurður: Þú segir: "Það kæmi á óvart að það liðist í nágrannalöndunum, ,að útrásarvíkingarnir sem settu þjóðina á hausinn fengju að eiga fjölmiðla til þess að hreinsa til eftir sig. Þér finnst það  í lagi."

Bíddu hvar segi ég að mér finnist í lagi að útrásarvíkingar eigi fjölmiðla?

Hvergi held ég en það breytir ekki því að þessi umfjöllun er góðra gjalda verð og nauðsynleg þar að auki.

[Guðrún (IP-tala skráð) 30.6.2009 kl. 11:53]

Þetta sýnir að Þorgerður laug í ræðu fyrir kosningar. Þar sagði hún að ekkert hefði verið niðurfellt hjá þeim hjónum.

Mér finnst þetta synd því ég trúði því í alvöru einu sinni að Þorgerður væri boðlegur stjórnmálamaður þótt hún væri í Sjálfstæðisflokknum. 

Mér hugnast þessi uppljóstrun vel sem og aðrar sem koma upp um spillingu en ég er á þeirri skoðun að það er hægt að finna spillingu hjá öllu háttsettu fólki.

Fjölmiðlar og eigendur þeirra ákveða bara hverja skal skjóta niður. 

[Lilja Guðrún Þorvaldsdóttir, 30.6.2009 kl. 19:24]

Ég er í svo miklu sjokki að ég get bara ekkert sagt, svo brugðust krosstré sem önnur tré.

   En það er rangt hjá þér Guðrún, að halda því fram að "allir háttsettir" aðilar séu spilltir. Nema þú sért þar með að verja spillinguna, það sé allt í lagi að vera spilltur afþví allir aðrir eru það líka.  Þvílíkt bull!

  Þú hljómar eins og íhaldið forðum sem ávallt hélt því fram þegar sjálfstæðismenn gerðu eitthvað misjafnt:  Æ, það er sama rassgatið undir þeim öllum, svo var farið á kjörstað og íhaldið kosið, eins og menn voru vanir.