Veður

 

Það er verið að malbika götuna mína.

Það lyktar allt af brenndu gúmmíi.

Hvar er gamla tjörulykt bernsku minnar?

En hei, krakkar, hvað er þetta með sumarið?

Ég er ekki vön að fara á samskeytunum vegna veðurfars, elska veturinn og haustið en síður vorið.

Þetta er algjört kreppusumar í veðurfari.

En sumur bernsku minnar voru sólrík.

Lykt af nýslegnu grasi, vínarbrauði, Sínalkói og bragð af rykugum rifsberjum stolnum úr görðum Ásvallagötu og Hringbrautar.

Ég er farin að skilja gamla fólkið sem oft talar um að hlutirnir hafi verið betri hér áður og fyrr.

Og nú langar mig í apótekaralakkrís.

Úr Vesturbæjarapóteki takk fyrir.

 P.s. Myndin er frá Nauthólsvík, árið 1966, tekin frá Ljósmyndasafni Reykjavíkur.

Verður 20 stiga múrinn rofinn?

Athugasemdir

[Hrönn Sigurðardóttir, 24.6.2009 kl. 12:23]

Allir á Egilsstaði!!

Flott mynd ert þú á henni?

[Jenný Anna Baldursdóttir, 24.6.2009 kl. 17:11]

Nei ég er ekki á henni kona.

Var úlli á þessum tíma, með gígantískt attitjút.

[Sigurður Þór Guðjónsson, 24.6.2009 kl. 18:58]

Veðrið í bernsku okkar var gott en síðustu sjö áar hefur það oftast verið enn betra!

[Jenný Anna Baldursdóttir, 24.6.2009 kl. 20:36]

En Sigurður, hvernig kemur þessi júní út sem af er í meðaltalinu.

Ég er búin að vera að drepast úr kulda nánast allan mánuðinn.

[Sigurður Þór Guðjónsson, 24.6.2009 kl. 21:38]

Já, það er það sem öllum finnst og mér líka, að það sé kalt. En sannleikurinn er samt sá að hitinn er yfir meðallagi það sem af er, þurrviðrasamt og fremur sólarlítið en ekkert samt afskaplega miðað við það sem gerist. Það sem ég held að geri það að öllum finnst kalt er það að hitinn hefur verið ótrúlega jafn, alltaf um eða rétt yfir meðallagi en ð vantar verulega hlýja daga sem oftast koma innan um kaldari daga. Það eru þeir sem skapa tilfinningu fyrir sumri en núna vantar þá alveg. Síðustu daga hefur svo verið að kólna fremur en hitt í Reykjavik. En samkvæmt spám hlýnar almennilega um helgina. Sumarið er að koma!

[Jenný Anna Baldursdóttir, 24.6.2009 kl. 22:17]

Takk fyrir þetta Sigurður.  Ég er ennþá að drepast úr kulda.

Guði sé lof fyrir flísteppið mitt.