ÉG OG ÚTLITIÐ

 

Það er til tíska í förðun.  Já, já, auðvitað veit það hvert mannsbarn.  Allskonar litanúansar í augnskuggum, blýöntum og varalitum.  Já og litasétteringar í meiki.  Ég er löngu hætt að fylgjast með, breyti helst ekki um andlit ef ég kemst hjá því, nóg er um árhringjaframleiðsluna í smettinu á mér, með öllum þeim breytingum sem hún orsakar. Ég legg ekki meira á ykkur.

Svo eru andlit í tísku líka.  Mikið máluð, lítið máluð (aldrei ómáluð), þykjustunni fersk andlit og mismunandi mjó andlit.  Stundum er hungursvipurinn að gera sig í tískuheiminum og þá á kona að líta út fyrir að nærast á sólarljósinu einu saman, hún á að vera kinnfiskasogin og með önnur merki örbirgðar í andlitinu.

Ef að fölleitar konur með bauga undir augum kæmust í tísku á þessu laugardagskvöldi þá yrði ég andlit kvöldsins.  Jafnvel mánaðarins, svei mér þá.

Hvernig stendur á því að ljótan getur heltekið mann svona algjörlega óforvarandis án þess að maður hafi unnið sér inn fyrir því á nokkurn hátt?  Hér hef ég verið bláedrú, er útsofin og borða eins og meinlætamaður en samt, hm...  Hvað veldur?

Er farin í andlitsbað, strekkingu og augnuppskurð.

Síjúgæs!

 

Athugasemdir

[Þuríður Björg Þorgrímsdóttir, 8.9.2007 kl. 23:22]

Dó ... Er til tíska í andlitsmálningu?? Úps... Annars hef ég aldrei skilið konur sem geta ekki farið út úr húsi án þess að setja á sig maskara eða varalit...

[Guðríður Haraldsdóttir, 8.9.2007 kl. 23:40]

Ljót miðað við ... ????? Knús til þín, sætust!

[Hrönn Sigurðardóttir, 8.9.2007 kl. 23:43]

[Ásdís Sigurðardóttir, 8.9.2007 kl. 23:51]

Ekki er ég nú dugleg í málningadeildinni, held ég hafi meikað mig 5 sinnum um ævina og nota svo kalda vatnið sem hreinsikrem. Við erum lang sætastar punkur og pasta.

[Bjarndís Helena Mitchell, 8.9.2007 kl. 23:54]

Æ, svona hellist yfir mann einstaka sinnum. Svo er málið bara að dekra pínu við sig, brosa síðan í spegilinn og svo framan í heiminn. Þá líður þetta hjá held ég.

[Edda Agnarsdóttir, 9.9.2007 kl. 00:05]

Ég kem með þér! En ég ætla að byrja á tönnunum svo ég verði ekki kinnfiskasogin.

[Jenný Anna Baldursdóttir, 9.9.2007 kl. 00:23]

Híhí, ég er hin sprækasta sko en assi hreint veikindaleg í framan, það verður að segjast!

[Rebbý, 9.9.2007 kl. 01:01]

við erum lang flottastar ómálaðar og með hláturhrukkurnar í tugatali
þannig kýs ég allavega enn að sjá málið

[Ólína Kjerúlf Þorvarðardóttir, 9.9.2007 kl. 03:01]

Jamm, þið segið það.

Satt að segja - svona í fullum trúnaði - þá hef ég ALDREI farið ómáluð út fyrir hússins dyr frá því ég var 13 ára gömul. Hananú! Gæti allt eins farið ALLSBER út í búð eins og maskaralaus.

En þetta er nú bara svona okkar á milli - eða þannig - hefur EKKERT með fyrirmyndir að gera. Bara sjálfsmyndina. Ég vil nefnilega hafa áhrif á hana SJÁLF.

[krossgata, 9.9.2007 kl. 03:08]

Ég fer afar sjaldan af bæ án maskara, oft nota ég smá augnblýant líka.  Mér finnst augun mín falleg og þau verða svipsterkari ef ég mála þau aðeins í kring.    Þá verð ég ánægðari með mig.

Ég nota varalit svona á 2ja ára fresti og meik svona 2svar á ári.  Aldrei komist upp á lag með þetta tvennt eða öllu heldur aldrei líkað þetta tvennt neitt sérstaklega og finnst það ekkert gera fyrir mig.

En merkilegt samt að suma daga finnst mér ekkert svona dót ná að gera mig fallega eða ánægða með mig.  Ætli það sé ekki sálarástandið þann daginn sem setur einhverja spéspegla fyrir augu manns....

[Laufey Ólafsdóttir, 9.9.2007 kl. 08:14]

Svona er þetta bara Jenný. Stundum finnst mér ég bara ákaflega ljót sama hverju ég smyr í andlitið á mér en aðra daga lít ég á mig allsnakta í framan og finnst ég æði. Kannski eitthvað andlegt dæmi, kannski eitthvað annað. Veit ekki hvort aðrir sjái mun. Best að vera bara ekkert að líta í spegil á off-dögunum.

[Katrín Snæhólm Baldursdóttir, 9.9.2007 kl. 08:14]

Stundum fæ ég líka ljótuna.þá er alveg sama hvað ég geri ég er bara hryllilega ljót í framan þegar ég lít í spegil. Svo koma dagar sem ég er alveg hæstánægð með mig og get farið ógreidd og ómáluð hvert á land sem er..alltaf samt fullkædd...og finnst ég bara æðisleg þannig. Held þetta fari mun meira eftir innri líðan hvað maður sér i speglinum hverju sinni. Árhringir finnast mér fallegir...finnst slétt  og árhringjalaust fólk einhvernveginn ekki eins fallegt og það sem ber merki lífsins utan á sér og framan í sér. Svo þú ert gullfalleg Jennsla mín...

[Birna Dis Vilbertsdóttir (IP-tala skráð) 9.9.2007 kl. 13:10]

Ha er tíska í andlitsmálun? Ég hélt að það væri eitthvert leikskóla thing.hahahahahaha. Auðvitað veit ég allt um þetta

[Jenný Anna Baldursdóttir, 9.9.2007 kl. 14:54]

Ég er auðvitað í kasti yfir ykkur stelpur, þið eruð svo ógissla skemmtilegar.

Ólína: Fer aldrei út á meðal fólks ómáluð nema í neyðartilfellum og þá opnast himnar, jörð springur og fjöll hrynja

Katrín:  Róleg á samúðinni, ég er ekki svona slæm, er það??

Laufey: Það eru ár og dagar síðan ég upplifði allsnakið fésið á mér sem fagurt.  Þú ert UNG æmtellingjúvúman.

Birna Dís: Vildi óska að þetta væri pistill um leikskólanámskeið, en því miður, tíska í förðun er gígantískt mikilvæg.

Krossgata:  Þú ert huguð kona og ég dáist að þér

Rebbý: Þetta er allt spurning um góðan ásetning til að sætta sig við orðin hlut.  Muha