Tíska í jólum, tíska í kjólum

 

Það eru nákvæmlega 53 dagar til jóla.  Teljarinn minn segir það.  Það er ofboðslega huggulegt að vera með jólateljara á síðunni, þá getur maður tekið statusinn á hátíðinni allan ársins hring. 

Hvað um það.  Samkvæmt manninum í jólahúsinu fyrir norðan, er afa og ömmu jólaskraut það sem blívur í ár.  Allt annað hlýtur þá að vera hallærislegt, samkvæmt tískulögmálinu.  Gærdagurinn gamlar fréttir.

Ég hló illkvittnislega, þegar ég las þetta um jólaskrautstískuna árið 2006.  Ég veit ekki hvort þið munið það, en í fyrra voru allir sem vildu tolla í skreytingatískunni með svart jólaskraut.  Ég hef sjaldan séð það ljótara.  Ég fór í banka daginn fyrir Þorláksmessu og hélt að það hefði kviknað í jólagreininni sem hékk fyrir ofan hausinn á gjaldkeranum.   Ég leit í kringum mig í bankanum og sjá, allt lókalið var löðrandi í brunarústajólatrjám. Við eftirgrennslan fékk ég að vita að skreytingameistari bankans hafi valið tískuþema ársins, svart.  Svo jóló eitthvað.  Það sem fær mig til að krimta af Þórðargleði er tilhugsunin um alla jólatískunördanna sem sitja uppi með viðbrennda jólaskrautið sitt síðan í fyrra, lalalala.

 Jólakjólarnir verða svartir í ár.  Brunarústir þar, en það er í lagi.  Ef einhver ætlar að segja ykkur annað um kjólana sko, ekki hlusta, hér er það ég sem legg línurnar.

Gleðilega hátíð.

Úje

Leitað að jólaskrauti afa og ömmu

Athugasemdir

[Katrín Snæhólm Baldursdóttir, 31.10.2007 kl. 01:25]

Skarutlegar konur þurfa ekkert nema svartan einfaldan kjól um jól til að skína eins og jólastjörnur en jólin þurfa sitt græna greni og tindrandi jólaliti. Svart jólaskraut er bara eins og svarta tennur eða eitthvað. Jæks....

[Kolgrima, 31.10.2007 kl. 02:00]

Voðalega farið þið seint að sofa Góða nótt!

[Ester Júlía, 31.10.2007 kl. 07:45]

 Sammála þér með svarta jólaskrautið í fyrra, þvílíkur horbjóður.  Jólin eiga að vera hlý og kósý, það er bara ekkert hlýtt og kosý við svartan lit.   Jólaknús til þín

[Sunna Dóra Möller, 31.10.2007 kl. 08:00]

Ó hvað ég er sammála þér, svart jólaskraut er bara skerí, það á að vera rautt og grænt og gyllt og svo á að vera fullt af kertum!

Ég er farin í geymsluna að skoða skrautið mitt...!

Jólknús í krús!!

[Markús frá Djúpalæk, 31.10.2007 kl. 08:32]

Það er eiginlega bara þannig að jólin og allt í kringum þau mega ekkert breytast að ráði. Þetta er eitt af þessu óumbreytilega í veröldinni, fátt eftir af slíku og jólatízkugúrúin geta bara troðið sínu tízkujólaskrauti þangað sem það ekki sést.

[Jónína Dúadóttir, 31.10.2007 kl. 08:34]

Svart skraut er ekki jólaskraut í mínum augum, bara eitthvað svona skraut... og ég á bara svarta kjóla þannig að ég verð ekki í neinum vandræðum með að tolla í jólakjólatískunni í ár

[Dísa Dóra, 31.10.2007 kl. 08:51]

Sammála þér með að þetta svarta skraut er og var bara algjör horbjóður.  Reyndar hefur mér sýnst á auglýsingum til dæmis frá IKEA að fjólublátt sé málið í ár og ekki er það mikið betra en þetta svarta.

[Hugarfluga, 31.10.2007 kl. 09:17]

Svart jólaskraut er álíka jólalegt og bláar páskaliljur eru páskalegar. 

[Jenný Anna Baldursdóttir, 31.10.2007 kl. 09:33]

Fluva: Eru til bláar PÁSKALILJUR?

Góðan daginn annars, og förum að baka jólasmákökur.

[krossgata, 31.10.2007 kl. 09:54]

Ég hef alltaf verið svolítið treg í taumi þegar kemur að tískustraumum og algerlega eins og staður hestur ef jólatískan sveigist eitthvað í undarlegar áttir eins og að svörtu.  Sit því uppi með fullt af jólalegu jóladóti, en er algerlega á skjön við meginstrauminn svörtu árin. 

Var annars að velta fyrir mér þessu orði "horbjóður".  Hvernig er það til komið, úr viðbjóður og ?

[Hildigunnur Rúnarsdóttir, 31.10.2007 kl. 10:45]

haha, hjó líka eftir þessu með horbjóðinn. Ef ég sný út úr viðbjóði segi ég frekar hroðbjóður (hroði/viðbjóður)

[Jenný Anna Baldursdóttir, 31.10.2007 kl. 10:57]

Já Hildigunnur, það á að vera hroðbjóður auðvitað.  Annars má þetta vera að vali, vegna þess að þetta er heimatilbúið orð, örgla orðið til við eitthvað eldhúsborð þar sem konur drukku kaffi og voru í kjaftastuði.